Mataio' 5
5
Izesu' Gololo' Mono' Lo-ngimine' Gamazi
1Izesu' aza evene' muki' goloso ani' nene ningo gololo' dizo a'mida mito' neivo izipahala zuho ingine ezela igi minikevo 2gamazi api' ogo ne'mine lo apize ngemo minine':
Lamine' Olone' Akalo' Mino Molo Ogali'mi Monovoli'mi Gamazi
(Luka' 6:20-23)
3Lute hize ele' iline' inite' mata' lezela nomive li vise' iga' ave ingine
O'moso'mo gizebo o-ngedelingu' vi hilalizani' nenako
nemu' lamine' iliza akalo' mini mili nizaze.
Nemu' ngolize izilizani' o neive.
4Ido' lihime initeli'mi lulou' mini agae agae li ive igi minaa' nave ingine nene
O'moso'mo do ngu' izeline' nenako nemu' lamine' iliza akalo' mini mili nizaze.
Nemu' ngolize izilizani' o neive.
5Ido' evene' hongu li limi minaa' nave ingine nene
O'moso'mo misubo me'ningine lolo' o-ngedo
a'mingu' inite' mata' nesi ngemeline' nenako
nemu' lamine' iliza akalo' mini mili nizaze.
Nemu' ngolize izilizani' o neive.
6Ido' evene' govi ve noso ve li ga'na hili minaa' nave ne'mini
O'moso'mi monovo lisihekumu' ma dunivoo li ga'na hili minaa' nave ingine
a'mine dalisa lani' inite' nene O'moso'mo ngemavo
lanite' gili minilizani' nenako
nemu' lamine' iliza akalo' mini mili nizaze.
Nemu' ngolize izilizani' o neive.
7Ido' evene' mamu' mulumo'ine gili nasahili' i-ngidaa' nave engi' nene
O'moso'mo mulumo'ine gelo nasahili' o-ngedeline' nenako
nemu' lamine' iliza akalo' mini mili nizaze.
Nemu' ngolize izilizani' o neive.
8Ido' lu'ningu' golososi nomivo lamine' minaa' nave ingine O'moso ningilisave.
Ningilizani' nenako nemu' lamine' iliza akalo' mini mili nizaze.
Nemu' ngolize izilizani' o neive.
9Ido' evene' hongu li miniliza monovo di soto' iga' nave ingine
O'moso'mo ei' izipahala zuho ve lo-ngedeline' nenako
nemu' lamine' iliza akalo' mini mili nizaze.
Nemu' ngolize izilizani' o neive.
10Ido' O'moso'mi monovo lisihe' nene di ti' igisa igi mili nizavo
nemu' goboni nimili-ngidavo goboni mala' malali'mi lulou' minaa' nave ingine
O'moso'mo gizebo o-ngedelingu' vi hilalizani' nenako
nemu' lamine' iliza akalo' mini mili nizaze.
Nemu' ngolize izilizani' o neive.
11Ve ma ingine neni' ne'metangumu' ve li lengelemi goboni mili-lingidi soza li gamazi goloso palasa li-lingidilizani' nene lamine' iliza akalo' mini mili nizave. 12Ido' gomu' minani' Polohete a'mine'mine igi goboni mili-ngidaa' ani' nenako lingine engi' gono'nido' medeli minani' nemukisi ido' O'moso'mo aza menitine naba Okulumokuko molo-lengedelingumukisi muludingu' lamine' gili longolize izi minilo.
Evene' Ma Ingine Guvo Ne'minesi Livi' Ne'minesi Minavemu' Line' Gamazi
(Maleko' 9:50; Luka' 14:34-35)
13Guvo nene noso' niteku' tile' okunivo ne'mo do lamine' oga' neive. Lingine evene' mukiliti vovo'ningu' guvo ne'mine mini ngele'mize lamine' igi minilisave. Ee, lingine guvo ne'mini nizani'za a'mine guvo nene goloso ogavo lanite've osu' lavo ma ngelo gohi lamine' amoloseive. Mo goloso o vine' nenako nemu' di huli akalo' ikevo evene' a'mido' lisi monilisave.
