Oomblikke Van StilteSample

Ek is by julle

Dwarsdeur die Bybel klink die refrein van God se troue liefde. Ek sal jou nooit verlaat nie. Ek is by jou. Ek red jou. Ek ontferm my oor jou. Hoe kan Ek jou prysgee? My liefde brand te sterk.

Elke dag is God in sy troue liefde by ons. Deur moeilike tye hou Hy ons vas. In tye van smart is Hy ons Trooster, al is ons dalk nie eens van sy teenwoordigheid bewus nie. In gelukkige tye jubel Hy saam met ons van vreugde. God, die Getroue, is altyd daar.

Die keuse lê elke dag nuut voor ons deur: Gaan ek luister en hóór en sê: Hier is ek, Here? Of gaan ek my gesig wegdraai en my eie koers instap?

Vader, Seun en Heilige Gees, dankie vir u troue sorg. Dankie dat U meer as ’n vriend en vertroueling is. U is my Rots, my Skuilplek, die onveranderlike Ek is. U is nóú en tot in alle ewigheid. U is die Alfa en Omega. Amen

Hierdie oordenkings is geneem uit OOMBLIKKE VAN STILTE deur Lizette Murray © Christelike Uitgewersmaatskappy.