Luk 16
16
Ɔkʉ wʉ awanda vɛnʉl vɛ ɔtʉmʉ wʉ acɔ iyeli
1Zisɔs avɔl vɛnʉl vɛ oyeghe nɔnʉn ala, “Ɔnʉl ɔmɔ alɛ-lɛ nɛ ɛŋgɔl. Âlɛ nɛ ɔnʉl ɔmɔ wʉ awanda ɔn ɛnalɛvɛ. Ɔva-vɔl ɔn ala acɔɔ̄ ɔn vɛnalɛvɛ. 2Asɔ ayɛla ɔn, afii ala, ‘Otu ɔmanɛ wʉ fɛna ɛnɛ mɛŋgwa kɛ ici iyuwu wee? Saŋgɛ mɛ ɔlɔl-ɔlɔl, ɔmanɛmanɛ kɛɛ wʉyel nɛ vɛnalɛvɛ yambɛvɛ, kici yɛ máma-gɔl nɛ wʉwand mɛ ɛnalɛvɛ ga.’
3“Ɔnʉl wʉ awanda ɛnalɛvɛ wɔɔ, afii ɔmɛnɛ ɔna ala, ‘Naa máyel aŋgiee? Ɔkʉ wamɛ asimē zaā mɛ kɛ ɔtʉmʉ. Mawʉ nɛ ise yɛtimena ɛyaŋɛ ga. Kɛ mɛfaalɛ, icwe ɛkɔlā mɛ ilendena.’ 4Saŋ akaŋɛ nɛ ɔmɛnɛ ɔna ala, ‘Mɛcil aŋgiee sɛ máyel nɛ vɛnʉl ɔ́gbaal mɛ kɛ atimbe avo, ɔkambɛlɛ wʉ osimi mɛ fan ɔtʉmʉ.’
5“Asɔ, ayɛla vɛnʉl vɛ ɔkɔla ɔkʉ ɔna ɛnzɔ kɛ ɔmɔɔ ɔmɔɔ. Afii wʉ isi wɔɔ ala, ‘Ɛnzɔ yɛ wʉkɔla ɔkʉnʉl wamɛ ayɛ naa?’
6“Agɔl nɔnʉn ala, ‘Vasʉmbʉ#16:6 Asʉmbʉ kɛlɛ iteghi kɛboonaghɛ kɛɛ ɔwʉmbwa mɛkulemi. vɛ mɛkule ati anyin.’
“Ɔnʉl wʉ awanda vɛnalɛvɛ wɔɔ atɛŋɛ oŋgwe wʉ ɛnzɔ, ana ɔnʉl wɔɔ, akaŋɛ ala, ‘Mɛ̂kafɛ ɛnzɔ iyuwu. Caal ɛyaŋ, nɛ wʉ́saŋgɛ fini wʉla, vasʉmbʉ ati afaalɛ.’
7“Saŋ afii wʉ ape wɔɔ ala, ‘Owe, ini ɛnɛ wʉkɔla ɔn?’
“Agɔl nɔnʉn ala, ‘Andee ayɛ ilisi ayaboona ati ataŋɛn.’
“Akaŋɛ nɔnʉn ala, ‘Mɛ̂kafɛ iyuwu kpaa. Gbaal oŋgwe wuwu wʉ ɛnzɔ, nɛ wʉ́saŋgɛ ati anyin.’
8“Masɛ sɛ âyeli ɛcɔcɔɔ asɔ kpa, ɔkʉnʉl ɔna akaŋɛ nɔnʉn ala, ‘Wʉyel ayʉmʉ ayuwu sɛ wáwand ɛyɛma iyuwu iyɛ ɛlɛ tɔ kɛ isi.’”
Zisɔs aza isi ɛkaŋana ala, “Yene, vɛnʉl vɛ fan ɔtalɛ wee ôcil ndalɛsɛ oyele ayʉmʉ kɛ nɛ vɛnʉl vɛ ɔlɛ ndalɛ vo, ofoō vɛnʉl vɛ ɔlɛ kɛ ɔyamanavɛ. 9Kɛlɛ asɔ ɛnɛ mɛvɔl anu mɛla, tɛŋɛ nini ɔwaŋgɛ wʉ nɛlɛ nɔnʉnʉ fan ɔtalɛ wee, nɛ nɛ́ya vaciam kɛ ɛmɛnɛ iyunu, ndalɛsɛ ife yɛ ɔwaŋgɛ wɔɔ ɔ́ma-lɛ ga, nɛ ɔ́gbaal anu kɛ oci wʉ ɔlɛ kpem-kpem.
