Matius 25
25
Hwiyavivak eneyave 10 wakhegek yugeragagi wene
1Wene ambi inim yugirigya dugwit, “An wagya dogomindik, At mbogot vaga menda avema bisaup ako andi, hwiyavivak eneyave 10 enelambu yevedek hedelok ap ogwa hedayogon ako wagyaim, abimanggok wunggugwa ako ovagak. 2It hwiyavivak abi manggok wunggugwa ako andi, eneyave 5 enendawi dek, eke, eneyave 5 enendawi werek atma, 3it hwiyavivak enendawi dek akoen enelambu owak minyak nudik wolok lagagwa ovara, dek agya halok nokhedamunda ambi wolok lagetek. 4Eke, it enendawi werek akoen andi, enelambu owak vaga minyak nokhidugu lagagwarik, dek agya halok nokhedamunda inim hedelok wunggugwa. 5Wunggu lagagwarik, ap hwa hedayogon ako ao wagetek ipimbo agya lagagimu, it hwiyavivak ako, nogo inil oginipu lagagimu, it ovok erogo nogo yogogwa.”
6“Eke, o hup nogo agako napedek-hapedek agagirikmu, ap ambien ane ombok vaga iri dugwit, ‘Ap hwa hedayogon ako wandiga yi atma, hodo abi manggok omanes.’
7“Iri lagagimu, it hwiyavivak ako ovok erogo iniluk agu lagagwarik, enelambu ageda ako sek okhidugu dugwit, 8it enendawi dek menda akoen it enendawi werek menda yugurugu dugwit, ‘Nenelambu minyak ako vage dek agya dugwit, nagaup irisim, hit henaminyak ambi wokneranes.’
9“Yugurugu lagagwama, it hwiyavivak enendawi werek menda akoen, ‘A, anderogo dek. Nin higirogo hit wokhirugwi, nin higirogo nit hidugwi, ogarusogom halok andi, nit ogo dek agya haoen, hiren it onggo hunisagwima akoma, enadoma hunhedelales.’
10‘Yugurugu lagagwama, hunheda lagusigik, at hwa hedayogon ako wagya lagagirik, it dikduk ogagagwa ako inim isogo isago naguluk, umwa nunggugu lagagwarik, sup lakbagagi.”
11“Sup lakbaluk werekma, it hwiyavivak enendawi dek ako wagu lagagwarik, ‘Ai, nenasin. Sup hutninisin,’ yugu lagagwama, 12at hwa hedayogon akoen it yugirigya dugwit, ‘Hit saniva! Hit andi an ninggut avyarat yukheraliga,’ yugeragagi o,” yiluk, At Yesus en At ane welagwi menda ako yugeragagi.
13Yugirigya lagagirik, At Yesus en, “O ngga vaga warup inim, mo il maren vaga warup inim, ako hit hinunggut atma, henendawi suam watu dogones o,” yiluk, yugeragagi.
Ap ambi ayelomani eneyave 3 en ogagagwa wakhegek yugeragagi wene
(Lukas 19:11-27)
14At Yesus en wene ambi inim yugirigya dugwit, “An warisogon ako andi, ap ambi o hunogoma lagiluk ogagya dugwit, at ayelomani yanggup yugirigya lagagimu, wagu lagagwama, at angge-angge vagago dogopwak yiluk, ininggimu bogogi ako ovagak. 15It ogagu dogop enandogon yedok inugu lagagirik, ap ambi yoparip mbusi emas yum yedogo 5 inggimu bagya, ap ambi yoparip mbusi emas yum yedogo mberen inggimu bagya, eke, ap ambi yoparip mbusi emas yum yedogo ambiat inggimu bagya, ogagya lagagirik, o hunogoma lagagi. 16Lagya hegek, at yoparip mbusi emas yum yedogo 5 inggimu bagagi akoen yi menda ndi menda hunit nagu dugwit, ako vaga yoparip mbusi emas yum yedogo 5 inim lombabagagi. 17Eke, at yoparip mbusi emas yum yedogo mberen inggimu bagagi akoen anderogoat yoparip mbusi emas yum yedogo mberen inim lombabagagi. 18Eke, at yoparip mbusi emas yum yedogo ambiat inggimu bagagi akoen andi, amwa lagya lagagirik, wen bavulogo asin ayoparip ako hwilak baluk welagagi.”
