Génesis 17

Abraham señalakushqan

1Abram esqun chunka esqun (99) watayuq kaykaptinmi Tayta Dios yuriparkur nirqan: <<Noqami kaykä El-Shaddai.#17.1 El-Shaddai ninanqa lapanpaq munayyuq Dios ninanmi. Nishqäkunata cäsukur mana jusalikuypa imaypis kaway. 2Qamwan pactuta rurashqäta cumplishaqmi.#Gén. 12.2-3. Saymi qampita miraqkuna askaman mirayänanpaq bendicionnïta churashaq>>.

3Sayno niptinmi Abram jukla lätakuykurqan. Tayta Diosmi nirqan: 4<<Pactu rurashqäta cumplirmi aska nación runakunapa taytan kanaykipaq churashayki. 5Kananpitaqa manami Abramnasu jutiki kanqa, sinöqa Abrahamnami.#17.5 Abraham ninanqa aska runakunapa taytan ninanmi. Sayno jutiki kanqa aska nación runakunapa taytan kanaykipaq churash kaptïmi.#Rom. 4.17-18. 6Qampita miraqkuna saysikaman mirayänanpaq bendicionnïta churamuptïmi aska nacionkunapis y reykunapis paykunapita kayanqa.

7<<Kay pactuqa manami qamlapaqsu kanqa, sinöqa surikikunapaq, wilkaykikunapaq, shurukta wilkaykikunapaq y paykunapita mas miraqkunapaqwanmi. Kay pactutaqa imaypis cumplishaqmi. Qampa Diosniki kaykashqänölami qampita miraqkunapapis Diosnin kashaq. 8Qorpanöla taykashqayki Canaáncho kaq markakunatami entregashayki. Saynölami qampita miraqkunatapis qoykushaq imayyaqpis saycho täyänanpaq.#Hech. 7.5-6. Qampita miraqkunapa Diosninmi imaypis kaykäshaq>>.

9-10Mastapis Abrahamta Tayta Dios nirqan: <<Pactu rurashqäta chaskiyänaykipaqqa qampis y qamwan kaqkunapis lapan olqu kaqqa cuerpuykikunata señalakuyay. Saynöla señalakuyanqa qampita miraqkunapis.#Hech. 7.8; Rom. 4.11. 11Señalakuyashpayki penqaynikikunapa puntan qaranta kusuriyanki. Sayno señalakurmi pactu rurashqäta chaskiyanki. 12Kananpita olqu yuriq kaqtaqa yurishqanpita puwaq junaqlata penqayninta señalayanki. Makikicho yuriqkunatapis juklä nacionpita ashmaynikipaq rantishqayki runakunatapis saynöla señalayanki. 13Pactu rurashqäta imaypis yarparäyänaykipaq lapayki mana qonqaypa señalakuyanki. 14Mayqanpis mana señalakurqa pactu rurashqäta manakaqmanmi churaykan. Sayno kaqtaqa qamkunapita qarqunki>>.

15Saypitanami Abrahamta Tayta Dios nirqan: <<Kananpitaqa warmikipa jutin manami Sarainasu kanqa, sinöqa Saranami.#17.15 Sara ninanqa princesa ninanmi. 16Paytami bendicionnïta qoshaq suriki yurinanpaq. Saymi warmiki kanqa aska nacionkunapa mamanno. Paypa wawanpita miraqkunapitami reykunapis kayanqa>>.

17Tayta Dios sayno niptinmi Abraham yapay lätakuykur shonqulancho asikushpan nirqan: <<Pachak (100) watayuq runaqa ¿imanöpanashi surïküman? Sarapis esqun chunka (90) watayuqna kaykarqa ¡imanöpanashi qeshyaq tukunman!>>

18Saymi Tayta Diosta Abraham nirqan: <<Surï Ismaelta bendicionnikita qoykuptiki alimi kanman, Taytay>>.

19Sayno niptinmi Tayta Dios nirqan: <<Manami Ismaelpaqsu nikä, sinöqa warmiki Saracho yurinanpaq kaq surikipaqmi. Say surikipa jutinmi kanqa Isaac.#17.19 Isaac ninanqa asin ninanmi. Pactu rurashqäqa Isaacpaq y paypita miraqkunapaqmi imayyaqpis kanqa. 20Manakamashqaykinölami Ismaeltapis bendicionnïta qoshaq paypita miraqkuna jatun nación rikakuyänanpaq. Paypa surinkunapis chunka ishkay mandaqkunami kayanqa.#Gén. 25.12-18. 21Pactu rurashqämi isanqa Saracho yuriq suriki Isaacpaq kanqa. Watan kananno wisanqa wawayuqnami Sara puriykanqa>>.

22Sayno nirkurmi saypita Tayta Dios aywakurqan. 23Say junaqmi Tayta Dios nishqannöla makincho kaykaq lapan olqukunapa penqayninta Abraham señalarqan. Saymi surin Ismaelta, makincho yuriq runakunata y ashmayninpaq rantishqan runakunatapis señalarqan. 24Señalakushqan junaq Abraham kaykarqan esqun chunka esqun (99) watayuqmi. 25Surin Ismaelnami kaykarqan chunka kimsa watayuq. 26Say junaqlami Abrahamwan surin Ismaelpis señalakuyarqan. 27Saynöpis say junaqlami Abraham señalarqan makincho yuriq ashmayninkunata y rantishqan jäpa runakunatapis.

Atualmente Selecionado:

Génesis 17: qvhB

Destaque

Copiar