Zohane' 8

1Izesu' aza gohi Oliva Golola dizo vine' 2Ido' nedenga' go' veseme' neivo Izesu' nene mono' numuno naba'mi gesi mingu' dizo neivo evene' muki' nene a'mine neida navo Izesu' aza mito' mino api' ogo mono' apize ngeme'mo vine'. 3Ne'mine o'mo novivo lou' gamazi apizi ngimaa' avesi ido' Halisaio' vesi ingine vene' ma ve masi monovo goloso ikesivo ningi a'mine vene' nene ele'mizi igi evene' mukilite ningilizado' di oti-di 4Izesu'ni ti' li li-imani': Tisazo, vene' me ve nene ve masi monovo goloso nasivo laza ningo analo' dokune. 5Nemu' nene Mose' lou' gamazi gize-lidingu' nene ne'mine vene' nene geheni huli huli' igi ngibili hililizave lo-lede neine' nenako gaza a'minemu' nene nadive lilinido' o neive lani'. 6Ne'mine li longo' i-dani' nene Izesu' gamazi do gopo ogo liline' nene goni' nabalo' ele'mize molalobe li gili ha emengu' ne'mine milisa golo izi longo' i-dani' ve. Ne'mine li longo' i-dikevo Izesu' aza gubi' izo anadunu' misubou' luhuvo gizo minine'. 7Ne'mine ine'za ingine geligeli igi gohi longo' i-dikevo Izesu' oto ti' lo lo-ngimine': Lengikuti' ve ma lihime'vesi nomo nolive ma noline' ne'mo nene gana' api' ogo geheni hulo belavosa nene bililo. 8Ne'mine lo gohi gubi' izo misubou' luhuvo gizo minine'. 9Ido' Izesu' ne'mine line' nene gili ingine evene' nabalati' api' igi hamo hamo' vika' vika' igi osu' likevo Izesukovo' nene a'mine vene' masi ha ote minivo minasine' ve. 10Ne'mine ogo Izesu' aza gohi ote pehe lo vene' nene ti' lo longo' o-dine': Gei' gelemi minave ma nene zaala vave. Evene' hamolitesi ma lihime gimamahe. 11Ne'mine lavo vene' aza a'mido' ti' lo line': O'ove, ma ne'mine i-nidamave line'. Ne'mine lavo Izesu' asi nene ti' lo line': Nazasi nene a'mine'mine ogo lihime ma gemamolosuze. Gaza voosa nene lihime gohi ma damozo lo-dine'.]

Izesu' Aza Misubou' Aleve Hize Labana' Ele-ngedaa' Uve Nouve Lavo Halisaio' Ve Ingine Gasikavo' Nolaine' Ne'mo Nene Lamine' Laane Lo Gelamolosune Lani' Gamazi

12Ido' Izesu' aza gamazi gohi ma evene' lo-ngimingu' nene ti' lo line': Naza nene misubou' aleve hize labana' ele-ngedaa' uve ma nene nouve. Ve ma ne'meti minilizave nene lu'ningu' liti'muso ize minamivo a'mine neni' hize ele' o-ngedeloni' labana' ne'mo nene minevo' minevo' iliza aka ngelebizivo minilisave. 13Ne'mine lavo Halisaio' ve a'mido' ti' li lani': Gei' monovoka nene evene' atolitesi hize ele' i-gidi lamavo gasikavo' lo soto' soto' naine' nenako ne'mo nene gei' gamazika nene gamazi gihile nehe lo ngelo ma gelamolosune. 14Ne'mine likevo a'mido' Izesu' ti' lo line': Lingine nenikumu' gei' monovoka nene gasikavo' nolane lani' nene laminetokisi nililizaha gamazi'ne nene gamazi gihile gehepeve neive. Nene nanitekumu' ve. Naza nene zalati' uvoni' nehe ido' zala voloni' nehe nemu' nene mo gele nouve. Gele nouvoni'za lingine nene zaala voloni' nehe ido' zaalati' uhe nemu' nene ma gilamave. 15Lingine eveneliti monovomu' ize' mili laa' nani' nene ha me misubou' monovolokovo' e'metisa ne'mine iga' nave. Ido' neni' nene evene' maliti monovomu' ize' molo lihime ngemesa'muve. 16Ne neiha eveneliti monovomu' ize' molo lihime ma ngimuvodiniko neni' hamokovo' nene ne'mine amo nimiselive me'nehosi nene maka' ne'mine usidinako nemu' nene eveneliti monovo'inemu' nene ma luvodiniko a'minemu' nene mo gamazi gihile ve li lingine mo gililizado' o minidine. 17Ido' lengi' lou' gamazitingu' nene ti' li gizi nizani' ma neive: Evene' setalitise inite' mali'mi monovomu' hamo' gamazivo' li soto' ilisine' nene a'mine li soto' ilisine' gamazi nene gamazi gihile neive li gililizado' o neive. 18Naza na'nise'ne neni' monovo'nemu' nene lo soto' soto' nouha nimiselive me'neho nesi nene neni' monovo'nemu' lo soto' soto' oga' neinako nemu' nene nenikumu' na'nise'ne gamazi laa' nouvoni' ma nene mo laminekovo' neive li gililizado' o neive. 19Ne'mine lavo Halisaio' ve ingine ti' li longo' i-dani': A'mine maho nene zala neive. Ne'mine li longo' i-dikevo a'mido' Izesu' ti' lo lo-ngimine': Neni' nene zaho nouhe lingine ningi gilamani' nene me'nehinemukisi nene aza zaho nehe ma ningi gilamave. Nenikumu' nene ma ningi giladiniko me'nehinemukisi ningi giladine. 20Ne'mine line' nene mono' numuno nabau' O'moso imani' moni milani' bokisi minani' numuno lulo'mi gahevela mino mono' apize ngeme'mo vo miningu' nene a'mine gamazi line' ve. Ne'mine ine'za O'moso'mo eze dalizave lo gamene molo-dine' nene olihe amine' nenako ne'mo nene evene' hamolitesi analo' di di gonito' i-damave.

