Hy Is My HoopSample

Waag die kans

As ’n Christen moet ek bely daar is nie in my lewe iets soos “hoop vir die beste” nie. Ek bid, lees God se Woord en doen dan presies wat God vir my in sy Woord sê ek moet doen. Ek sê ook altyd vir God dankie vir sy genade en barmhartigheid. Ek weet God sal alles ten goede laat meewerk, wat ook al gebeur.

Wanneer ons swaarkry en nie die lewe verstaan nie, kan ons dit waag om soos Job te sê: “God kan my maar tref, maar ek het geen ander hoop nie. Ek gaan my saak voor Hom stel” (13:15). Aan die einde van sy lewe het Job dubbel soveel ontvang as wat hy verloor het.

Ek weet daar is nie iets soos toeval of bygelowe in God se beplanning nie. Alles werk uit soos dit moet, met ’n rede, en God is ten volle in beheer van alles.

Ons moet egter ook onthou ons leef in ’n stukkende wêreld. Daarom kan alles nie altyd verloop soos ons dit sou wou hê nie. Maar selfs wanneer ’n tragedie ons tref, kan God die oorwinning behaal en die slegte in die goeie verander (Rom. 8:28). Die Bybel sê in Johannes 12:24: “Ek verseker julle, as ’n graankorrel nie in die grond val en sterf nie, bly hy net op sy eie bestaan; maar as hy sterf, lewer hy ’n groot opbrengs.” God self sal sorg vir die opbrengs.