Mateo 6

Ri Jesús cac'utun chwi ri limoxna

1»Mi'an ri quic'ut ri jusuc' ibinic isilabic chiwachil xa re quixilitaj cuma ri ticawex;#Mt. 23:5 ma we jela' qui'ano, na jinta rajil uc'axel quic'ul che Rikaw Dios c'o chila' chicaj. 2E uwari'che, echiri' quiya limoxna che juna niba', mitzijoj chique ri ticawex, pacha' ri caqui'an ri xa queb quipalaj pa tak sinagogas y pa tak be. Ma rique jela' caqui'ano xew cha' cayac quik'ij. No'j ri'in pakatzij wi cambi'ij chiwe: Ruc' c'u wa yacbal quik'ij, ya e la' xquic'ul ri rajil uc'axel ri xqui'ano. 3E uwari'che, echiri' quiya limoxna chique ri niba'ib, mi'an chiwachil. 4Jec'ula' na jinta c'o cana'ben re, xew Rikaw Dios queta'man wa'. Ec'u Rire cuya na ri rajil uc'axel chiwe.

Ri Jesús cac'utun chwi ri oración

(Lc. 11:1-13)

5»Echiri' quixch'a't ruc' ri Dios, mi'an iwe'ix pacha' ri caqui'an ri xa queb quipalaj. Ma rique lic cuc'ul quic'u'x ri caquibololej oración e la' e tac'al pa tak sinagogas y pa tak jachbal be cha' jela' quebilitaj cuma ri ticawex. No'j ri'in pakatzij wi cambi'ij chiwe: Ruc' c'u wa yacbal quik'ij, ya e la' xquic'ul ri rajil uc'axel ri xqui'ano. 6No'j ri'ix echiri' quixch'a't ruc' ri Dios, chixoc pa ja, chitz'apij lo ri puerta y chixch'a't ruc' Rikaw Dios xa ituquel; jec'ula' Rikaw Dios caril ri qui'an xa ituquel y cuya na c'u ri rajil uc'axel chiwe chiwachil.

7»Ec'uchiri' quixch'a't ruc' ri Dios, miwererej ch'a'tem uq'uiyal laj pacha' caqui'an ri na queta'am ta uwach ri Dios; ma e caquich'ob rique ruma ri caquiwererej ch'a'tem, quetataj ruma ri Dios. 8Mi'an c'u iwe'ix pacha' ri caqui'an rique, ma Rikaw Dios lic reta'am chic sa' ri cajawax chiwe echiri' c'amaja' ne quitz'onoj che.

9»Ec'u ri'ix echiri' quixch'a't ruc' ri Dios utz jewa' tak ri quibi'ij:

Kakaw Dios, Lal c'o la chila' chicaj,

¡lic cheta'maxok nim uk'ij ri bi' la!

10Peta la, takana la pakawi';

chu'ana c'u ri rajawal c'u'x la wara che ruwachulew,

jela' pacha' ri ca'an chila' chicaj.

11Ya'a co la wak'ij ri kawa,

ri cajawax chike ronoje k'ij.

12Cuyu co la kamac,

jela' pacha' ri'oj cakacuy quimac ri emacuninak chikij.

13Y maya co la luwar chike cojtzak pa mac;

e lic chojcolobej la chwach ritzel winak.

Ma pak'ab Rilal c'o wi ronoje takanic y chuk'ab;

y xew che Rilal takal wi ri yacbal k'ij na jinta utakexic. Amén.

14»Ma we ri'ix quicuy quimac tak ri ticawex, jec'ula' ri' cu'an ri Kakaw Dios c'o chila' chicaj, cucuy imac ri'ix. 15No'j we ri'ix na quicuy ta quimac tak ri ticawex, jec'ula' ri' cu'an ri Kakaw Dios, na cucuy ta imac ri'ix.#Mr. 11:25-26

Ri Jesús cac'utun chwi ri ayuno

16»Echiri' ri'ix qui'an ayuno, mic'ut bis che ripalaj pacha' ri caqui'an ri xa queb quipalaj. Ma rique caqui'an wa' xa pacha' quebilitaj cuma ri winak. Pakatzij wi cambi'ij chiwe: Ruc' c'u wa yacbal quik'ij, ya e la' xquic'ul ri rajil uc'axel ri xqui'ano. 17No'j ri'ix echiri' qui'an ayuno, chich'aja ripalaj y chixiya riwi' chi utz. 18Jec'ula' ri ticawex na caquil taj we ri'ix ix c'o pa ayuno. Xew c'u Rikaw Dios, ri na quilitaj ta uwach, caril ri na caquil ta ri ticawex. Ec'u ri' Rire caya'w na ri rajil uc'axel chiwe.