Izesu'nimu' Gili Ele'vole' Amangumu' Okulumoku' Vamilisave Lo Hungo' Molo-ngidine' Gamazi

21Ido' Izesu' aza gohi ti' lo lo-ngimine': Naza mo lengi' hulo-lengedo volosuve. Ne'mine okuvo lingine nenikumu' vise' igi minilizaha mo ningami mini lihimetine apasamo ha neivo hililisave. Ido' neni' ningamilizave noluvoni' nene nanitekumu' ve. Neni' voloda nene lingine ngeli vamilizani' ogavosa noluve. 22Ne'mine lavo Zuda ve naba nete ti' li lani': Aza neni' voloda nene lingine ngeli vamilisave noline' nene ei' oko'no bele helelesa nene ngelo ne'mine lamoloseiha ne'mine line' nene nanitekumu' live. 23Ne'mine likevo aza imine' molo ti' lo lo-ngimine': Lengi' nene gala'muno melati' ma nene nizave. Ido' neni' nene veletati' ma nene nouve. Ee, lingine nene me misubouti' ma nene nizave. Ido' neni' nene me misubouti' nomuve. 24Ne'mini nizangumu' nene lingine lihimetinesi ha neivo hililisave luvoni' ma neive. Ee, lingine nenikumu' a'mine neive ma ne neive li ma gili ele'vole' amilizani' nene lihimetine apasamo ha neivo a'minesi hililisave. 25Ne'mine lavo ingine ti' li li-imani': Gaza nene zaho ma nane. Ne'mine likevo Izesu' ti' lo lo-ngimine': Gamene gala'muda vomine lo-lingimuve ma ado' nene nouve. 26Ido' lengi' monovotinemu' ize' molo lihime lengemelodo' o minine' gamazi nene vai' lo neiha nimiselive ne'mo mo gamazi gihile laminekovo' laa' neivo eitati' giluvoni' gamazivo' nene me misubou' aleve lo-ngemaa' nouve. 27A'mine ne'mine line' nene metehine O'mosomu' line' nene ingine gilamani' ve. 28Ne'mine lo Izesu' ti' lo line': Lingine alinge' O'mosolati' ve gihile neni' zalo' di oti-nidiliza gamenelo' nenikumu' nene mo ei' ma neive li ningi gilisa ido' naza inite' ogo molo oga' nouvoni' nene na'nise'ne ga'neti' gelo ma osa'muvoni'za asi me'neho nelebizine' initekovo' nene lo soto' oga' nouvoni' nesi ningi gililisave. 29A'mine nimiselive nene nenikisi maka' neive. Ee, naza ei' mulunou' lamine' geleline' initekovo' oga' nouvoni' nenako nemu' nene aza ninge mate nimikivo ma minesa'muve. 30Ne'mine lo lo'mo novivo evene' linge muki' nene ezela gili ele'vole' ani' ve.

