Marcos 3

Jesús tunutitian nocofunu musufimua cayahuani

Mt 12.9-14; Lc 6.6-11

1-2Ascatan tunuti futsaino Jesús Israelifoan aton ichananti pushu muran iquini. Iquicun Fariseofo yafi Moisés cunu tapimamisifoanri Jesús aasi oinnifo ahuuscashomain nocofunu musufimua tunutitian caya huaicain. Ahuunoa ahuara chaca yoipaicaquin. 3Ascan Jesús a nocofunu musufimua yoini. —Aton ointaifi nuno nihuu, —huani. 4Ascaino nocofunun ato nishoni, —Un mato yocain man ua cumatiromainquin. ¿Raquiri Moisés tsain noco yonoamun? ¿Tunutitian non ahuara huatiromun? ¿Nonraca sharatiro? ¿Nonraca chacatiro? ¿Tunutitian non yora cayahuatiromun? ¿Yora isinin icai oamun non cayahuaimun? Non caya huamama natiro. Nocohuun nutiro. ¿Non rutua shinantsain? ¿Ascamun shara? —ishon ato yocani. Ascafiaino puusinifoma.

5Ascatan sinaquin ato oiancutan ahuun nomuran fasi shinain, —¡Ohuashta! ¿Ahuuscashon aton nomuran shinanchacamisifomun? Ua icoinra huacatama, —ishon shinanni. Ascashon a nocofunu musufimua yoini, —Min mucu mushan huahuun, —huaino. Yonoa cuscan mushaniquin. Ascashu ahuun mucu muma sharacoin iriscatani. 6Ascaino Fariseofo amaquinoashu Herodes ahuun yorafo ano fonifo, —¿Ahuuscashomain non Jesús achimanain rutunonfo? —icashu yoinannifo.

Jesús fu yorahuanrasi ian cusumun fonifo

7-8Ascatan Jesús yafi afu rafumisifori nannoashu ianmanhuan Galilea ano fonifo. Foaifoanno yorahuanrasi Jesusqui funifo. Galilea anoashu fuaifo Judea anoashu fuaino Jerusalén anoashu fuaino Idumea anoashu fuaino unu Jordán chaimashta icafori fuaino Tiro yafi Sidón anoashuri aqui funifo. 9-10Yora ichapa caya huamamisi tapicanashu isinincaifo ichaparasi aqui funifo. —Norifi non Jesusqui mupiashu non cayatiroran, —icashon shinannifo. Jesús oinquin afu rafuafo yoini, —Ua shasho fushocahuun. Ipaishoma un yopaicai. Yorahuanrasiton ua yuruatiroquin, —Jesús huani. 11Yora yoshin chacafo atohuun nuafo Jesús fuchicatan fuopacufoannifo. Ascashon yoinifo, —Minfin Diospan facuquin, —huaifoan. 12—Tsainyamacahuun. Un Diospan facuqui tsoa yoiyamacahuun, —ato curushcai huaniquin.

Jesús afu rafuafo tanamisifo doce catoan

Mt 10.1-4; Lc 6.12-16

13Ascatan Jesús machi mapufaitan afu rafuafo cunani, —Uqui fucahuun, —ato huani. 14Aqui fuafoan doce catonshon ato yoini, —Man uhuun yonomisifo itiro ufu rafufafaincahuun. Un mato nichicai man yorafo Upa Diosin tsain ato yoinon. 15Un mato yonoshqui uhuunshon yoshin chacafo futsafohuun nuucun atomaquinoa man potatiroran, —ishon ato yoini. 16Nan doce Jesús catonni afoan aton anufo un mato tapimanon. Futsan Simonfiacun ahuun anu futsan Jesús tuqui huani Perdo. 17Futsafo Zebedeo facu rafu Santiago yafi Juan. Aton anu tuqui huani Moanurquisi, onicoinnin tsainmanfin nocofunufo curushcoin nan turuica cuscara. 18Futsanfoan aton anu Andrés non Felipe non Bartolomé non Mateo non Tomás non Alfeopan facu Santiago non Tadeo non Simón futsan nanton fasi Diosin tsain tanasharacoinpaiyaino. 19Futsan ahuun anu Judas Iscariote nanton Jesús potashon ato achimani.

