YOANO 19

1MBWOSO Pilata akangata Yisu yi akamukuma bintu. 2Yi masalai akaluka kilongo kia mieba, yi akakiapeya kulu kwa mucwe ănci, yi akamulatisa mwombonda ă tululu a bwinu ; 3yi akalwa kudiyi ene, Bwatetela, fumu a bena Yuda ; yi akamukuma kuma mapi. 4Yi Pilata akabatuka kunci kabidi, yi akabatôyela ene, Mona, ntanamubatusa kunudi binuxelubukwa ene, kisosañana bwalo bubi yinanci pô. 5Yisu lolo akabatuka kunci, ulete kilongo kia mieba, yi mwombonda ă tululu a bwinu. Yi akabambila ene, Numoni muntu. 6Mbwôso pakamumona makanda manene yi tupalai, bakakwamena ene, Umukopeki ku nkulusu, umukopeki. Pilata akabambila ene, Numwangati mikyenu, numukopeki ku nkulusu, bwalo buntasosañana bwalo bubi yinanci. 7Bena Yuda bakamupingasa ene, Coco tudi yi mulangu, yi ku mulangu ou ndo kuxefwayi bwalo bwamaditekayi Mwana a Ncembi.

8Mbwôso pakakwombwa Pilata diyi dedi, akadika kucina ; 9yi akabwela mu kisambolelu kabidi, yi akakwambila Yisu ene, Owe udi muna kupai ? Kaninga Yisu kamupingaxili diyi. 10Pilata lolo akamwambila ene, Kusompa diyi ? Kusolubukwa ene, meme ndi yi bumanya bwa kukupaula, yi ndi yi bumanya bwa kukukopeka ku nkulusu ? 11Yisu ene, Kuxeakala yi bumanya ku bwalo bwamene kutena bwamakupebwa kulu ; mbwôso you amangulongola kudi udi yi kwona kwadika bungi. 12Pôi kikondo kieki pakapalaia Pilata kumupaula ; mo bena Yuda bakakwamena ene, Ndo wapaula muntu you, kuna kimbila kia Kyesa. Muntu mwoso udiateka fumu amatanda yi Kyesa.

13Mbwôso Pilata, pakakwombwayi meyi aa, akabatusa Yisu yi akaxikama ku nkwasa a kisambolelu, ku kidi kiabikilabo ene, Dibanca dia mabwe, kaninga ku luna Ebeleo ene, Ngabata. 14Kwakadi lolo kilungikilu kia Kidikixilu ; kwakadi pepe yi ola amusambomo ; yi akakwambila bena Yuda ene, Numoni fumwenu. 15Mo bakakwamena ene, Umunculi, umunculi, umukopeki ku nkulusu. Pilata akabambila ene, Nkopeki fumwenu ? Makanda manene akapingasa ene, Katuna yi fumu utena Kyesa. 16Kunyuma lolo akabalongolelayi, ayi kopekyebwa ku nkulusu. Mbwôso bakakwata Yisu, 17yi yei akabatuka, udi mu kwombulula nkulusu anci, kuya ku kidi kiabikilabo ene, Kidi kia kibwongwasa, kiabikidibwa ku luna Ebeleo ene, Ngolongota ; 18kwakamukopekabo, yi bamo yinanci babidi, you ku lubalu lolu, you ku lubalu yilwa, yi Yisu pakacikaci.

19Yi Pilata akafunda mukanda kabidi, yi akauteka pelu pa nkulusu. Papa pakafundibwa ene, Yisu a Nasalete, Fumu a bena Yuda. 20Mukanda ou lolo ăkabalabo kudi bena Yuda bangi, bwalo bwakadi kidi kieki kiakakopekyebwa Yisu pepe yi bula ; yi ăkafundibwa luna Ebeleo, yi luna Latini, yi luna Ngiliki. 21Mbwôso makanda manene a bena Yuda akakwambila Pilata ene, Kufundi ene, Fumu a bena Yuda, kate ene, Yei akatôya ene, Meme ndi fumu a bena Yuda. 22Pilata akapingasa ene, Binapufunda, napubifunda.

