यहुन्ना 11

लाज़रन मोत

1 # लूका 10:38,39 मरियम आरू ओकी बहिनीस मार्थान गाँव बैतनियान लाज़र नावन एक मानुस मांदलु हतु। 2#यहुन्ना 12:3यी ची मरियम हती जु पोरबु पर इत्र नाखीन हेरेन पायो करीन आपसा जुठा करीन पूछी हती, ओका भाई लाज़र मांदलु हतु। 3अळते: हेरेन बहिनीस उका कहय मोकल्यु, “हे पोरबु, देख, जिनाक तु मोंग राखतु छे, त्यो बीमार छे।” 4यो सोंमवीन ईशु कयो, “यी बीमारी मोतन नी होय; पुन यहोवा–भगवानन महिमान करता छे, कि हेरेन द्वारा यहोवा–भगवानन पोर्‍या महिमा हुयो।”

5ईशु मार्था आरू हेरेन बहिनीस आरू लाज़र पर मोंग राखतु हतु। 6तीभी जव उका सोंब्या कि त्यो मांदलु छे, ते जीन स्थान पर त्यो हतु, चाँ दुय दाहाड़ा आरू रूकाय गयु। 7हेरेन बाद त्यो चेला काजे कयो, “आवु, हामु पछा यहूदि या चाल्या।” 8चेला ओका सी कयो, “हे गुरू, हिमी ते यहूदि पर दगड़ा करीन देने चाहता हता, आरू काय तु तीभी चाँ जातु छे?” 9ईशु ओका सी जवाब देदु, “काय दाहाड़ान बारा घंटा नी रवता छे? यदि कोय दाहाड़ा मा चेला ते ठुकर नी खाता छे, काहकि ओको अमरकाय विजाळो देखातु छे। 10पुन यदि कोय रात मा चाले ते ठुकर खाता छे, काहकि ओकामा प्रकाश नी होय।” 11त्यो यी वात कयो, आरू ऐर बाद उकासे कयनो लाग्या, “आमरू दोस्त लाज़र सुव गयु छे, पुन हाव उका धरतीवने जाय रयु छे।” 12तव चेला ओका सी कयो, “हे पोरबु, यदि त्यो सुव गयु छे, ते वारलो होय जासे।” 13ईशु ते हेरेन मोतन विषय मा कयो हतु, पुन त्यो समझे कि त्यो निंदम रईन सुव जानेन विषय मा कयो। 14तव ईशु तीनुक काजे साफ साफ कय देदु, “लाज़र मर गयु छे; 15आरू हाव तुमरे कारण खुश छे कि हाव चाँ नी हतु जीनासे तुमू विश्वास करू। पुन हिमी आवु, हामु हेरेन जु जाता।” 16तव थोमान जु दिदुमुस हववाये, आपसा साथी चेलाह कयो, “आवु, हामु भी हेरेन साथे मरनाह जाता क।”

इसुत पुनरूत्थान आरू जीवन छे

17या पुगने पर ईशु काजे यो मालुम हुयो कि लाज़रन बीड़ा मा राखला चार दाहाड़ा होय त्योक्या छे। 18बैतनिया यरूशलेमन बराबर कोय तीन कि, मी, दुर हतु। 19बैस यहूदि मार्था आरू मरियमन जु हेरेन भाईस्योन मोत पर शांती आपने काजे आया हता। 20जव मार्था ते ईशुन आवनेन बातमी सोमवीन तीनाक मिवने करता गय, पुन मरियम घर मा बठली रवली। 21मार्था ईशु कयी, “हे पोरबु, यदि तु या रोवतु, ते मार भाईस नी मरतु। 22आरू हिमी भी हाव जानती छे कि जो काहय तु यहोवा–भगवान पर मांगसे, आरू यहोवा–भगवान तुखे आपसे।” 23ईशु तीनीक कयो, “तार भाईस पछु जीव उठसे।” 24मार्था तीनाक कयी, “हाव जानती छे कि शेवटला दाहाड़ाम पुनरूत्थानन टेमे त्यो जीव उठसे।” 25ईशु ओका सी कयो, “पुनरूत्थान आरू जीवन हाव छे; जु काहय मखे पर विश्वास करता छे, त्यो यदि मर भी जाए तौभी जीवसे, 26आरू जु कोय जीवतु छे आरू मखे पर जु विश्वास करे, त्यो अमरकाय जीवसे कदी नी मरसे। काय तु इन वात पर विश्वास करती छे?” 27त्यो तीनाक कयो, “होव हे पोरबु, हाव विश्वास करती छे कि यहोवा–भगवानन पोर्‍य मसीह जु जगत मा आवनेवाळो हतु, त्यो तुच छे।”

