Zenezi 23
23
Sara dâ'â wa, da te ãma iti'azé wasu'u
1Tawamhã Sara 127 na ãma iwahum na ma tô 're hâimana. 2Tawamhã 'ri nho'u Hebrõ na isisi, Quiriate-Arba na isisi amoi ãma ma tô oto dârâ, Cana'ã ti'ai ãma. Si'utõrĩ wamhã, ma tô Abra'ã hã ãma aiwa'õ, pẽ'ẽzé uptabi wa. 3Taha pari ihâiba hâ inomrozém hawi ma tô watobro, hitita norĩ ma, te te nharĩ da hã. Tawamhã te ãne tãma nharĩ za'ra:
4— Wa hã asiré za'ra wa'aba a'uwẽ õ nherẽ, wa tô aiwa'wa wa'aba 're ĩhâimana. Tahawa te za ti'ai wa'õno hã asiwi ĩma i'maiwede 'wa, ĩmro te iwa ãma ti'a da.
5Tawamhã hitita norĩ hã ma te ãne asa ãma sada'âbâ za'ra:
6— Wanhib'apito, ma'ãpé asina wawapari za'ra na! A hã wanhib'ihâ'a za'ra te asiptete uptabi na wama 're aihâimana za'ra mo. Tahawa te za 're iwasiséme mono zé iwẽ uptabi 're, aimro ãma hã iti'a. Aimro ãma iti'a da hã wa norĩ wa te aiwi sawi za'ra dai õ di.
7Tawamhã Abra'ã hâiwi sa wamhã oto, ma tô hitita norĩ nho'remhã tãma aiwẽ'ẽ za'ra. 8Ãhã wa, te ãne tãma nharĩ za'ra:
— Ãme ĩmro na te ti'a da, a norĩ wa'wa asima wẽ za'ra wa'aba wamhã, ma'ãpé Efrõ, Zoaha 'ra wi tiwi waptẽrẽ za'ra wa'aba, 9Maquipela na rowamri ãma ẽtẽ na ab're siro hã te te ĩma wede da, isipti'a zada'ré ãma 're ihâimana mono hã. Tawamhã wa hã ibâ na hã wa za tãma wa'â. Ãhã wamhã, wa za iwa da'ru tede'wa na hã 're ĩhâimana.
10Tawamhã te Efrõ tinhib'a'uwẽ si'rã'õtõzéb ãma iwa'wab za'ra hã nhamra, 'ri nho'õmo te, 'ridawa za'ẽtẽ na 're idanhisisi mono zéb ãma. Tawamhã te mreme 'rãihâ na uburé da te wapari za'ra da tinha ãne:
11— Mare di, ĩnhib'apito. Tanei õ di za. Ĩwapari pé! Taré wa za aima tisõ ti'ai wa'õno hã, duré ẽtẽ na ab're siro iwa 're ihâimana mono zama. Ĩnhib'a'uwẽ norĩ nho'a wa aima sa'ré, aimro iwa isẽrẽ da hã.
12Tawamhã Abra'ã, ma tô hitita norĩ nho're apâ hã tãma aiwẽ'ẽ za'ra. 13Tawamhã Efrõhõ ma, te te inharĩzém na uburé da te dasiwi wapari da hã, ma tô mreme 'rãihâ na duré tãma tinha ãne:
— Ma'ãpé ĩwapari! Wa ĩsima wẽ tô, ti'ai wa'õno te aiwi uipra da. Tahawa, za te aima iwa'âbâzéb da hã ma'ãpé ãma ĩzaze na. Taha parip si wa za ĩmro na ãma ti'a, õmemhã.
14Tawamhã Efrõ, ma te asa ãne duré ãma tãma wa'rã:
15— Ĩnhib'apito, iwa'âbâzém na te za ĩwapa! Ti'ai wa'õtõ wa'â hã ãne 400 na ẽtẽ waipo prã prata zapotore na. Taré, marĩ dai õ di, wama hã. Õne haré tô oto aimorĩ, tame aimro na hã ti'a da.
16Tawamhã Abra'ã ma tô ãma saze. Tahawa te ẽtẽ waipo prã prata hã oto apire pibu, Efrõ, danho'a te te iwa'âbâ wasu'uzéb zarina, iwa'â ibâ na te te ãma tãma iwa'âbâzéb da hã, dama rowede'wa norĩ 4 kilu nhipai u prã na te te siwi ipire pibuzéb zarina. 17Ãne Abra'ã, ma tô Efrõhõ te, Maquipela na romnhisi ãma oto ãma ate ti'ai wa'õtõ na, Mare na romnhisi bâtâ pusizém niwĩmhã. Ti'ai wa'õtõ wa, ẽtẽ na ab're siromo tede'wa na duré uburé wede, ti'a zada'ré u 're isimasa mono tede'wa na hã te oto 're hâimana. 18Tawamhã uburé hitita norĩ dasi'rã'õtõ ãma ihâimana za'ra, te te i'uipra na hã ma tô ãma 'madâ'â za'ra.
19Taha pari Abra'ã, ma tô timro Saraha ãma hã oto ti'a, ẽtẽ na ab're siro ti'ai wa'õno Maquipela wa ihâimana ãma, Mare bâtâ pusizém niwĩmhã, Hebrõ na isisi amoi ãma, Cana'ã ti'ai 'remhã. 20Ãne hitita norĩ te, ti'ai wa'õno hã, duré tô iwa ẽtẽ na ab're zama ma tô Abra'ãhã ma tãma sõmri za'ra, itede'wa na 're hâimana mono da, iwa da te 're idanheme mono pibu ma.
Atualmente Selecionado:
Zenezi 23: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