23Masalai lolo, pakadi amakopeka Yisu ku nkulusu, akangata bilamba bienci, yi akakwabanya makapa anai, muntu dienci dikapa, muntu dienci dikapa ; yi mucwala munene kabidi. Kaninga mucwala ăkadi kauna yi disambi, ăkalukibwa buncima bwau pôi kulu pôi muxi, 24Mbwôso bakatôyelañana ene, Katupandi, kate tuculi lubexi, unawangata ñani ; bixefikixibwa diyi dia mukanda ă Ncembi, diatôya ene, Bakakwabanyañana bilamba biamene, yi bwalo bwa mucwala ămene ndo bwakacwabo lubexi. Biakakwenca masalai bintu bebi.

25Ku nkulusu a Yisu lolo kwakakwemana mamanci, yi mamanci mwakunyenci, Mali a Kyeleopasa, yi Mali a Mangadala. 26Yisu, pakamonayi mamanci, yi mweyi amakwemana koku akanangayi, akatôyela mamanci ene, Mwamukaxi, tebela mwanebe. 27Akatôyela lolo mweyi ene, Tebela mabebe. Yi pôi kikondo kieki, pakamucwala mweyi you kwanci.

28Kunyuma, pakalubukwa Yisu ene, bintu bioso biamapwa nkyekyu, bixefikixibwa diyi dia mukanda ă Ncembi ndo akatôyayi ene, Ndi yi nyota. 29Koku lolo kwakadi mpamba a finika amakwolubila tô, yi pakadi bamakwolubisa supunci finika, bakamubandisa ku musuku ănci. 30Mbwôso pakadi Yisu apwangata finika akatoya ene, Kwamapwa ; yi akakwenama mucwe ănci yi akalongola kidimu kienci.

31Mbwôso, bitaxesala mimbidi ku nkulusu ku Sabado, (bwalo bwakadi kilungikilu, yi diba dia Sabado you diakadi diba dinene), bena Yuda ndo bakalomba Pilata, mikolo yabo yinyowebwi, yi bafu mikyeabo bancudibwi. 32Mbwôso masalai akalwa nyowa mikolo ya muna buxi yi ya munga akakopekyebwa yinanci ku nkulusu ; 33kaninga pakalwabo kudi Yisu, biakamumonabo afufwa buxi, bakadi kabasonyowa mikolo yenci, 34kate disalai dimodimwe diakabongola lubalu lwanci dikonga, yi koku kwakancuka maxi yi mai mangwoso. 35Yi you akamona akatôbôla ntôbô, yi ntôbô yenci idi sôsôlwo, yi mikyenci amalubukwa ene, amatôya sôsôlwo, binuxekwetabusa nonu kabidi. 36Bwalo bwakakwencebwa bintu bebi bixefikixibwa diyi dia mukanda ă Ncembi ene, Kakunanyowebwa mufwa ănci umoumwe. 37Dimo diyi kabidi dia mukanda ă Ncembi diamatôya ene, Banamuxixima akabongolabo.

38Kunyuma kwa bintu bebi, Yosefe a Alimatia, akadi mweyi a Yisu, kaninga ku busoko bwalo bwa bowa bwa bena Yuda, akalomba Pilata ene, Nculi mumbidi ă Yisu ; yi Pilata akakwetabusa. Mbwôso akalwa ncula mumbidi ănci. 39Yi Nikodemo akalwa kabidi, you akalwa kudiyi ku buxi buxi ku butuku, amacwala boputo bwa mô yi aloso, pa lwedi lwa nkama a pundu. 40Mbwôsô bakangata mumbidi ă Yisu yi bakaudinga mbuxa ya susu yi boputo bwa manonu, bea bidi muncikilu ă bena Yuda kuncika.

41Mo munda mwa kidi kiakaxipibwayi mwakadi kibidi ; yi munda mwa kibidi mwakadi lukita lupyalupya lutaladikibwa muntu munda pô. 42Mbwôso, bwalo bwa kilungikilu kia bena Yuda, yi bwalo bwakadi lukita pepe, ndo bwakancikabo Yisu koku.

Atualmente Selecionado:

YOANO 19: Luna_NT

Destaque

Copiar