Volharding tydens beproewings

'n Oorwinnende lewe is 'n lewe wat getuig van volharding te midde van beproewings. Hierdie soort vasberadenheid en getrouheid aan God bewerkstellig geestelike volwassenheid (Romeine 5:3-5).

Dit is tóg waarna ons strewe: om geestelik te groei en om 'n lewe te leef wat daarvan getuig dat ons aan God getrou is en dat ons totaal aan Hom oorgegee en uitverkoop is.

Geestelike volwasse mense hanteer die lewe en die eise van die lewe anders. En daarom is beproewings 'n leermeester wat ons wys wat in ons harte is en hoe diep ons toewyding aan die Here is. Namate ons 'n lewe van getrouheid en oorgawe aan God leef, bewerkstellig dit 'n volharding wat eer aan God bring.

'n Lewe van oorwinning vereis dus van ons om uitdagende tye en omstandighede met standvastige geloof te verduur, wetende dat hierdie beproewings ons standvastigheid versterk en ons oorgawe suiwer — soos goud wat deur vuur gelouter word (1 Petrus 1:6-9).

Wanneer ons dink aan die heerlike resultaat wat volharding tydens beproewings in ons karakter en geestelike volwassenheid na vore bring, verstaan ons waarom Jakobus gesê het dat ons dit as vreugde moet ag wanneer ons deur allerhande beproewings gaan.