VrygespreekSample

Genade is ‘n permanente werkwoord

God is lief vir ons, maak nie saak wat ons doen of sê nie. Niks kan ooit maak dat Hy ons minder lief sal hê nie, niks nie. Natuurlik beteken dit nie ons het carte blanche om sonde te doen nie. As ons so dink, verstaan ons net mooi niks van sy genade nie. Dan het ons eintlik nog nie egte hemelse genade ervaar nie. 

Nee, genade is ’n Goddelike werkwoord in die lewe van elke ontvanger daarvan. Dit kos God nie net ongelooflik baie werk om ’n genadepad tot reg voor ons elkeen se lewe te bou nie. Ja, dit ook! Maar daarna gaan sy genadewerk in ons lewe onverpoos voort. Genade is nie ’n eenmalige gebeurtenis en dan is dit oor en verby nie. ’n Mens praat daarom nooit oor genade in die verlede tyd nie. Dit is nie ’n saak waarop ons kan terugkyk asof dit lankal afgehandel is nie. 

Genade is ’n proses, ’n lewenslange aktiwiteit in ons elkeen se lewe. God bly lewenslank met ons besig. Hy bewys nie ’n eenmalige dosis genade en verskuif dan vinnig na ’n nuwe adres toe nie. Nee, as Jesus se genade ons die dag getref het, is ons van dan af vir altyd in die greep van genade. Goddelike genade is onvoorwaardelik, blywend, lewenslank. God hou van ons net soos ons is. Hy vat ons as ons op ons heel slegste is, naamlik as ons sondaars is. Hy kom haal ons op die slegste punt in ons lewe, net voordat ons pens en pootjies in die doderyk instort. Nou hoe op dees aarde sal God ons dan ooit prysgee as ons iewers langs die lewenspad weer ’n knik slaan? Elke keer begin God oor en voor met ons. Onvoorwaardelik, nuut, vars. Nooit word die vloei van hemelse genade in begenadigdes se lewe onderbreek nie.