Байбихьи 17
17
Суннат – БЕТӀЕРГЬАНАСУЛ КъотӀиялъул гӀаламат
1Ибрамица ункъоялда анцӀила ичӀго сон бараб мехалда, илгьам гьабун, БЕТӀЕРГЬАНАС гьесда абуна:
«Дун вуго ХӀалкӀолев Аллагь#17:1 ХӀалкӀолев Аллагь – жугьутӀ мацӀалда, «Эль-Шадай». Гьелъул магӀна – хӀалкӀолъи цӀикӀкӀарав, Бечедав, Гьарзаяв Аллагь.. Дида цеве вацӀцӀадго хьваде! 2Дица КъотӀи гьабила Дидаги дудаги гьоркьоб ва рикӀкӀун хӀалкӀоларелгӀан гӀемерал наслаби кьела дуе».
3Ибрам Аллагьасда цеве кӀалагъоркье ккана ва Аллагьас жеги абуна:
4«Гьале Дица дургун КъотӀи гьабулеб буго – мун вукӀина гӀемерал халкъазул эменлъун. 5Дуда цӀарги Ибрам букӀинаро, Ибрагьим#17:5 Ибрам – жугьутӀ мацӀалда, «Аврам». Гьаб цӀаралъул магӀна буго «тӀадегӀан гьавурав эмен». Ибрагьим – жугьутӀ мацӀалда, «Аврагьам». Гьелъул магӀна буго «гӀемерал халкъазул эмен». букӀина, Дица мун гӀемерал халкъазул эменлъун гьавулев вугелъул. 6Кутакалда гӀемерлъизабила Дица дур наслу: дудасан халкъал лъугьина, дур наслуялдасан ханзаби рахъина.
7Дица Дидаги дудаги ва дур рукӀинесел наслабаздаги гьоркьоб КъотӀи гьабила. Наслабаз наслабазухъе кьолеб абадияб КъотӀи букӀина гьеб: Дун вуго Аллагь – дурги дур наслабазулги Аллагь! 8Дица дуе ва дур наслабазе кьезе буго дуе гьабсагӀат чияраблъун кколеб гьаб ракь – Ханааналъул тӀолабго ракь абадияб мулклъун кьезе буго Дица дур наслабазе ва гьел Дир халкълъун рукӀине руго».
9Аллагьас Ибрагьимида абуна:
«Амма дуцаги Дир КъотӀи тӀубазабе – дуцаги дур наслабазул щибаб кьералъги тӀубазабизе ккола гьеб. 10Гьаб Дидаги дудаги ва дур наслабаздаги гьоркьоб гьабураб КъотӀи тӀубазабизелъун, нужер киналго бихьиназе суннат гьабизе ккола. 11Суннат гьабун, гӀавраталъул рагӀал къотӀе – гьеб букӀине буго Дидаги нужедаги гьоркьоб гьабураб КъотӀиялъул гӀаламатлъун.
12Нужер щивав васасе, гьавун микьабилеб къоялъ, суннат гьабизе тӀадаб буго. Гьедин гьабе киналго рачӀунел гӀелазги, дурго рокъов гьавурасе гуребги, дур хьоналдасан лъугьинчӀев, батӀияб халкъалъухъа вичун восарав лагъасеги. 13Рокъов гьавурасеги вичун восарасеги чара гьечӀого суннат гьабизе ккола. Гьедин хисулареб мугьру-гӀаламатлъун букӀина Дир абадияб КъотӀи нужер черхалда. 14Суннат гьабичӀев, ай гӀавраталъул рагӀал къотӀичӀев бихьинчи халкъалда гьоркьоса тӀагӀинавизе вуго, Дир КъотӀи гьес хвезабуралъухъ».
15Цоги гьадин абуна Аллагьас Ибрагьимида:
«Гьанжеялдаса нахъе дур лъадуда цӀар Сарай гуреб, Сара букӀине буго#17:15 Сара – гьаб цӀаралъул магӀна ккола «бика».. 16Дица гьелда баракат лъела ва гьелдасан дуе вас гьавила. Дица гьелда баракат лъела ва гьелдасан халкъал лъугьина. Гьелъул наслуялдасан халкъазул пачазаби рахъина».
17Гьебмехалъ Аллагьасда цеве кӀалагъоркье ккарав Ибрагьим жанисанго велъанхъана ва гьес пикру гьабуна: «Нусго сон барав херав чиясдасан лъимер лъугьунебищ? Ункъоялда анцӀго сон барай Сарацаги лъимер кин гьабулеб?» – ин.
18Цинги гьес Аллагьасда гьарана:
«ИсмагӀилидагӀаги Дуца баракат лъолебаниха!» – ян.
19Аллагьас абуна:
«Дур лъади Сараца гьавизе вуго дуе вас ва дуца гьесие ИсхӀакъ абун цӀарги кьезе буго. Гьесулгун ва гьесул наслабазулгун букӀине буго Дир КъотӀи – абадияб КъотӀи.
20ИсмагӀилил рахъалъ дур гьариги Дица къабул гьабуна: гьесдаги баракат лъела Дица ва, гӀемерал лъималги кьун, гьесул наслабазул къадарги цӀикӀкӀинабила. ИсмагӀилидасан вахъина халкъалъул анцӀила кӀиго цевехъан ва кӀудияб халкъалъул эменлъун лъугьина гьев.
21Амма Дирго КъотӀи Дица гьабила ИсхӀакъилгун – цо лъагӀалидасан гьабго заманалда Сараца дуе гьавизе вугев васгун».
22Ибрагьимида гьединги абун, Аллагь нахъе ана.
23Гьебго къоялъ жиндирго вас ИсмагӀилиеги, жиндасан лъугьарал киналго бихьиназеги, ричун росарал жиндирго лагъзадериеги – къавулъ ругелщинал киналго бихьиназе – суннат гьабуна Ибрагьимица. Аллагьас жинде амру гьабунщинаб тӀубазабуна гьес. 24Ибрагьимица ункъоялда анцӀила ичӀго сон бан букӀана жиндиего суннат гьабураб заманалда. 25Гьесул вас ИсмагӀилил букӀана анцӀила лъабго сон. 26ЦохӀо къоялъ суннат гьабуна Ибрагьимиеги, гьесул вас ИсмагӀилиеги, 27Ибрагьимил къавулъ гьарурал бихьиназеги, гьединго цогидал халкъазухъа ричун росарал лагъзадериеги.
Atualmente Selecionado:
Байбихьи 17: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023