ईशु रवडु

28यो कयीन ची जात रयी, आरू आपसी बहिनीस मरियम काजे बुलावीन दोपाईन कयो, “गुरू या छे आरू तुखे बुलावता छे।” 29यो सोमवीन ची साठु उठिन हेरेन जु आवी। 30ईशु हिमी गाँव मा नी पुग्यु हतु पुन उका स्थान मा हतु जा मार्था ओका सी मीवायी हती। 31तव जा यहूदि हेरेन जु घर मा हता आरू उका शांती दिदा हता, यो देखीन कि मरियम जीरे उठिन बाहर गयी छे यो समझे कि ची बीड़ा पर रवने जाती छे, ते हेरेन पछळ जाता छे। 32जव मरियम चाँ पुगी जा ईशु हतु, ते उका देखताच हेरेन पायो पर पड़ी आरू कयी, “हे पोरबु, यदि तु रोवतु ते मारू भाईस नी मरतु।” 33जव ईशु ओका सी आरू यहूदि या जा हेरेन साथे आया हता, रड़ता देख्या, ते आत्मा मा बैस नाराज आरू परेशान हया, 34आरू कयो, “तु उका क राखतु छे?” हेकोने उकासे कयो, “हे पोरबु, चालीन देख ले।” 35ईशु रड़यु। 36तव यहूदि कयनो लाग्या, “देखु, त्यो उका पर कतरू मोंग राखतु हतु।” 37पुन ओकामा रईन काहय नी कयो, “काय या जोतरा आंधवान डुवा उगाड़ ्या, यो भी नी कर सक्यु कि यु मानुस नी मरतु?”

ईशु लाज़र काजे जीवाड़्यु

38ईशु मन मा पछु बैस नराज होईन बीड़ा पर आयु। चाँ एक दर हती आरू एक दगड़ा उका पर राखला हता। 39ईशु कयो, “दगड़ो हटाऊ।” उका मरलान बहिनीस मार्था ओका सी कयनो लागी, “हे पोरबु, ओका रईन हिमी ते सचाब वास आवती छे, काहकि उका मरलु चार दाहाड़ा होय गया छे।” 40ईशु ओका सी कयो, “काय हाव ने तुखे नी कयो हतु कि यदि विश्वास करसे, ते यहोवा–भगवानन महिमा काजे देखसे।” 41तव हेकोने ओका सी दगड़ा काजे हटाड़या। ईशु डुवा उगाड़ीन कयो, “हे बास, हाव तारू धन्यवाद करे कि तु मारी सोंबी लेदु छे। 42हाव जानतु छे कि तु मारी सदा सोमवीन छे, पुन जी गर्दी आस पास उभी छे, हेरेन कारण हाव यो कयो, जीनासे कि चाँ विश्वास करे कि तु मखे मकल्यु छे।” 43यो कयीन त्यो डाहला शब्द मा आयड़्यु, “ऐ लाज़र, निकली आव।” 44जु मर गयु हतु त्यो छिन्दरान कफन रईन हाथे पाय बांधलो निकली आयु, आरू हेरेन मुहय छिंदरो चिपक्यो हतो। ईशु ओका सी कयो, “ओका सी खुल देऊ आरू जाने देऊ।”

ईशुन विरोध षड़यन्‍त्र

45तव जा यहूदि मरियम जु आया हता आरू हेरेन काम या देखता छे, ओकामा रईन बैस मानसे उका पर विश्वास कर्‍या। 46पुन ओकामा रईन काहय ने उका पर फरीसियान साथे जाईन ईशुन कामन खबर दिदा। 47ओको पर प्रधान पुजाराे आरू फरीसिया महासभा बुलाया, आरू क, “हामु काय कर रया छे? यु मानुस ते बैस चमत्कार देखाड़तु छे। 48यदि हामु ओका सी ओसोज सुड़ देसु, ते सब मानसे उका पर विश्वास ली आवसु, आरू रोमि आवीन आमरू जागु आरू जाति दुयो पर हक कर लेसे।” 49तव ओकामा रईन कैफा नावन एक मानुस जु तीन सालन पुजारो हतु, उका कयो, “तुमू काहय नी जानता; 50आरू यो नी समझता छे कि तुमरे करता यो भी छे कि हामरा मानसोन करता एक मानुस मरे, आरू सब जाति नष्ट नी होय।” 51यी वात त्यो आपसी तरफ रईन नी कयो, पुन उका साल क डाहला पुजारा होईन भविष्यवाणी कर्‍या, कि ईशु ओको जातीन करता मरसे; 52आरू नी केवल ओको जातीन करता, वरना एरकरीन भी कि यहोवा–भगवानन तितर–बितर पोर्‍या काजे एक कर देऊ। 53शेवली कावा उका दाहाड़ा रईन चाँ ओका सी मार नाखनेन षड्यन्त्र बनावने लाग्या।

54एरकरीन ईशु तीन टेमे रईन यहूदि या मा प्रकट होईन नी फिर्‍या, पुन चाँ रईन जंगलन निकटवर्ती प्रदेशन इफ्राईम नावन। एक नगर जात रयु; आरू आपसा चेला साथे चाँ रोवने लाग्यु।

55यहूदि यान फसह तिवार नाट हतु, आरू बैस मानसे फसह रईन पेहल देहात रईन यरूशलेम गया कि आपने आपसु चुखो करू। 56अळते: चाँ ईशु काजे देखने लाग्या आरू मंदिर मा उबा रईन आपस मा कयनो लाग्या, “तुमू काय सोचता छे? काय त्यो तिवार मा नी आवसे?” 57प्रधान पुजारा आरू फरीसिया हुकुम दे राख्यु हतु कि यदि कोय यो जाने कि ईशु क छे ते कयो, काहकि चाँ उका काजे धर सकें।

Atualmente Selecionado:

यहुन्ना 11: NTDii20

Destaque

Copiar