यहुन्ना 18

बगीच्या मा ईशु क धरावनु

1ईशु ने वात कयीन आपसा चेला साथे किद्रोन नदिन पार गया। चाँ एक वाड़ी हती, जीनाम वा आरू हेरेन चेला गया। 2ओका सी धरावनेवावा यहूदा भी त्यो जागु जानतु हतु, काहकि ईशु आपसा चेला साथे वा जाया करतु हतु, 3तव यहूदा, सैनिकन एक टुकड़ी काजे आरू प्रधान पुजारो आरू फरीसियोन तरफ रईन प्यादा काजे लीन, दिवा आरू मशाल आरू हथियारे लेता चाँ आया। 4तव ईशु, तीन सब वातु जु तीना पर आवनेवावी हती जानीन, निकल्यो आरू ओका सी कयो, “कुनीक देख रया छे?” 5हेकोने ओका सी जवाब दिदा, “ईशु नासरत काजे।” ईशु ओका सी कयो, “हाव छे।” ओका सी धरावणेवावु यहूदा भी हेरेन साथे उभु हतु। 6ओका सी यो कयताज, “हाव छे” त्यो पछळ वसरीन धरती पर पड़ गया। 7तव त्यो पछु ओका सी पूछु, “तुमू कुनीक देख रया छे।” त्यो बुल्यु, “ईशु नासरत काजे।” 8ईशु जवाब देदु, “हाव ते तुखे कय त्योक्यु छे कि हाव छे, यदि मखे देखतु छे ते हेको जाने देऊ।” 9यो एरकरीन हुयो कि चो वचन पूरो हुयो जो त्यो कयो हतु: “जीनुक तु मखे देदु ओकामा रईन हाव एकाह भी नी नाख्यु।” 10तव शमौन पतरस तलवार, जी हेरेन जु हती, खींची आरू पुजारान दास पर चालाड़ीन हेरेन डाखर्‍यु कान काट देदु। ओको दासन नाव मलखुस हतो। 11#मत्ती 26:39; मरकुस 14:36; लूका 22:42तव ईशु पतरस काजे कयो, “आपसी तलवार म्यान मा हावक। जो कटोवरो बास मखे आपलो छे, काय हाव ओको नी पीऊ?”

हन्नान समक्ष ईशु

12तव सैनिकों आरू ओका सूबेदार आरू यहूदि यान प्यादा ईशु काजे धरीन बांध दिदा, 13आरू पेहल ओको हन्ना जु ली गया, काहकि चाँ तीन सालन डाहला पुजारा कैफान सोसरू हतु। 14#यहुन्ना 11:49,50यो कैफा नावन एक मानुस जु तीन सालन पुजारो हतु, के हामरा मानसो करता केवल एक मानसो मरनु जुवे।

पतरस ईशु क मानने सी मना करनो

15शमौन पतरस आरू एक दिसरा चेला भी ईशुन पछळ चाल दिदा। एरकरीन चाँ ईशु साथे पुजारा आंगनामा गयु, 16पुन पतरस बाहरते झोपला पर उभु रोवे। तव यु दिसरू चेलु जु पुजारा जानु–पेहचानु हतु, बाहरते निकल्यु आरू झपलावाला कयीन पतरस काजे माहय ले आयु 17ची दासी जी झपला पर हती, पतरस कयो, “क तु भी ओको मानसोन चेला माहयलु ते नी छे?” त्यो कयो, “हाव नी छे।” 18दास आरू प्यादा जाड़ेन कारण कुयला धधकाकर उबा आगठो तापाय रोया हता, आरू पतरस भी हेरेन साथे आगठो तापाय रोयु हतु।

पुजारा द्वारा ईशुन पूछताछ

19तव डाहला पुजारा ईशु से हेरेन चेलान विषय मा आरू हेरेन विषय मा पुछताछ कर्‍या। 20ईशु ओका सी जवाब देदु, “हाव संसार साथे खुलीन वात कर्‍यु; हाव आराधना घरो आरू मंदिर मा, जा सब यहूदि एखठा होया करता छे, सदा शिक्षा कर्‍या आरू सातायलो मा काहय भी नी कयो। 21तु मखे से काय पुछता छे? सोंमवनेवावा पूछतास कि हाव ओका सी काय कयो। देख, चाँ जानता छे कि हाव काय काय कयो।” 22जव त्यो यो कयो, ते प्यादा मा रईन एक जु साथे उभु हतु, ईशु थापुड़ देदु आरू कयो, “काय तु डाहला पुजारा काजे ओको तरह जवाब देदु छे?” 23ईशु ओका सी जवाब देदु, “यदि हाव काहय बुरो कयो, ते ओको बुराईन गवाय आप; पुन यदि वारलो कयो, ते मखे काँ देतलु छे?” 24हन्ना उका बांधल कैफा डाहला पुजारा साथे मकली देदु।

