Die boek 1 Korintiërs met Jennie Allen: ’n Video-BybelstudieSample

Volg eerste vir Jesus

Wie is jou gunsteling vermaaklikheidsterre? Volg jy hulle op sosiale media of in die nuus? Sangers, politici, skrywers en selfs predikante word dikwels verhef tot ’n trappie bo die res. Die publiek behandel hulle anders omdat hulle iets gedoen het om ons aandag of bewondering te verdien.

Het jy geweet dat mense wat in Jesus glo, ook afgesonder van die res leef? Die Bybel se woord daarvoor is “heiliges”. Die apostel Paulus open sy brief aan die gemeente in Korinte deur hulle te beskryf as mense “wat Hy vir Hom in Christus Jesus afgesonder en geroep het om aan Hom te behoort” (1:2) Om heilig te wees, beteken om van die res geskei te word – anders of anders as die res. Paulus gebruik die woord “heilig” herhaaldelik in 1 Korintiërs.

Wanneer die woord gebruik word om na God te verwys, beteken dit Hy is totaal anders as sy skepping, in karakter en in wese. Hy is perfek en almagtig – ons is nie. Soos Paulus die woord gebruik om na God se mense te verwys, beteken dit dat ons soos Hy moet probeer wees, anders as die res van die wêreld.

Omdat ons heilig is, apart van die wêreld, terwyl ons leef vir God, moet ons lewens dit wys. Die hele punt van Paulus se brief is om die mense in Korinte daaraan te herinner dat hulle identiteit as die liggaam van Christus hulle gedrag en gesindheid moet beïnvloed. Hulle is veronderstel om anders te leef, op só ’n wyse dat hulle soos Christus is en nie soos die hedendaagse kultuur nie.

Paulus praat byvoorbeeld van eenheid. Hy verwag van die mense in Korinte om Christus as eenheid te aanbid. Maar hulle was te besig om te baklei oor hulle leermeesters, wat vir hulle soos beroemde vermaaklikheidsterre was.

“Ek volg vir Paulus.”

“Wel, Apollos is my leermeester!”

“Ek volg vir Sefas!”

Klink dit bekend? Die kerk van vandag tree net soos die kerk in Korinte op. Ons is verdeeld omdat ons graag ons gunsteling geestelike leiers wil volg. En hierdie leiers stel ons keer op keer teleur. Waarom? Omdat hulle nie perfek kan wees nie. Geeneen van hulle is Jesus nie.

Paulus was een van hierdie bekende leiers, maar hy verwerp die sterstatus wat daarmee gepaard gaan. Hy herinner die Korintiërs daaraan dat al die leermeesters maar net “medewerkers in diens van God” is (3:9) en dat die fokus op God moet wees. As mense wat apart van die res is, moet ons glad nie die eer aan menslike sterre van ons tyd gee nie. Laat ons liewer uit ons identiteit as God se heiliges leef, in navolging van Jesus, ons nederige Verlosser. Geen feilbare menslike leier is die moeite werd om so gevolg te word dat die eenheid verdeeld word nie. Kom ons hou ons Verlosser in die ereposisie.

Hierdie leesplan is geskryf deur die personeel van RightNow Media en die meegaande video-onderrig is ontwerp in vennootskap tussen Jennie Allen en RightNow Media.