14Lingine nene misubou' veliti livi' labana'ine nene nizave. Ido' nemu' nene gololo' gehepeve minine' numuno ebe' ne'minisasi minilisave. Gololo' gehepeve minine' ne'mo ngelo haleko minamoloseive. Lingine a'mine'mine igi soto' igivo' minikevo evene' muki' nene ningi osu' li minilisave. 15Ido' olo' livi' nene vite' igisa a'mido' somo naba ma di hiti di halekami a'mine livi' nene numungu' nizave muki' nene hize labana' ele-ngedelive li holomo'velo' soto' ogo minelidokovo' di milalisave. 16Lingine a'mine'mine igi labanatine ne'mo evene' nene hize labana' ele-ngedelive li di soto' igisa igi mili minilizani' monovo nene lamine' ogavo nemu' nene evene' nete ningi Okulumoku' Metibine nene opo'ni lilisave. Nemu' labanatine nedunu' hize labana' ili minilo.
Mose' Lo Huko Line' Gamazimu' Gizine' Gamazi
17Lingine nenikumu' O'moso'mi lou' gamazi Mose' lo huko line' nesi O'moso'mi veleti' gamazi polohete nete li soto' ani' nesi gili damilo lo a'mine gamazi ize hukolosa ahe li gilamilo. Nene ize hukolosa amuve. Monovo've lo soto' ogo do gihile izelesa ogo nouvoni' ve. 18Gamazi mene mo lamineto' nolo-lingimuve: O'moso'mo lo huko line' gamaziuti' nene gamazi ngomo ha nitekisi mo vo tolovo amivo okulumokisi misubosi osu' lilisine' gameneukisi a'mine lou' gamazi nene ha mineleseive. Lamine' ha mino a'mine gamazi muki' nene gihile izosavo' nene osu' loloseive. 19Ve ma ingine O'moso'mo gili dalizave lo lou' gamazi lo huko-lidine' mukikuti' ngomo gidini ma minine' nemukisi haza nite' ve li avuto' igi mini evene' mamu' linginesi a'mine'mine igi avuto' igi minilizani' nesi lamine' oloseive li apizi ngimilizani' nene O'moso'mo engikumu' ei' gizebou' vi hilaveti muliseu' limi minave ve lo lo-ngedeleseive. Ne'mine lo-ngedeline'za ve ma ingine a'mine lou' gamazi muki' nene gili di mini evene' mamu' linginesi a'mine'mine igi gili di minilizave li apizi ngimilizave ingine O'moso'mi gizebou' vi hilaveti muliseu' dizi minilisave. 20Ido' nemu' nene naza nolo-lingimuve. Lingine O'moso'mi lou' gamazi apizi lingimaa' avesi ido' Halisaio' mono' laa' avesi ingine evene' muki' ngivile' igi ve lisihe' lamine' nizave ve li gilaa' nahe. Gililo. Lingine lisihe' goloso igi mini a'mine mono' li-lingimaa' ani' aleve nene ngivile' igi minamilizani' nene O'moso'mi gizebou' mo keke' vi hilamilisave.
Lizebolo' Molali'mi Gamazi
21Ido' lou' gamazi gozopo' avotinginemu' ne'mine lo Mose' lo huko gizine' ma nene mo gili nizave: Gaza evene' ma bele helamozo. Nemu' nene evene' ma bele helelive nene gonito' ele'mize mili lihime've imilisave. 22Ne neine'za ma lo-lengemeloze. Ve ma aza ve mamu' izebolo' daline' nene gonito' oteleseive. Ido' ve ma aza ve mamu' dingani negi goloso ve lo-delive nene goni' nabalo' oteleseive. Ido' ve mamu' gaza gamazi gelesa'mane dingani goloso mene lo lo-delive nene oloku' vaa' akalo' mine molaloseive. 23Nemu' nene gaza inite' ma O'moso emelesa mono' numungu' dizo a'mine inite' milaa' holomo'velo' olihe nomolo ve ma nenikumu' mulunou' goloso gelo lihime'ne do neive lo a'mido' gaka lite' lo gelo ma 24O'moso emeline' inite' nene holomo'velo' molamo a'mido' huloko vo a'mine lihimeka do neive'mi mulunou' nene do lamine' o-dezo. Do lamine' o-dosa nene ogo O'moso emeline' inite' nene holomo'velo' molo-delesane.
25Ve mali'mo goni' o-gedelesa gele'mize do zasila novivo ma nene zasi'mo minosa hulo pilisi veti a'ningu' ogavo huli galapusolo' i-gidikelizaze. Akala olihe nivi ma gaza lite' lo gonito' gele'mize molalive'mi mulunou' do hongu lo-do zogo molo-dezo. 26Naza lamine' lo-gemeloze. Gaza zogo emo mulunou' do hongu lo-damanivo galapusolo' huli-gidilizani' nene gaza a'mingu' mino lihimeka apaseka' apaseka' ogo mino meni hize osu' gehepeve losavo' nene osu' losa volosane.
