Matius 18
18
“Ap ombok dogop andi, sa ombasiga?” yugogogwa wene
(Markus 9:33-37; Lukas 9:46-48)
1O andi vaga At Yesus ane welagwi menda akoen At adema wagu lagagwarik, yugugu dugwit, “At mbogot vaga menda avema bisaligama ako, ap eve ombok dogop andi sa ombasiga?”
2Yugugu lagagwama, At Yesus en avyak maduk ambi eyanggup iri lagagirik, ari wagya lagagimu, enanggelekma mondok okbaluk, it yugirigya dugwit, 3“Hit ap yi, henendawi weyak an iya ombasagwi andi, degerogo baluk, avyak maduk yi wane-wane arusogombuk halok, At mbogot vaga menda avema bisaligama andoma mondok nunggusogombuk, yiluk, avyarat yukheraliga. 4Ap ambi saen avyak yi endawi ovagak sovabitigya halok andi, At mbogot vaga menda avema bisaligama andoma mondok eve ombogat dogosogon. 5Eke, ap ambi en, An ninis vaga avyak maduk yerogo menda ambi wigya halok andi, Anat wokneraliga o,” yiluk, yugeragagi.
Weyak ogarup okhinipu halok ogagu dogop wene
(Markus 9:42-48; Lukas 17:1-2)
6Wene ambi inim yugirigya dugwit, “Ap ambi saen avyak maridugi enendawi An novaga vanggabaluk avyarat nombasagwi yi, weyak ogarupwak yiluk, enendawi nomalinivisagwi vaga weyak ogaguselok andi, helep ombok gandum yanggalisagwi menda vaga ap andi avup heda yidibaluk, inamut yanggadek agurukmu beyakha nunggulipmu en, sek aro. 7It avakwa wen vaga menda yoma en, it nin weyak ogarupwak yiluk oginivisagwi atma, anggin enovaga arugup! Weyak ogarup okhinivisiga ako andi, mondok agarik ovara, it ap en hit weyak ogarupwak yiluk okhinipuselok andi, anggin enovaga arugup!”
8“Hininggis-hinisok vaga en weyak ogarup okhinipu halok, venak mbalogo lakbas. Hininggis-hinisok mberen werek hegek, hali abya wuluk-herek adigat yagaligama akoma mbo lakbigigaup andi weyak. Ata, mbalogo lakbaluk, hininggis a, hinisok a, venak adigat hegek mondok iniluk oginivisigama andoma nunggup halok andi, sek. 9Hinil venak vikit weyak ogarup okhinipu halok, hulirogo baluk mbo hanes. Hinil mberen hegek, hali abya wuluk-herek adigat yagaligama mbo lakbigigaup andi weyak. Ata, hinil venak ambi dek okbaluk, venak adigat iniluk oginivisigama nunggup halok andi sek,” yiluk, yugeragagi.
Ndomba yelemele yagagi wene
(Lukas 15:3-7)
10Yugirigya lagagirik, ambi inim yugirigya dugwit, “It avyak maridugi inadigetap enomalaikat agarwik akoen An Nasin mbogot vaga menda adema mondok-mondok vagalogo yugisagwi atma, hiren avyak maridugi yi, meyan henanggon inimbutu hinisaoen, henendawi dibagu dogones. [11An Ap-At Endaklagagis yi, it avakwa yelemele yagagwa ako havedogo enagap wendarigiluk, wambu wagagis o.”]
12“Hit nggarogo ombasagwi? Ap ambi anggom ndomba eneyave 100 werekma, ambiat yelemele iri halok, ndomba nin eneyave 99 ako, ndom vaga ludak angga nenggek nagusigik, ambiat yelemele yagas ako, belalit layogonbuk ombasagwi? Dek. Belalit layogon-at. 13Eke, havekhidigya halok andi, ndomba eneyave 99 yelemele yegetek ako vaga endawi adenggen horogat imbita dugwit, ambiat yelemele yagas ako havekhedayogon vaga endawi adenggen wisane ombasiga o, yiluk, yukheraliga. 14Anderogo wane-wane Henasin mbogot vaga menda endawi imbita dugwit it avyak mariduk yi andi, ambiat ogo yelemele yup mondok anggon ombasiga o,” yiluk, yugeragagi.
Henaswe ambien weyak ogagya halok ogagu dogop wene
15Yugirigya lagagirik, ambi inim yugirigya dugwit, “Henaswe ambien weyak okbigigas halok, adema lagu dogomundik, ‘Hat weyak okbanenggen,’ yiluk, hinim henadik henane at yugurup sek. Eke, wene yugirisogon ako aruk des erogo hobaluk, ‘An weyak okbagagi,’ iri halok andi henaswe hinim ogorek welagep ako, hinim dambulik segat dogosogom. 16#Ulangan 19:15 yokhanes. Eke, aren ‘An weyak ogagi o,’ yiluk, aruk hunggitek adigat halok, Ala wene endak dirup warek ambi, ‘Anggin wene ap enovaga bisayogon halok, ap nin mberen a, henggam a, ogagya hagagwa menda enaruk holek inigik yuguguselok, “Avyarat,” yiluk, ombasagwi,’ dirup warek ako wane-wane, ap ambi a, mberen a, woginiviluk, hinim yugurilalo. 17Eke, it ap andi, hinim ogo yugurusogom ovara aruk des erogo hunggitek halok, it Ala aburi ovok erogo wonggabaluk yugurupwak yiluk, yugerano. Eke, Ala aburi wonggabaluk yugurumwi ako ogo enane aruk hunggitek adigat halok andi, at ap Ala avyarat embetetek menda a, ata, ap weyak pemerintah enake yoparip wonggalisagwi menda ako ovagak a, yiluk, hekbiseno,” yugeragagi.
