Tavaꞌu 6
6
La'iua Toxoxa'a
1 # Iop 1:6; 2:1 Xe ili'i noxi'a ane'i nenge tenanasi'a mukalu 'o, la ta mitema mitautaula'i la, la mipalaane'i ta 'ili'a tapiena mole itiitisi'a mu'oki'oki tani mo mitaasou xalexalee tuatuala mukalu. Mipalaane'i ta 'ili'a ta sema xe ta mulu. 2Lataua ta 'olu ta mulu mimaisi'a ta sema ne, la ta mitema ta 'ili'a ta sema ne ta lailaixe misevile, la sou milutu vaxa sou mino'a ane ane'i mimasaxai'a sou mi'uluxa'a. 3Anu aloxo ne la sou IAUE muavuti la muvikala aloxo 'o, “Eni umomomo sou amasaxai'a ta mitema 'o ixolu mo imauli maulixa'a veveeni la uasi, xo ane'i ta mitemasi, ta mitema sou isoisolisi. Usoko ane vaimomo 'o mo ulai avile ili'i, ane'i imaulixu tauu ie loxo itemaxu ta'uve mo mavulovexa tameisi (120).”
4 # Iti 13:33 No nano no voxovoxo ane tatei mo ili'i, ta mitema mipalaane'i ta 'ili'a, la ta toxotoxoxa'asi. Ta mitema ane ne, ane'i ta 'ilusulusune'i ta sema ane mi'uluxa'a Lataua ta 'olu ta mulu. Ane'i ta mitema sou xavi. Ta mitema no xalexalee tuatuala milavusi'a manina.
5 # Mat 24:37; Luk 17:26; 1Pi 3:20 Xe IAUE mumaisou lexe no voxovoxo utotomu ne, ta mitema ane mitaasou xalexalee tuatuala mukalu ne, misusu misevile no anu 'ili'ilixo masumasua ane ane'i mi'oxo'oxonu mo xavutalai'a umasaxau 'ili'ilixo masumasuasi. 6La tanuxa'a misevile mo tanu u'elai'a, xo Anu molusi mupaalixa'a sou mimauli no lia 'o, 7la sou muvikala aloxo 'o, “Eni akalusi'a ta mitema ane eni melo ekoine'i 'o mo ta mimii iouiou ane ta vova mo ane ta temene ilo'a ta mimii ane ixaxalaxala, ane'i ane ilalave, mo ane'i ane ivavava mo ta ngiangiala. Eni talelixa'a xo eni melosi ekoine'i.” 8Ia, itema vilesisi no taine'i nesi ane, anu IAUE opoonu laixeu misevile. Itema ane ne, ualasou lexe Noa.
9-10 # 2Pi 2:5 Nana ano 'o sou Noa. Noa mutaula'i la mupalaane'i ta 'olu tatalu, ualaualasi'a lexe Semu ilou Amu mo Iapeti. Noa ne, anu itema vile mulapu. Mo mii vile ususu no anu xoluxoluxu uasi. Mo muamua'i noxou ne, ane ilou Latauasi. 11Ia ta mitema tavu'alo ne, 'ili'ilixo masumasua loxo, 'oto'oto mo ialivula tuala, mo ivau itema usoli ne, mu'oki'oki tani mo mu'ana'ana no xalexalee tuatuala mukalu. Lataua mumaisou mo mulavusou 'ili'ilixo masumasua noxi'a ne mukalu. 12Iou mulu'e no xalexalee tuatuala 'o, la masua misevile. Ta mitema mi'oxo masuanu mukalu no anu 'ili'ilixo masumasua noxi'a.
13La sou anu muvikalanu Noa aloxo 'o, “Eni emaisou mo elavusou 'ili'ilixo masumasua noxi'a ta mitema loxo 'oto'oto mo ialivula tuala mo ivau itema usoli mukalu, mo eni amasaxa lexe akalusi'a ukalusi, xo 'ili'ilixo masumasua noxi'a mu'ana'ana no xalexalee tuatuala mukalu. 14Eni emasaxaine lexe natulusou lasipi vile tatila. Naxexeta ovu xopa, ka navalavala alealelaxu la sou natulusou no anu. Natulusou ukalu, la nakaviutunu no nano ka naluluu koluta no nano xe no ale no vasimolu. 15Nalovaxu nasokou no ta'u ulai uxali no kusinou limaxu itemaxu mavulovexa vile mo itemaxu ta'uve (300). Xe no anaxu pa'umolu vile ulai uxali xalee vile limaxu mavulovexa ta'uve (50). Xe no lia no ta'u ulai teitexi, limaxu mavulovexa tatalu (30). 16Natulusou lasipi ne laxa'u loxo tani 'o, ia laxa'u ne une'e utalo vaxa no lasipi pa'upa'umolu uasi. Namuxaxu taiinu ilimaxu vile no nixi no laaxu xe no pa'upa'umolu. No nano no tanu, la nasia'u lavalataxu no nano loxo tani lavalata tatalu. Vile no lia, vile no nixi xe vile teitexi. Ukalu, la sou namuxaxu aitenga vilesisi no xalee vile.
17Xo eni asou a'oxo la'iua toxoxa'a usili sou uxalixu kupa tatila loxo luaki 'o sou unononu xalexalee tuatuala mo u'unane'i ta mitema latala ilo'a ta mimii iouiou latala ane mimauli no xalexalee tuatuala 'o mo isoisoli ukalusi, 18ia eni emasaxa lexe asakiinu vaikala sou opo vilesisi, ia apala'alixu noxine ili'i o. Ngongi'a ta 'iline ilo'a neni'a mo ta ua'aua'aneni nga'unalai no nano no lasipi ne. 19Ta mimii iouiou ta temene mo ta vova, ane'i ane ixaxalaxala mo ane'i ane ivavava mo ta ngiangiala iouiou 'o ne, 20nano'u mulu vile xe sema vile noxi'a vilevilesi sou napamauline'i. 21Mo nano'u ngenge ngongi'a la'ilali iouiou kalumo.” 22#Eva 11:7Noa mulomuxu vaikala noxou IAUE la mimii piena e muvikalanuxu lexe u'oxo ne, mu'oxonu mukalusi.
Atualmente Selecionado:
Tavaꞌu 6: ataNTpo
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2013, Wycliffe Bible Translators, Inc. All rights reserved.