Vene' Longo' Ogakumu' Izesu' Line' Gamazi
27Mose' lo huko line' gamazi ne'mo gaza vene' ma longo' amozo lo neine' ma mo gili nizave. 28Gili nizani'za idise naza ma lo-lengemelove: Ve ma aza Vene' alu mamu' ningo ma duvo lo geleline' nene ei' luloli'mo a'mine vene' nene longo' ine' geleleseive. 29Nemu' nene veka zamelati' ningaine' ne'mo goloso initekumu' luka otavo ma a'mine veka ne'mo gele'mize goloso ogavo O'moso'mo oloku' hulo-gedalize. A'mine monovo goloso nene huliline' ne'mo veka mene kuluhize hulaine' gilivo mineline' nene lamine' oloseive. Okonga muki' lamine' ha do minaa' nene mo neine'za okonga muki' lamine' ha do minaine' ne'mo mudise vo oloku' minaa' akalo' gele'mize molaline' nene geikumu' lamine' amoloseive. Nemu' nene veka goloso nene kuluhize hulaine' gilivosa monovo goloso nene hulozo. 30Ido' anga zamela ne'mo lihime daa' akalo' gele'mize nomolavo ma a'mine anga ne'mo gele'mize goloso ogavo O'moso'mo oloku' hulo-gedalize. A'mine monovo goloso huliline' ne'mo anga mene huko hulaine' gelavo mineline' nene lamine' oloseive. Ido' okonga muki' lamine' ha do minaa' nene mo neine'za ne'mo mudise oloku' vaa' akalo' gele'mize molaline' nene lisihe' o-gedamoloseive. Nemu' anga nene huko hulaine' gilivo lihime daa' akalo' nene vamozo.
Vene' nGimisele Hulaa' Gamazi
(Mataio' 19:9; Maleko' 10:11-12; Luka' 16:18)
31Mose' lo huko line' gamazi ma ne'mino neive: Ve mali'mo aza elenahine hulo-delove lo ma vene' mene mo hulo-dekuve lo luhuvo gizo emosa hulo-delive. 32Ne neine'za neni' ma lo-lengemeloze: Ve ma elenaho gopo monamo noline' inite' mamu' haza hulo-deline' ne'mo lou' gamazi ma vene' vadingine huli ve malo' vamilo lo minine' ma nene avuto' ogo ve gohilo' viline' nene lihime daloseive. Daline' nene gomu' vanahi monovo ne'mo lihime mineleseive. Ido' ve gohi mali'mo a'mine vene' daline' nene lou' gamazi ve maliti ele'ningine damilo lo minine' ma nene avuto' ogo lihime daloseive.
O'moso'mi Velelo' Lo Hukaa' Gamazi
33Ido' lou' gamazi gozopo' avotingine ti' li li-ngimani' nesi mo gilikeni' ma neive: Inite' ne'mine olosuve lo anga dizo lo hukolo ma soza lamozo. O'mosomu' inite' olosuve lo anga dizo lo huko lo-emanido' nene ha olosane. 34Ne neine'za neni' ma lo-lengemeloze. Lingine inite' mamu' adine dizi lamine' nolune li keke' mo li hukamilo. Okulumo' nene O'moso'mo gizebo o-ledo minaa' neine' mo'mosi've neinako nemu' okulumoku' li izi adine dizi lamine' nolune li li hukilizani' nene O'mosomu' li adine dizani' geleleseinako nemu' ne'mine amilo. 35Ido' misubo nene O'moso'mo gizene lise minaa' neine' inite've nenako nemu' misubou' li izi adine dizi lamine' nolune li li hukamilo. Ido' Zelusalemi ebe' nene Guvelesi ve naba'mi numuno ebe've nenako nemu' Zelusalemi ebeku' li izi adine dizi lamine' nolune li li hukamilo. 36Ido' lamine' nolune li lengi' godotingukisi li izi lamilo. Lamine' nolune lo godoteu' lo izo lolone' nene geni amivo ha lolosune li gili nizahe. Lingine godotine zopovo hamokisi mokonope gonobupe minine' nene gonobupe mokonope lolo' ilive likevo ne'mine amoloseive. Langisetine godotine zopovo nene ngeli di ato' amilisave. O'moso hamo' ne'mo ha oloseive. Nemu' nene godotingu' li izi lamine' nolune lilizani' nene O'mosola li izi lani' geleleseinako nemu' godotingu' li izi adine dizi gamazi mamu' lamine' nolune li li hukamilo. 37Inite' mamu' o've noluve lo ma mo o've lamineto' lozo. Ido' oo noluve lo ma nene mo oo lamineto' lozo. Ido' inite' masi masi lo molo lo huko liline' nene Satanilati' soto' ine' lolosane.