Gelekele' Ve Ne'mine Minilizanguti' Gamazi Gihile Ne'mo Nene Do Kuluhize-lengedeleseive Lo Izesu' Lavo Zuda Ve Laza Abalahamu' A'vopilemo' Zuho Mino Gelekele' Ve Ne'mine Ma Minamune' Ve Likevo Engi' Avo'nibo Nene Zaho Nehe Nemu' Gamazi Vai' Lani' Gizine' Gamazi

31Ne'mine ikevo Zuda ve ezemu' gili ele'vole' avemu' nene Izesu' ti' lo line': Lingine neni' apize lingimuvoni' gamazilo' e'meti mini di vi nilizani' nene neni' izipaha'ne zuho gihile nene nizave. 32Ne'mine igisa nene gamazi gihile'mi monovo nene ningi gilikevo lingine gelekele' goloso igi nizanguti' nene a'mine gamazi gihile ne'mo nene do kuluhize-lengedeleseive. 33Ne'mine lavo evene' linge malite a'mido' ti' li li-imani': Laza O'moso'mo do ote-dive Abalahamu' a'vopilemo' zuho none' nenako laza nene mo keke' evene' malite di gelekele' i-lidikevo minamune' nenako gaza gelekele' goloso igi nizanguti' kuluhizi minilisave nolane' nene lamilinako nanimu' lane. 34Ne'mine likevo a'mido' Izesu' ti' lo lo-ngimine': Naza lamineto' ti' lo nolo-lingimuve: Lihime dalizave muki' nene mo lihime monovoli'mi gelekele' ve nizave. 35Ve ma ve mala vi gelekele' ve minilizave ingine a'mine me'nibi numu'veu' mudise minilizani' mo'mosi'ine nene ma minesa'mine'za a'mine me'nibi gipele zuho nete nene mudise minilizani' mo'mosi'ine nene mo ha minaa' neive. 36Nemu' nene O'moso'mi gipele naza lihime monovoli'mi gelekele' ve minanguti' do kuluhize-lengedeloni' nene mo mudise haza gehepeve minilisave. 37Ido' lengi' nene mo Abalahamu' a'vopilemo' nizave losa nene ha gele nouha lingine nene neni' nibili hililiza aka nene vise' igi nizave. Nene nanitekumu' ve. Lingine neni' gamazi'ne damavo lutingu' vo minamine' nemu' ve. 38Ido' naza neni' gamazi'ne laa' nouvoni' nene me'nehosi makato' minosa ninguvoni' initekumukovo' nene laa' nouve. Ido' lingine igi mili iga' nani' nene lengi' metibidati' gilani' inite' nene igi mili iga' nave. 39Ne'mine lavo ingine ti' li li-imani': Gaza leli' metehinemu' laine' nene leze meteho nene Abalahamu' ma ve. Ne'mine likevo Izesu' aza ti' lo lo-ngidine': Lingine mo lamineto' Abalahamu' a'vopilemo' minadiniko mo Abalahamu' ogo molo ogo minaa' ine' monovolo' nene e'meti minadine'za ne'mine ma isa'mave. 40Naza gamazi gihile O'moso'mo lo-nemavo giluvoni' lo-lingimuve neni' nene nibili hililiza aka vise' igi nizave. Ne'mine igi nizani'za Abalahamu' nene ne'mine inite' ma osa'mine' ma neive. 41Lingine ne'mine igi mili nani' nene mo lingi metibo ogo molo oga' idi'mine nave. Ne'mine lavo ingine a'mido' ti' li lani': Laza nene gopo akalo' izipe nomune. Meteho nene O'moso hamo' neive. 42Ne'mine likevo a'mido' Izesu' ti' lo lo-ngimine': Ido' naza mela ogo nouvoni' nene O'mosolati' uvoni' ve. Na'nise'ne ga'ne gelo amo ei' O'moso'mo nimiselavo nouve. Nouvoni' nenako O'moso nene metibo minidiniko lingine neni' nene lutine nimadine. 43Lingine neni' gamazi lo-lengemaa' nouvoni' gilamani' nene nanitekumu' ve. Lingine neni' gamazi gililizado' lisihe' amani' nenako ne'mo ve. 44Lingine nene metibo Satanilati' soto' ani' nenako nemu' nene a'mine metibo lulou' lanite' giline' inite' nene igi mili ilisa gilaa' nave. A'mine Satani nene gana' soto' idati' evene' ngebele helaa' ive minine' ve. Gamazi gihile eita nomine' nenako ne'mo aza nene gamazi gihilelo' e'meto ogo molo osa'mive. Aza nene sozalo' ve mino soza laa' monovoli'mi meleho neine' nenako ne'mo nene aza soza liline' nene ha ei' emeni dameni gehepevelo' e'meto loloseive. 45Ne neiha neni' nene gamazi gihilevo' laa' nouvoni' nenako nemu' nene lingine a'mine metibine ne'mine mini a'mine laa' nouvoni' gamazi nene gili ele'vole' isa'mave. 46Lengikuti' ve mali'mosi neni' monovo goloso do noloni' nene ngelo ma do soto' amoloseinako nemu' nene naza gamazi gihile noluvoni' nenako nanimu' gili ele'vole' amave. 47Ido' O'mosolati' soto' igi minave nene O'moso'mi gamazi gilaa' naha lingine O'mosolati' soto' amani' nenako ne'mo nene ei' gamazi gilisa'mave.