Jesús yafi Satanás

Mt 12.22-32; Lc 11.14-23; 12.10

20Ascatan Jesús yafi afu rafuafo pushu muran iquinifo. Iquiano yorahuanrasi a nicapaicani aqui funifo. Ascano ato yosiaino a futan afu rafuafoan ahua piinifoma. 21Ascano ato yosifaiquin, yosifaiquin huaiton. —¡Uru! Jesusfin nison cuscaracoinquin, —icashu ahuun yoinannifo. Acaifoan nicai ahuun yorafo funifo. Ihuipaicani.

22Asca Moisés tsain tapimamisifori Jerusalén anoashu nicapai aqui funifo, Ascashon yoicaquin —Jesusfin Satanashuunshon ahuarafo huaiquin. Satanás yoshin chacafoan aton niaifo. Ahuunshon nocofunumaquinoa yoshin chacafo potairan, —ishon yoinifo.

23Ascano Jesús ato cunani. Ato ahuara futsafohuunoa yoishquin ato tapimanon. Yoini isca huaquin, —¿Ahuuscashumain Satanás afiri potatiroquin? 24Caifofo afi ranan rutunain cuyotirofo. 25Yorafori afi ranan rutunain cuyotirofo. 26Nanscarifi aqui Satanás afin ahuun yoshin chacafo potaino arifi funotiro. Asca huaino ahuun yono chacanatiro arifi cuyotiro. 27Shinancapon. Nocofunu mutsisipacoinin ahuun pushu cushuanocai tsoa iquitiroma ahuun mafo onunshquin. Ascafiaino rufofo achifain munushushon ahuun mafo onutiro, —ishon Jesús ato yoini. 28-30—Jesuscai Diospan Yoshin Sharahuunshon yorafo caya huamama yoshin chacahuunshon ato caya huamaran, —ishon yoinifo. Ascafiaifoan Jesús ato yoini, —Icon un mato yoinon. Ua nicacahuun. Ratoran futsan futsafo tsain chaca huafain Diosquiri chaca huacun Upa Diosin nantifi chaca huaa cuscan rau huashotiro. Ascafia tsoan Dios nicacasmaiton yoiquin isca huatiro, “Naton aca cuscan Satanashuunshon acaran,” huafiaino Diospan Yoshin Sharahuunshon atiro. Nanton Diospan Yoshin Sharahuunoa tsain chaca huacun Upa Diosin ahuun chaca rau huanacama. Chaca huaa cuscan ahuun nuupacunacaran, —ishon Jesús ato yoini.

Jesús ahua yafi ahuun chipocufo

Mt 12.46-50; Lc 8.19-21

31Ascano Jesús icano ahua yafi chipocufo noconifo. Pushu fospiaifono chifishon niafo futsa amuran nichini a yoinonfo. 32Yorahuanrasiton cufuacunifo. Ascano futsan yoini, —Min uhuan futan ushto rananun chifi nishon mia ahuara yoipai fuaforan, —ishon yoiaiton. 33—Un mato tapimai ratofomain uhuun uhua yafi uhuun ushtofoquin, —ishon ato yoini. 34Ascano cufuacufoannaifoan ato oiancufainquin, —Nafo uhuun uhua cuscarafo yafi uhuun ushto cuscarafoquin. 35Uhuun Upa Diosin ato amapaiyai cuscan afofin uhuun ushtofo cuscara non uhuun chicofo cuscarafo non uhuun uhua cuscarafoquin, —ishon Jesús ato yoini.

Atualmente Selecionado:

Marcos 3: mcd

Destaque

Copiar