5 Minute Saam Met GodSample

Word ons genoeg stil om te luister?

In 2016 het ’n aardbewing wat 7,8 op die Richterskaal gemeet het Ecuador getref. Die 33-jarige Filerma Rayo is vir vyf ure lank onder die puin van haar restaurant vasgekeer. Sy het desperaat om hulp geroep, maar tog het dit nie gelyk of iemand haar hulpkrete hoor nie. Sy was op die punt om op te gee toe reddingswerkers haar bevry. 

In ’n nuusberig wat ná die aardbewing verskyn het, word daar vertel hoe die sowat 1 000 reddingswerkers op die toneel gereeld tydens die reddingsoperasie heeltemal sou stil word om te luister of daar nie dalk mense was wat om hulp roep nie. 

In die gejaagde lewe waarin ons leef, mis ons baie keer die hulpkrete van mense reg langs ons omdat ons nie daarop ingestel is nie. Ons dink dalk aan die bedelaar langs die pad as ons dink aan iemand in nood. Tog is hierdie “stil-hulpkrete” dikwels baie nader aan ons. Dit is dalk van daardie kollega in die kantoor langs jou. Sy praat dalk nooit daaroor nie en op die oog af lyk dit of daar niks fout is nie, maar by die huis is haar huwelik besig om uitmekaar te val – en sy het niemand om mee te praat nie. Of dalk die kassiere by die supermark se betaalpunt. Sy sukkel dalk om te konsentreer, omdat sy dink aan haar siek kind alleen by die huis want sy nie kan bekostig om van die werk af weg te wees nie. 

Dit is slegs wanneer ons besluit om doelbewus stil te word en te luister, dat die Heilige Gees ons bewus sal maak van die “stil-hulpkrete” reg rondom ons.

Slegs in daardie stil oomblikke raak ons bewus van ander se “stil-hulpkrete”.