48Ne'mine lavo Zuda ve ingine a'mido' ti' li li-imani': Gaza nene gopo izipe Samalia vete gidani' ma nanivosa sikalahu' goloso nene lukau' neive nolune' nene mo lamineto' nololosune. 49Ne'mine likevo a'mido' Izesu' ti' lo lo-ngimine': Naza sikalahu' goloso neve nene mo keke' lu'neu' nomive noluve. Asi me'nehine nene gelekele' o-do do naba o-daa' nouve. Ne'mine oga' nouvoni'za lingine ne'mine i-nidami di limi-nidilisa iga' nave. 50Ne neiha neni' di naba i-nidilizave losa gono dosa'muve. Neni' di naba i-nidilizave losa gono daa' neive nene ma mino a'minemu' ize' molaloseive. 51Naza lamineto' ti' lo nolo-lingimuve: Neni' gamazi'ne gili di minilizave muki' nene hili osu' lami minivi' minivi' igivo' minilisave. 52Ne'mine lavo Zuda ve ingine ti' li lani': Idise gamazi nolainidoti' nogilune' geiku' sikalahu' goloso neive lune' nene mo lamineto' lokune' neive lo gele none. O'mosola gi'mizive naba Abalahamu' nene mo helave. Ido' polohete minani' nesi mo hilikeve. Ne'mine ikeni'za gaza nene neni' gamazi'ne gili dalizave muki' nene hilami ha minilisave nolabe. 53Avoteho naba Abalahamu' nene helaani' nenako gei' nene ei' ivile' ogo evene' naba nabe. Ido' polohete nesi hilaakovo' ani' nenako gaza nene okonga do dizo nani'mine ve nouve losa nane. 54Ne'mine likevo Izesu' a'mido' ti' lo line': Naza guve'ne monelive lo na'nise'ne oko'ne do dize'mo vo nouvo guve'ne viline' nene mo haza nite' lolo' oloseive. Neni' guve'ne vilive lo neni' do naba o-nedaa' neive nene me'neho lengi' nete ei' nene O'mosote ve laa' nave ne neive. 55Ne neiha lingine ei' monovomu' nene ningi gilamavo nenikovo' nene eikumu' ningo gele nouve. Ido' naza nene ezemu' ma ningo gelamuve luvodiniko lengi' ne'mine mino sozalo' ve minuvodine. Ne neiha ezemu' nene mo ningo gelosa gamazi'vesi nene mo gele daa' nouve. 56Lengi' avotibo Abalahamu' nene neni' me misubou' ogo, ogo molo nouvo ningelingumu' nene olize goloso izine' ve. Ee, a'mine mela nouvoni' gamene nene ningo gelo mulunou' lamine' giline' ma neive. 57Ne'mine lavo Zuda ve ingine ti' li li-dani': Gaza nene kilisimasika olihe fifti (50) nelasi amine' neke nene gozopo' aka'mila hele vive Abalahamu' nene ningaine' gani nolabe. 58Ne'mine likevo Izesu' a'mido' ti' lo lo-ngimine': Naza mo lamineto' gehepeve nolo-lingimuve. A'mine Abalahamu' olihe soto' amivosa neni' nene nouvoni' ve. 59Ne'mine lavo nemu' nene Zuda ve ingine geheni bililisa geheni dani'za Izesu' a'mingu' vo haleko mono' numuno nabauti' nene heta lemo vine' ve.

Atualmente Selecionado:

Zohane' 8: aso

Destaque

Copiar