19“Okbaluk, enasin ako abu erogo welagagirik, eyami vaga wagya lagagirik, ‘Nayoparip ako vaga it maren lombabenanggao hami?’ yiluk, yanggup yugirigya lagagimu, 20at yoparip mbusi emas yum yedogo 5 inggimu bagagi akoen yoparip mbusi emas yum yedogo 5 lombabagagi ako inim wolok wagya lagagirik, ‘Nasin wa. Haren endak mbusi emas yum yedogo 5 ninggimu bagagin ako, yokhanen. Anen hivis mbusi emas yum yedogo 5 ambi inim lombabagi yi o.’
21“Yugugu lagagimu, asin akoen, ‘Nabut wa. Hat nayeloman des erogo sek adigat ogasiga menda yi, mondok segat ogagen. Ambukumat vagago dugwit des erogo ogagen atma, yi menda ndi menda wisane vagago dogonyok yiluk, hinggimu bayogon. An hasin nadenggen haliga andi niperen ndatak higya dogonyok yiluk, oma.’
22Yugugu lagagimu, at yoparip mbusi emas yum yedogo mberen inggimu bagagi ako asin adema wagya lagagirik, ‘Nasin wa. Haren endak mbusi emas yum yedogo mberen ninggimu baninggigin ako, yokhanen. Anen hivis mbusi emas yum yedogo mberen inim lombabagi yi o.’
23“Yugugu lagagimu, asin akoen, ‘Nabut wa. Hat nayeloman des erogo sek adigat ogasiga menda yi, mondok segat ogagen. Ambukumat vagago dugwit des erogo ogagen atma, yi menda ndi menda wisane vagago dogonyok yiluk, hinggimu bayogon. An hasin nadenggen haliga andi niperen ndatak higya dogonyok yiluk, oma.’
24“Yugugu lagagimu, at yoparip mbusi emas yum yedogo ambiat inggimu bagagi ako wagya lagagirik, ‘Nasin wa. Hendawi anye dugwit, hat awi yakhedegetek ovara, enggen mbalhidigya, eke, enggen lisinggitek ovara, wonggalhidigya, ogasiga andi nilup atma, 25nalon en lagya lagagirik, hayoparip mbusi emas yum yedogo ambiat ninggimu bagagin ako wen bavulogo hwilakbaluk welagagirikmu, hayoparip wolok wagi yi hedoman.’
26“Yugugu lagagimu, asin akoen, ‘Hat nayeloman yavup ogarup hanggon imbita dugwit, weyak adigat ogasiga menda yi, an awi yakhedegetek ovara, enggen mbalhidigya, eke, enggen lisinggitek ovara, wonggalhidigya, ogasiga andi hilup atma, 27an wagya neyalok, nayoparip inim, vagago dogomi onggo inim, wa warigen, it avakwa enayoparip ombok arupwak yiluk ogasagwi menda wogeraup sek ovara, wogeregetek welagen.’
28“Yugugu lagagirik, aori yugirigya dugwit, ‘Ap yi, anderogo ogagarikmu, yoparip mbusi emas ambiat ako at inggimu en wokbaluk, at yoparip mbusi emas 10 hedagagi ako wogeres. 29Saen ambi agarik halok, ambi inim ovaga hondalogo wogeramindikmu, wisane-at arisogon o. Eke, saen ambi dek halok, ambukumat vagago agarik akoat haurogo hidigya hagup. 30An nayeloman sek ogarup ova nggabelekdek yi, eyave weram o hwiserekma yup yagwi, idup en wakhidugwi, ogasagwima andoma wiba wilitales,’ yugeragagi o,” yiluk, Yesus en At ane welagwi menda ako yugeragagi.