Inite' Goloso I-ngidikevo Ingine A'mine'mine I-ngidamilizani' Monovoli'mi Gamazi
(Luka' 6:29-30)
38Mose' lo huko line' gamaziu' ti' lo neine' gili nizani' ma neive. Ido' ve mali'mo ve mali'mi vele hizo likavo ma eze vele hizi likilo. Ido' vele gavulo bele ledavo ma eze vele gavulo bili ledilo. 39Ne'mine lo neine' ma neine'za naza idise ma lo-lengemelove: Lingine ma nilingibilavo ma ingine di ti'ni ngibilamilo. Ido' gatine zamela niizavo ma hela adavalasi izilizaze. Mine velepe' izilo. 40Ido' sioti ngomo lulou' izikani' nene dalone li gonito' lengele'mize nimilavo ma saketitine izikani' nesi di ngimilo. 41Ido' ve malite heneni'ine gihi-ngidi aka li'nibe gidinilo' di vilo nilavo ma aka ha'na gidini nesi ha gihi-ngidi vilo. 42Ido' ve malite lengitati' inite' ma dalone li longo' navo ma ha ngimilo. Ido' lengitati' inite' ma do vo do-lengede mino alinge' do lengemelone nilavo ma a'manapa igi mehedine ngimamilo.
Biluvate lute nGemakumu' Gamazi
(Luka' 6:27-28)
43Ido' ti' li laa' nani' ma mo gili nizani' ma neive: Lengi' zuho avita minani' nene lutine ngimilizani'za biluvatine nene lutine ngimamilo. 44Ne'mine li laa' nani' ma nene neine'za neni' ma lo-lengemelove: Biluvatine nene lutine ngimi goboni mili-lingidilizavemu' nene O'moso'mo engita minelive li O'mosola lilo. 45Ne'mine ilizani' nene Okulumoku' metibi izipahala zuho gihile minilisave. Ee, Okulumoku' metibo O'moso aza evene' do kegeso ve laminekovo' do lamine' o-ngedo evene' goloso lovo imaa' ave nene do lamine' o-ngedamo hulo-ngedesa'mine'za ei' lavo ho've ne'mo silingenge'ne've hulo evene' golososi laminekisi nene do lamine' o-ngedaa' neive. Ido' lavo goline nene izo evene' lisihe' lamine' minanikisi minamanikisi nene do lamine' o-ngedaa' neive. Nemu' nene lingine a'mine'mine igi lovo vetine nene lutine ngimi goboni mili-lingidaa' navemu' O'mosola li ne'mine igi di lamine' i-ngidilizani' nene eze emeni damenisi mini Okulumoku' metibi izipahala gehepeve minilisave. 46Ido' lingine lu'ine lingimaa' navevo' nene lute ngemeso' O'moso'mo meni lemeleseive li gilaa' nahe. Lingine takisi daa' navemu' evene' goloso nizave li-ngidaa' nave ido' inginesi a'mine'mine igi lu'ine ngimavevo' ngimaa' nani'za lingine nene ma ngivile' igi monovo lamine' ma damanako O'mosolati' meni ma damilisave. 47Ido' lingine lengi' zuhovo' zogo mili-ngidi geke' voke' li-ngidaa' nani' nene lingine evene' gohi muki' minani' ngivile' ogo monovo lamine' ma daa' none li gilaa' nahe. E'e, heta ato' ve O'mosomu' gilamave inginesi a'mine'mine igi engi' zuho zogo mili-ngidi geke' voke' li-ngidaa' nanako nemu' lingine atoli'mine igi monovo lamine' nene ma damave. 48Nemu' nene Okulumoku' metibo lisihe' lamine' goloso neine' ne'mini linginesi lisihe' lamine' goloso minilo.
Atualmente Selecionado:
Mataio' 5: aso
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2013, Wycliffe Bible Translators, Inc. All rights reserved.
