Staan dan vasSample

Wees sterk

Moet geensins onder die wanindruk verkeer dat jy nie in hierdie wêreld verdrukking of vervolging as gevolg van jou geloof in God kan beleef nie. Trouens, wees dit eerder te wagte. Nogtans is Jesus se raad aan jou: "... hou goeie moed" (Johannes 16:33). Om sterk te wees vereis van jou om te begryp dat jy nie die aanslae van die duiwel in jou krag kan oorwin nie, maar slegs in die krag van God se sterkte (Efesiërs 6:10). Om te besef dat jy van God afhanklik is, is ware sterkte (2 Korintiërs 12:9-10). Jy is dus nie 'n oorwinnaar deur jou eie toedoen nie, want jy staan nie in jou eie sterkte nie. Dit is deur Jesus Christus dat jy meer as oorwinnaar is en tot alles in staat is (Romeine 8:37 en Filippense 4:13). Jy is nie sterk as gevolg van jou eie oortuiging van jouself nie, maar as gevolg van die geloofsoortuiging dat Hy wat in jou is groter is as hy wat in die wêreld is (1 Johannes 4:4).