Ri beyomalil re chila' chicaj

(Lc. 12:32-34)

19»Mixchacun xa re quimol uc'u'xibal beyomalil re ruwachulew, ma ri wara e tak ri ic'olom xa capoq'uiric y cu'an mojos, yey queboc ne elek'omab che relek'axic bi. 20We quiwaj quirik ri sakil beyomalil, e chi'ana wara che ruwachulew janipa ri lic c'o uchac chwach ri Dios cha' jela' c'o cutikoj chiwe ri'ix chila' chicaj. Ma ri ic'olom chila' na capoq'uir taj y na cu'an ta mojos, yey na jinta ne elek'omab queboc che relek'axic bi. 21Ma pa c'o wi ribeyomalil ri'ix, puwi wa' que'ec wi ic'u'x.

Ri c'ambal na'oj puwi ri kawach

(Lc. 11:33-36)

22»Ri kawach e pacha' candil re ri kacuerpo, ma ruma wa' cojtzu'nic cha' utz cojbinic. Jec'ula', we ri kawach utz u'anom, ronoje ri kacuerpo nojinak che k'ijsak y cakil c'u ronoje chi utz. 23No'j we ri kawach na utz taj, ronoje ri kacuerpo c'o pa k'eku'm. Jec'ula', we ri k'ijsak c'o kuc' u'anom junam ruc' ri k'eku'm, ¡co'l chi lo k'eku'malil ri' oj c'o wi!#6:22-23 Pa ri ch'a'tem hebreo, we cabi'x che junok “utz ruwach”, wa' que'elawi lic utz uc'u'x, na caxu'yan taj. Yey we cabi'x che junok “na utz ta ruwach”, wa' que'elawi lic co ruc'u'x y lic xu'y.

Ri Jesús cac'utun chwi ri puak

(Lc. 16:13)

24»Lic c'ayew we juna aj chac e ca'ib ri rajaw. Ma laj tzel caril ri jun yey c'ax cuna' ri jun chic; o laj cuyac uk'ij ri jun yey cuc'ak bi uk'ij ri jun chic. Ruma c'u la', na utz taj we junok cuya rib che unimaxic ri Dios yey cuya rib che utzucuxic ri beyomalil re ruwachulew.

Ri Dios quebuchajij ri ralc'o'al

(Lc. 12:22-31)

25»E uwari'che cambi'ij chiwe ri'ix: Mubisoj ic'u'x ric'aslem; mubisoj ne ic'u'x sa' riwa y rimik'ina' quitijo o sa' rik'u' quicojo. ¿Na e ta neba más c'o uwach ric'aslem ri'ix chwach ri quitijo? ¿Yey na e ta neba más c'o uwach ri cuerpo chwach rik'u' quicojo?

26»Chebiwilape ri tz'iquin quexiq'uic' che ruwa caj. Rique na quetico'naj taj, na caqui'an tane quimolonic y na jinta ne pa caquic'ol wi ri quimolonic. Na ruc' ta c'u ri', Rikaw Dios c'o chila' chicaj quebutzuku. ¡Mac'uwari' ri'ix, ri Dios quixuchajij, ma e más c'o iwach ri'ix chiquiwa ri tz'iquin!

27»¿C'o neba junok chiwe ri'ix curik cunajtirisaj jun chic k'ij che ruc'aslem wara che ruwachulew? Na jinta junok, tob ne lic cutij uk'ij che. 28¿Su'be c'u ri' lic cubisoj ic'u'x rik'u' quicojo? Chiwilape' su'anic queq'uiy ri cotz'i'j pa tak juyub; wa' na quechacun taj y na quequeman ta nenare' cha' caqui'an ri quik'u'. 29Yey ri'in cambi'ij chiwe: Ri rey Salomón, tob lic c'o uchomal ruk'u' xucojo, wa' na xumaj ta c'ana ruchomalil tak ri cotz'i'j. 30Jec'ula' we ri Dios u'anom chom che ri ak'es c'o wak'ij pa juyub yey chwe'k xa caporox pa ak', ¿na cuya ta cami ri' ri Dios rik'u' cajawax chiwe? ¡Ri'ix lic xa jubik' ri cubulibal ic'u'x ruc' ri Dios!

31»Cambi'ij c'u chiwe: Mubisoj ic'u'x y mibi'ij: “¿Sa' ri kawa, sa' ri kamik'ina' cakatijo? ¿Sa' ri kak'u' cakacojo?” 32Ma jenela' caqui'an ri winak na queta'am ta uwach ri Dios, e cubisoj quic'u'x tak wa'. No'j ri'ix c'o jun Ikaw chila' chicaj lic reta'am cajawax ronoje tak wa' chiwe.

33»Ri lic chirajawaxic chiwe nabe e lic chixoc il che rutakanic ri Dios y che ri jusuc' binic silabic caraj Rire chiwe. Yey ronoje tak c'u ri cajawaxic, xa uwi' chic caya'taj chiwe. 34Mubisoj pan ic'u'x ri quiwil chwe'k, ma chujujunal k'ij uc'amom chi lo ruc'ayewal.

Atualmente Selecionado:

Mateo 6: acrT

Destaque

Copiar