10“Ɔnʉl ɔmɔnɛmɔ wʉ akɔla kɛ vɛnalɛvɛ yɛcɔɔ sɛva-sɛva, nɛ ákɔl kpaa vɛnalɛvɛ yɛboonavɛ sɛva-sɛva. Ɔmɔnɛmɔ wʉ aka-kɔl ɛnalɛvɛ yɛcɔcɔ sɛva-sɛva ga, nɛ ábɛ kpaa nɛ ákɔl yɛboonavɛ ga. 11Ikil yɛ wʉka-bɛ wʉkɔl ɔwaŋgɛ wʉ wʉkol fan ɔtalɛ wee ga, nɛ ɔnda ágɔl we kɛ ɛkɔlana ɔwaŋgɛ wʉ cɛb? 12Ikil yɛ wʉkɔl ɔwaŋgɛ wʉ ɔnʉl wudi ga, nɛ ɔnda sɛnɛ ána we owuwu ɔwaŋgɛ? 13Ɔnʉl wʉ ɔtʉmʉ awʉ wʉ ábɛ nɛ áyel ɔtʉmʉ nɛ vakʉ ɔfaalɛ ga. Ikil yɛ áyel asɔ, nɛ ácɔn wʉ ɔmɔɔ, nɛ áteŋg wudi wɔɔ, ga nɛ áza ɔtʉmʉ wʉ ɔmɔɔ nɛ ɛsɛma imem, saŋ nɛ átɛna wudi wɔɔ. Asɔ nábɛ nɛ nɛ́yel ɔtʉmʉ wʉ Ofilikpamɛ nɛ wʉ ɛŋgɔl ɔkambɛlɛ ɔmɔɔ ga.”
Zisɔs ate vɛnalɛvɛ yedivi
14Ɔkambɛlɛ wʉ vɛ Falasi ɔŋgwa sɛ Zisɔs avɔla ɛnalɛvɛ yee vimem, ohee iseena ɔn, kici yɛ ɛŋgɔl ɛlɛ-sɛva vo kaka. 15Kpa akaŋɛ navo ala, “Kɛlɛ anu ɛnɛ nɛliye anu ala, vɛnʉl oyenē anu ndalɛ vɛnʉl vɛ ɔlɛ gel-gel kɛ isi kɛɛ Ofilikpamɛ, kpa Ofilikpamɛ ocil ɔmanɛ kɛɛ alɛ kɛ asɛma ayunu. Vɛnalɛvɛ yɛ ɔnʉl atɛŋa ala vîbo, ayɛ kɛlɛ icwe kɛ isi kɛɛ Ofilikpamɛ.
16“Savɛ nɛ obe wʉ Mosis nɛ voŋgwe vɛ vɛnʉl vɛ ɔtɔwa kici yɛ Ofilikpamɛ. Vɛnʉl ôtee vo kaka za-bi ɔkambɛlɛ wʉ Zɔnɛ wʉ Abaptaisa âva. Tɛla asɔ, ɔvɔla kɛlɛ ɔtɛlɛ wʉsɛɛ wʉ Ɔtʉlʉ vɛ Ofilikpamɛ, ɔnʉl ɔmɔnɛmɔ kpaa anɔŋgā zaā gbaŋ-gbaŋ, sɛ ɔn anyɔl kini. 17Masɛ asɔ kpa, cil nini anu ala akɛ ŋgʉlaŋ wʉ ago nɛ ɛyaŋɛ íyile, nɛ wʉ ɛcɛla ɛmɔɔ ísime kɛ obe wʉ Ofilikpamɛ.
18“Ɔnʉl ɔmɔnɛmɔ wʉ akʉŋgʉsʉ okeyi ɔna saŋ ayɔs okeyi wudi, ágba kɛ ɔlaha; masɛ ɔnʉmbʉsʉ ɔmɔnɛmɔ wʉ ayɔs okeyi wʉ ɔkʉŋgʉsʉ ɔn kɛ ɛyɔsʉ, ɔn kpaa nɛ ágba kɛ ɔlaha.
Zisɔs atɛfa ɛkan yɛ ɔnʉl wʉ ɛŋgɔlʉ nɛ ɔnʉl wʉ ɛcianɛ
19“Ɔnʉl ɔmɔ wʉ ɛŋgɔlʉ alɛ-lɛ, aliŋge akʉndʉ ayatavana iseghi, ayaa ɛyɛma iyɛboona ife ɛmɔnɛmɔ. 20Ɔnʉl ɔmɔ wʉ alɛ-lende agɔla ite ala Lazalɔs. Atuŋgusu amɛla ɔn ɛyʉlʉ imem, vɛnʉl ɔva-tala ɔn fɛ oci wʉ ɔnʉl wʉ ɛŋgɔlʉ. 21Alɛ nɛ ɛsalɛ wʉ ɔn aya masɛ kɛlɛ asɛndɛ ayɛ asime gba kɛ ovo kɛɛ ɔnʉl wʉ ɛŋgɔlʉ wɔɔ. Masɛ ɛ̈wa kpaa ɛva-numwe ɔn atuŋgusu.
