Байбихьи 2
2
1Гьедин рижана зобги ракьги ва зоб-ракьалда бугебщинабги. 2Анкьабилеб къоялде Аллагьас Жиндирго хӀалтӀи рагӀалде бахъинабуна ва, киналго хӀалтӀабиги къотӀизарун, анкьабилеб къоялъ Гьес хӀалхьи гьабуна. 3Анкьабилеб къоялда баракатги лъун, Аллагьас гьеб хирияб къолъун гьабуна, щайгурелъул киналго ишалги тӀуран, гьеб къоялъ Гьес хӀухьбахъидал.
Адамги ХӀаваги
4Гьале гьадинаб буго зобги ракьги кин бижарабали бицунеб къиса.
БЕТӀЕРГЬАН Аллагьас ракьги зобги бижараб къоялъ, 5ракьалда жеги букӀинчӀо цониги хъарахъ яги цониги харил сум, щайгурелъул БЕТӀЕРГЬАН Аллагьас ракьалде жеги цӀад базабулеб букӀинчӀелъул ва ракь хӀалтӀизабизе инсанги вукӀинчӀелъул. 6Ракьалъе регьел кьолеб букӀана гӀицӀго ракьул чохьонисан бачӀунеб хӀухьелалъ.
7БЕТӀЕРГЬАН Аллагьас инсан гьавуна ракьул хӀурудасан ва, гьесул магӀарзухъе гӀумруялъул хӀухьелги пун, гьев чӀагояб рухӀлъун лъугьинавуна.
8Хадуб Эдемалда, бакъбаккуда, БЕТӀЕРГЬАН Аллагьас ах бижизабуна ва Жинцаго вижарав инсан гьенив тана. 9БЕТӀЕРГЬАН Аллагьас гьенир рижизаруна батӀи-батӀиял пихъил гъутӀби – рихьизе берцинал ва пихъ гьуинал. Ах бакьулъ бижизабуна гӀумруялъул гъветӀги лъикӀлъи-квешлъи лъазабулеб гъветӀги.
10Эдемалдасан, гьеб ахги лъалъалаго, чвахулеб букӀана кӀудияб гӀор, цинги эхебегӀан ункъиде бикьулеб букӀана, гьитӀинал гӀорал лъугьун. 11Гьезул цоялда цӀар ккола Пишон – гьеб чвахула месед гӀемераб ХӀавила абураб улка къотӀун. 12(Гьениб меседги буго, махӀгьуинал пицӀалги руго, оникс абулеб багьа хирияб жавгьарги буго.) 13КӀиабилеб гӀоралда цӀар буго Гихон, гьеб чвахула тӀолабго Куш улкаялдасан. 14Лъабабилеб гӀоралда цӀар буго Тигр#2:14 Тигр – жугьутӀ мацӀалда, «Хиддекель»., гьеб чвахула Ассириялъул бакъбаккудехун. Ункъабилеб гӀор ккола Ефрат.
15Эдемалъул ахикь тана БЕТӀЕРГЬАН Аллагьас инсан, гьеб ах хӀалтӀизабизе ва гьелъул тӀалаб гьабизе. 16БЕТӀЕРГЬАН Аллагьас инсанасда лъазабуна:
«Бокьараб гъотӀодаса пихъ кваназе бегьула дуца, 17амма лъикӀлъиги квешлъиги лъазабулеб гъотӀодаса пихъ кванаге – нагагь гьеб дуца кванани, мун гьеб къоялъго хвезе вуго».
18Хадуб БЕТӀЕРГЬАН Аллагьас абуна:
«Живго цохӀо вукӀин инсанасе лъикӀ гьечӀо. Гьесие данде кколев кумекчи вижила Дица».
19БЕТӀЕРГЬАН Аллагьас ракьудасан рижана киналго хӀайваналги зобалазул хӀанчӀиги. Гьел киналго Гьес инсанасда аскӀоре рачана, гьезда инсанас кинал цӀарал лъолелали хал гьабизе. Инсанас кинаб цӀар лъуниги, гьеб цӀар хутӀана щибаб рухӀчӀаголъиялда. 20Инсанас цӀарал лъуна киналниги рукъалъул хӀайваназда, киналниги зобалазул хӀанчӀазда ва киналниги гӀалхул жанаваразда, амма жиндие данде кколев кумекчи гьесда ватичӀо. 21Гьебмехалда БЕТӀЕРГЬАН Аллагьас инсанасде гъваридаб макьу бачӀинабуна ва, гьев кьижун ккаравго, гьесул цо хьабалахъагӀучӀги бахъун, гьеб букӀараб бакӀ гьанаца бацана. 22Гьеб хьабалахъагӀучӀалдасан БЕТӀЕРГЬАН Аллагьас чӀужугӀаданалъе куц-мухъ гьабуна ва гьей инсанасда аскӀое ячана. 23Инсанас абуна:
«Гьале дир ракьаялдасан – ракьа,
дир черхалдасан – черх!
ЧӀужугӀадан букӀина гьелда цӀар,
бихьинчиясдасан йосарай йигелъул#2:23 ЖугьутӀ мацӀалда цоцазда релълъарал руго «бихьинчи» ва «чӀужугӀадан» абурал рагӀаби – «иш» (бихьинчи) ва «иша» (чӀужугӀадан).».
24Гьединлъидал, эбел-эменги рехун тун, жиндирго чӀужугун вукӀина бихьинчи ва, гьел кӀиялго цолъун, цохӀо черх гӀадин лъугьина.
25Гьел кӀиялго – бихьинчиги чӀужугӀаданги – гӀицӀго рукӀана, амма гьел гьелдаса нечолароан.
Atualmente Selecionado:
Байбихьи 2: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023