पतरसन ईशुन उवखनेन पछु नाकार

25शमौन पतरस उबा होईन आगठो तापाय रया हता। तव चाँ ओका सी कयो, “क तु भी हेरेन चेलाम रईन ते नी छे?” त्यो नाकार करीन कयो, “हाव नी होय।” 26पुजारा सेवक मा एक, हेरेन परिवार माहयलु हतु जीनान कान पतरस काट देदु हतु, कयो, “काय हाव तुखे हेरेन साथे वाड़ी मा नी देख्या हता?” 27पतरस पछो नाकार कर देदु, आरू चटकरीन कुकड़ा वाषने लाग्यो।

पिलातुसन सामने ईशु लावनु

28तव चाँ ईशु काजे कैफा साथे किला मा ली गया, आरू भोरन टेम हतु, पुन चाँ तुमू किलान माहय नी गया ताकि विटळ नी हुयो पुन फसह खाय सकें। 29तव पिलातुस हेरेन जु बाहर निकल आयु आरू कयो, “तुमू इन मानसो पर कोसली वातन गुणु लागाड़ता छे?” 30हेकोने ओका सी जवाब देदु, “यदि त्यो खराब नी हतु ते हामु इनाक तारे हाथे नी सोपता।” 31पिलातुस ओका सी कयो, “तुमू इनाक ली जाईन आपसी व्यवस्थान लारे हेरेन न्याय करू।” यहूदि या ओका सी कयो, “हामु हक नी कि कुनीन जीव लेनु।” 32यो एरकरीन हुयो कि ईशुन ची वात पूरी हुयो जो हेरेने यो संकेत देते वोखे कयो हतु कि हेरेन मरन कोसी होयसे।

33तव पिलातुस पछु किलान माहय गयु, आरू ईशु काजे बुलावीन उका पूछु, “काय तु यहूदि यान राजु छे?” 34ईशु जवाब देदु, “काय तु यी वात आपसी तरफ रईन कयतु छे कि दिसरा मारा विषय मा तुखे यो कयो छे?”

35पिलातुस जवाब देदु, “काय हाव यहूदि मानसे छे? तारी जात आरू प्रधान पुजारा तुखे मार साथे सौप्यु छे। तु काय कर्‍यु छे?”

36ईशु जवाब देदु, “मार राज्य इना संसारन नी; यदि मार राज्य इना संसारन रोवतो, ते मार सेवक लड़ता कि हाव यहूदि यान हाथ मा सौपलु नी जातु: पुन मार राज्य यान नी छे।”

37पिलातुस जवाब देदु, “ते काय तु राजु छे?” ईशु जवाब देदु, “तु कयतु छे कि हाव राजु छे। हाव एरकरीन जनम लेदु आरू एरकरीन संसार मा आयु छे कि सच्चाईन गवाय देव। जु कोय सच्चाईन छे, त्यो मार शब्द सोमवीन छे।” 38पिलातुस उका कयो, “सच्चाई काय छे?”

ईशु क मोत क दण्ड

(मत्ती 27:15-31; मरकुस 15:6-20; लूका 23:13-25)

39“पर तुमरी यी वात रीति छे कि हाव फसह मा तुमरे करता एक मानसो काजे छुड़ देव। अळते: काय तुमू चाहता छे कि हाव तुमरे करता यहूदि यान राजा काजे छुड़ देव?” 40तव हेकोने पछु आयड़ीन कयो, “इनान नी, पुन हामरे करता बरअब्बा काजे छुड़ दे।” आरू बरअब्बा डाकु हतु।

Atualmente Selecionado:

यहुन्ना 18: NTDii20

Destaque

Copiar

Quer salvar seus destaques em todos os seus dispositivos? Cadastre-se ou faça o login

The Old Testament Books in Dhankavi Language © The Word for the World International and Dhankavi Mandli, Khargon, Raykhed, Nandurbar, Maharashtra 2025

Saiba mais sobre a परमेश्वरन सत्य वचन, नवलो नियम