Къанун 34
34
Мусал хвел
1Цинги МогӀавалъул гӀатӀиракьалдаса Муса Нево магӀарде вилълъана ва Ерихоналда дандбитӀун бугеб Фасга мегӀералъул тӀогьиве вахана. Гьенисан БЕТӀЕРГЬАНАС Мусада бихьизабуна ГилгӀадалдаса Даналде щвезегӀан тӀолабго ракь, 2гьединго Нафталил тӀолабго ракьги, Ефраимил ва Манассил ракьалги, КӀудияб ралъдахъе гӀунтӀараб Ягьудал тӀолабго ракьги, 3Негевги, Чамасдакалъул ГъутӀбузул шагьаралдаса бахъараб ЦогӀаралде щвезегӀан тӀибитӀараб Ерихоналъул тӀолабго ракьги. 4БЕТӀЕРГЬАНАС гьесда абуна:
«Гьале Ибрагьимиеги, ИсхӀакъиеги, Якъубиеги Дун гьедараб, гьезул наслабазе кьелин Дица амру гьарураб ракь. Дица дуда гьеб бихьизе рес кьолеб буго, амма мун гьениве ине гьечӀо».
5Цинги БЕТӀЕРГЬАНАСУЛ лагъ Муса хвана, БЕТӀЕРГЬАНАС гьесда абухъе, МогӀавалъул ракьалда. 6Ва гьев МогӀавалда, Бет-Пеоралда аскӀоб бугеб расалъиялда вукъана. Амма жакъа къоялъги лъидаго лъаларо гьесул хоб бугеб бакӀ. 7Мусаца нусиялда къого сон бан букӀана, амма хвезегӀан гьесул беразул канлъиги свинчӀо чорхол рухӀ-жанги дагьлъичӀо. 8ГӀизраилил халкъалъ лъеберго къоялъ магӀу бахъана Мусада хадуб МогӀавалъул расалъиялда; Мусада хадур гӀодиялъул къоял гьедин тӀуразаруна.
9Нунил вас Егьошуаде гӀакъиллъиялъул рухӀ рещтӀана, Мусаца кверал лъун рукӀун гьесда. Ва ГӀизраилал гьесда нахъ рилълъана, Мусаца малъарабщинабги тӀубазабулеб букӀана.
10Гьелдаса нахъе Муса гӀадинав, БЕТӀЕРГЬАНАСУЛ гьумер лъалев авараг ГӀизраилалда тӀокӀалъ вахъинчӀо. 11Гьес БЕТӀЕРГЬАНАСУЛ амруялдалъун Мисриялда пиргӀавнасдаги гьесул тӀолалго чагӀаздаги рихьизарурал ва пиргӀавнасул ракьалда гьарурал гӀадинал кӀудиял хӀикмалъабиги гӀаламаталги тӀокӀалъ лъицаго гьаричӀо. 12Мусаца тӀолабго ГӀизраилил халкъалда цебе бихьизабураб кӀудияб къудратги кутакал ва хӀинкъарал мугӀжизаталги тӀокӀалъ лъицаго рихьизаричӀо.
Atualmente Selecionado:
Къанун 34: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023