O hivis avakwa enowak dilinivup wene
31At Yesus en wene ambi inim yugirigya dugwit, “An Ap-At Endaklagagis nabinak werek niri-novagangge dikduk-dakduk okhedelok, it malaikat ovok erogo ninim wagya dogogurik, An wene yugeraligama nabinak vaga hora yisogon. 32Horaik neyagek, it malaikat akoen avakwa ininis unggul adik-adik An nadema homakbugu dogogupik, ap wam ndomba enasin en kambin-ndomba adik-adik enogo bisaliga hak, An anderogoat enogo bisagwis. 33Enogo bugu dugwit, it wam ndomba menda halok andi, ninggis amotkan bugu, eke, wam kambin menda halok andi, ninggis hwarenggan bugu, ogarugwis o.”
34-36“Ogagya dogogurik, An neve ninis ombok akoen, it avakwa ninggis amotkan bisagwis ako yugirigya dugwit, ‘An Nasin adenggen henovaga bigigirikmu agipik o. An erom uvup werekma, hiren erom woknugwis, is uvup werekma, is woknugwis, ap huru werekma, woknitwis, nasum yirikdek werekma, yum yikbanunggwi, aup warek werekma, bikneya wagwi, An heda mago werekma, hit nadoma wagwi, ogagu lagagup. Anderogo atma, An Nasin en o mbogot wen ao wakhegetek hegek, hit hininis werek ombok dogovovok yiluk, mavorangge hak bigigis ako wane-wane, hit mondok siyalek dogovovok yiluk, omanes.’
37-39“Yugirigya dogogwimu, it enendawi sek adigat menda akoen an yuknugu dugwit, ‘Ai, Nenasin. Hat erom uvup werekma, erom wokhugwis, is uvup werekma, is wokhugwis, ap huru werekma, wokhitwis, hasum yirikdek werekma, hasum yikbagagwi, eke, Hat aup warek, heda mago werekma, bikheya lagwi, ogagu lagagup yukneregen ako, o mera okhitugurikmu, yukneraliga?’
40“Iren, yuknugu dogogupmu, An neve ninis ombok akoen it ako yugirigya dugwit, ‘Dek o. Hiren An naori maridugi ininis dek sovalek menda oginipugup ako andi, Anat okbanunggugup o, yiluk, avyarat yukheraliga,’ yugeragwis.”
41-43“Yugirigya dogogurik, andi okbaluk, it ninggis hwarenggan bisayogon ako yugirigya dugwit, ‘Hit Ala en vudilogo bigigas yi, An erom uvup werekma, erom woknigitek, is uvup werekma, is woknigitek, ap huru werekma, woknetetek, nasum yirik dek werekma, nasum yikbanenggetek, aup warek, heda mago werekma, bikneya lagatek, anderogo okbanunggu lagagupuk atma, yoma en wunggu dogomundik, at Sile aori ovok erogo inim, hali abya wuluk-herek adigat yagaligama andoma An Nasin en it dogopim ogarogo bogogirikmu akoma-at elales,’ yiluk, yugeragwis.”
44“Yugirigya dogogwimu, iren An yuknugu dugwit, ‘Ai, Nenasin. Hat erom uvup, is uvup, ap huru, hasum yirik dek, aup warek, heda mago welagagin ako, o mera ninil heyagu lagagurik, yonggat-heyagetek hekbagagurikmu yukneraliga?’
45“Yuknugu dogogupmu, Anen it yugirigya dugwit, ‘Dek o. Hiren it ap maridugi ininis dek sovalek menda yi, anderogo oginipitek welagagup ako, Anat okbanenggetek welagagup o,’ yiluk, 46yugirigya dogogurik, it ap ako, weyak ogasagwi onggo mondok-mondok yagan watu dogopwak yiluk, lakbisagwis ovara, it enendawi sek adigat menda ako halok andi, iniluk mondok-mondok dogopwak yiluk, okbisagwis o, yiluk, yugeragwis,” yugeragagi.
Atualmente Selecionado:
Matius 25: nbq2013
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
