Jesus se Laaste DaeSample

In die Graf (Saterdag, een dag na die kruisiging)

Jesus het gesterf en Sy liggaam is in die graf.

Hoëpriesters en Fariseërs plaas wagte by Jesus se graf: Matteus 17:62-66

Dink vir ‘n oomblik aan dit wat die volgelinge van Jesus moes deurgaan gedurende hierdie tyd. Hulle was onseker. Dit word duidelik dat die gebeure nie werklik deur hulle verwag was nie en nog minder het hulle die betekenis begryp.

Spesifiek Petrus, die mees prominente dissipel van Jesus, het in hierdie tyd die diepste moontlike verwyt beleef. Hy het Jesus as die Messias bely, hy het op water geloop, hy het die verheerliking op die berg beleef (Matteus 17), hy was altyd aan Jesus se sy, maar Petrus het vir Jesus verloën, drie maal nogal, net soos Jesus voorspel het (Matteus 26, 69-75).

Met dit in gedagte kan ons vooruit kyk na Johannes 21:15-17 waar Jesus drie maal vir Petrus vra: "Het jy my lief?" Ons kan sê Jesus het ‘n doelbewuste afspraak met Petrus. Dit is duidelik in die evangelies dat Jesus juis vir Petrus drie maal vra omdat Petrus vir Jesus drie maal verloën het.

Jesus hanteer Petrus met die uiterste deernis en genade na sy grootste flater, sy ergste teleurstelling, sy selfverwyt en kwaad-vir-homself wees. Jesus is geïnteresseerd daarin om sy skande te bedek en hom te herstel en te genees. Die eerste sigbare toepassing van die genade wat die kruisiging bewerk het, word in Petrus se lewe gesien.

Wat is jou grootste skande, pyn of teleurstelling? Jesus kom na jou toe net soos met Petrus, met hierdie doel: om die genade en vergifnis wat die kruisiging bewerkstellig het van toepassing te maak in jou lewe … om jou te herstel en genees.