22“Ɔkambɛlɛ wʉ ɔnʉl wʉ ɛcianɛ wɔɔ âkwo, vɔzɛnda-gbalgbal oŋgiee za nɔnʉn kɛ oci wʉ Abɛlaham. Ɔnʉl wʉ ɛŋgɔlʉ wɔɔ kpaa, akwo, oyi. 23Kɛ oci wʉ vɛnʉl vɛ okwo ye, kɛsɛ âlɛ kɛ ɛcian, akond asi kɛ ago, ayen Abɛlaham tɛla kɔ ɛlɛmb, nɛ Lazalɔs kɛ ɛfan ɛna. 24Asɔ ayɛla Abɛlaham ala, ‘Ɛziasɛ Abɛlaham, kɔl isonu kamɛ, nɛ wʉ́tɛma Lazalɔs, nɛ ámindi isighi kɛɛ ɔnʉmʉ-avo ɔna kɛ ɛzɔl, nɛ áva-kunde mɛ ɛmɛla, kici yɛ mawʉ kɛ ɛcian yɛboona kan ogusu wee.’
25“Kpa akaŋɛ nɔnʉn ala, ‘Wanɛ wamɛ, x-wagife ga, wʉlɛ-gbaalɛ vɛnalɛvɛ yɛsɛɛ kɛ ɔkambɛlɛ wʉ wʉlɛ kɛ ɔtalɛ, kpa Lazalɔs ayaa kɛlɛ ɛcian. Kpa aŋgiee wee, ayaā kɛlɛ ɛyɛma fan, owe ɛnɛ wʉka-lɛ kɛ ɛcian yɛboona. 26Masɛ asɔ ga kpaa, ɔ̂pav ɛzwaŋ yɛboona fan atɛŋatɛŋɛ wasɛ nɛ anu, ndalɛsɛ vɛnʉl vɛ oliye vásime kan, nɛ ɔ́kalɛ kɔ, nɛ ɔ́bɛ ga, nɛ ndalɛsɛ anu kɔ kpaa nábɛ nɛ́kalɛ va iyikan nɛ asu ga.’
27“Agɔl ala, ‘Ikil yɛ kalɛ asɔ, ɛziasɛ, mɛkɔl uno nawe, kpɛnɛ-tɛma Lazalɔs kɛ itimbe iyɛ ɛziavɛ wamɛ, 28kici yɛ mawʉ nɛ ɔvɔnɛŋgwanɛ ɔtaŋɛn vɛ ɔcaa fini. Nɛ ãza-na vo acɛ, ndalɛsɛ ɔmɔ vo áka-va fan oci wʉ ɛcian yɛcɔcɔ yee ga.’
29“Kpa Abɛlaham akaŋɛ nɔnʉn ala, ‘Avɛ nɛ voŋgwe vɛ Mosis nɛ voŋgwe vɛ vɛnʉl vɛ ɔtɔwa kici yɛ Ofilikpamɛ ɔlɛ-saŋgɛ. Ɔvɔnɛŋgwanɛ vumbuvu õyele vɛnalɛvɛ yɛ ɔsaŋgɛ kini.’
30“Atɛna. Akaŋɛ nɛ Abɛlaham ala, ‘Cioow! Ɛziasɛ Abɛlaham, ikil yɛ ɔnʉl wʉ akwo ye, ɛnɛ aza-vɔl vo, nɛ ɔ́sɛɛl ɛcɔcɔɔ ivo.’
31“Abɛlaham akaŋɛ nɔnʉn ala, ‘Ikil yɛ ɔtambɛlɛ kɛ vɛnalɛvɛ yɛ Mosis nɛ vɛnʉl vɛ ɔtɔwa kici yɛ Ofilikpamɛ ɔ̂saŋgɛ, ɛnɛ ɔka-sɛɛl ɛcɔcɔɔ ivo ga, masɛ ɔnʉl wʉ akwo ye saŋ alil, ávɔl vo kpaa, nɛ ɔmɔ vo áyavɛlɛ ga.’”
Atualmente Selecionado:
Luk 16: Iceve-Maci
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©️2024 Luke Initiative for Scripture Translation