“Ogarup sek a, moga a?” yugeragagi wene
18Wene ambi inim yugirigya dugwit, “Hiren wen vaga yoma, ‘Ogarup moga,’ yugu hiniselok andi, mbogot vaga ogo ‘Ogarup moga,’ iri hagup. Eke, hiren wen vaga yoma, ‘Ogarup sek,’ yugu hiniselok andi, mbogot vaga ogo ‘Ogarup sek,’ iri hagup, yiluk, avyarat yukheraliga.”
19-20“Eke, ambi yi yukherayogon. Ap mberen a, henggam a, ‘Nit Yesus ane welagwi menda aro,’ yiluk, wongganggu hiniselok, An henanggelekma andenam ninim dogosogom atma, hit o wen vaga yoma henaswe hiperen henendawi ambiat akluk, ‘Anderogo okbininin o,’ yiluk, Ala nggino yugugu hiniselok, An Nasin mbogot vaga menda en okbigigu hagup,” yiluk, yugeragagi.
Weyak okbininelagwi ako ninunggut erogo baup wene
21Yugirigya lagagimu, at Peterus en Yesus adema wagya lagagirik, yugugu dugwit, “Nasin wai. An naswe ambien elap maren vaga weyak okbaninggya halok, anen at weyak okbenanggas ninggut erogo baup ako, elap 7 hudi a, ata maren hudi degerogo baup?”
22Yugugu lagagimu, Yesus en, “Elap 7 hudi adigat dek. Ata, ininggis wisane nggarogo dinggilubuk erek, avakwa eneyave 70 hudi ininggis 7 vaga dinggilari wagya halok, anderogo ogo weyak okbagaguselok, hinggut erogo bagya dogonyok yiluk, yukhisiga.”
23“Anderogo atma, At mbogot vaga menda avema bisaligama ako andi, yerogo: Ap inis ombok ambi ayelomani ayoparip wogeragagi ako avoloma, ‘Woknirupwak,’ yiluk, yanggup yugeragagi ako hak. 24Yanggup yugeragagi ako, ambi endak wolok adema wagya lagagimu, ‘Nayoparip wisane ratusan kilogram emas mbalegangge wokhogogis ako avoloma wokniru,’ yugogogi ovara, 25ayoparip wogirup meyanat agya lagagimu, ap ombok akoen aori yugirigya dugwit, ‘Ap yi at eyave inim, abur-ogwa inim, angge-angge inim, ovok erogo avakwa hunhedapwak yiluk, wogorugu dogomundik, onggo yoparip wokherasogom ako, an nayoparip wogogogis avoloma anat woknirimano.’
26“Yugirigya ako at ayeloman aruk hunggu lagagirik, ap ako avema seve yiluk agayuk wutu dugwit, ‘Ai, nasin o. Ao en nayoparip werek agya halok ovok erogo avoloma wokhisogon atma, hendawi sagain akluk mbup iru o.’ 27Yugugu lagagimu, asin ap ombok akoen at ayeloman ako endawi abwa ombok erogo higya dugwit, ‘Mbalegangge avoloma woknirup ako asugen, degerogo bagaliga,’ yiluk, hekbagagi.”
28“Hekbagagi ovara, ayeloman ako weram wunggu lagagirik, aswe ambi at mbalegangge yoparip horogat un 100 denari #18:28: Denari andi, yavup satu hari onggo wogerelagwi ako ndatak. wogogogi ako higya lagagirik, inggis vaga adonggop honak watya dugwit, ‘Nayoparip mbalegangge wokhigigis ako avoloma wokniru.’ Ap ako ane anye vaga yugugu lagagimu, 29at aswe akoen avema seve yiluk, yugugu dugwit, ‘Ai. Nayoparip werek agya halok ovok erogo wokhisogon atma, hendawi sagain akluk mbup iru.’
30“Yugogogi ovara, ap akoen, ‘Dek! Nayoparip mbalegangge avoloma ao woknigitek heyagek, hat heda marogo lembaga dogwen,’ yiluk, heda marogo lembaga mabagagi. 31Heda marogo lembaga mabagagwa ako, aswei ninen inil hugu lagagwarik, enendawi mondok weyak agu dugwit, ap ogagagi ako enasin ap ombok mbilinogo yuguri lagagwa.”
32“Yuguri lagu lagagwama, enasin akoen ayeloman mbalegangge ombok welagagi ako eyanggup iri halok wagya lagagimu, yugugu dugwit, ‘Hat ap weyak adigat ogasiga menda yi, hane anye erogo yuknigin vaga mbalegangge woknirup ako, habwa en hekbagagi ovara, 33anen hat habwa imbiti akorogo, haswe abwa imbitibuk andi, nggarogo yiluk ogagen?’ 34Mberugu dugwit, ‘Nayoparip avoloma ao woknigitek heyagek, heda marogo idup-eda okbagagu dogopwak,’ yiluk, aninis en it lembaga malenombogo agarwik menda ako wogeragagi o,” yiluk, Yesus en Peterus yugogogi.
35Yugugu lagagirik, “Anderogo wane-wane, hit henaswemuni weyak okhinivisagwi ako, hit henadigetap avyarat henendawi enggen vaga en hinunggut erogo okbigitek hiniselok, An Nasin mbogot vaga menda en hit anderogoat okhinivisogon o,” yiluk, yugeragagi.
Atualmente Selecionado:
Matius 18: nbq2013
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
