Dís my Jesus.Sample

HOEKOM DIE WONDERTEKENS

"Maar hierdie wondertekens is beskrywe sodat julle kan glo dat Jesus die Christus is, die Seun van God, en sodat julle deur te glo, in Sy Naam die lewe kan hê" Johannes 20:31 AFR83.

Die vraag ontstaan dikwels: Hoekom het Jesus nou juis al hierdie wondertekens gedoen terwyl Hy op die aarde was?

Ek dink Johannes het ons van die wondertekens vertel, sodat ek en jy Jesus beter kan leer ken. Sy doel was dat selfs ons wat nie fisies die wondertekens gesien het nie, tot geloof in Jesus Christus kan kom. Want deur die lees van die wondertekens, leer ken ons ‘n Man wat onverpoos gewerk het om mense na God te wys. Hy het liefde gehad vir alle mense: ryk, arm, die met gebrek en die sonder gebrek, die Jood, Griek, Samaritaan ... Vir Hom is ons almal gelyk. Sy omgee en genade was en is nog steeds vir alle mense beskikbaar.

Die grootste wonderteken van almal was Jesus wat weer uit die dood uit opgestaan het. Ons weet Hy leef! Ons weet genoeg om te weet dat al hierdie vertellinge waar en eg is, want daar was meer as genoeg ooggetuies en baie geskrifte opgegrawe om die gebeure te staaf.

Johannes het geweet sy eie verandering as mens was nie bloot net om die woorde: Jesus Christus is die Seun van God, te kan sê nie. Hy het verstaan dat dit daarom gaan dat Hy in der waarheid erkenning gee aan die KRAG wat agter die naam Jesus Christus is!

Dis daardie krág waarmee God die hemel, aarde, mens en dier geskep het. Dis daardie krág waarmee Hy Jesus uit die dood uit opgewek het. Dis dieselfde krag wat Hy vir elkeen van ons gee wat in Hom glo! (Efesiërs 1:19). Dis die God wat ons aanbid!

Kies om ‘n verhouding met Hom te hê. Lees jou Bybel sodat jy Hom beter kan leer ken. Bid, ja praat gedurig met God en sien hoe sy krag in jou lewe sigbaar raak.

Gebed:

My Vader God! U is groot en almagtig. Verhewe bo al die nasies. U wonderdade is vir my te groot en onbegryplik om te verstaan. Maar dankie dat U my liefhet, dankie vir u krag wat deur my werk. Ek loof en prys U daarvoor. Amen.