Mateus 4

Yeesus kept uf proope kextelt

Markus 1.12-13; Lukas 4.1-13

1Tan hot te Hayliche Kayst Yeesus pis an te tesërt kenom fer fom taywel uf proop kextelt kewe. 2Un, noo fërtsich taache un fërtsich nachte oone etwas ese, hot Yeesus hunger kehat. 3Tan, is te taywel ticht pay em khom un saat:

— Wëns tuu Kotes Soon pist, xik ti xteen sich in proot ferënere.

4Yeesus antwort:

— Ti Hayliche Xrifte saan:

“Te mënx leept net ploos fon proot

awer leept fon yeete wort woo Hërkot saat.”

5Klaych tëm noo, hot te taywel Yeesus pis Yeruusalëm, ti Haylich Xtat, kenom un hot em uf tas heechste plats fom Thëmpel kextelt. 6Tan saat er:

— Wëns tuu Hërkots Soon pist, xmays tich too runer, wayl ti Hayliche Xrifte saan:

“Hërkot xikt sayn ëngle tich uf pase.

Tii tuun tich fest hale mit sayn hënt,

tas net mool tayn fiis wee kemach kewe an te xteen.”

7Yeesus antwort:

— Awer ti Hayliche Xrifte saan aach: “Tuu net te Hër, tayne Kot, in proop xtele.”

8Am ën, hot te taywel Yeesus uf en aariche hooche përich kenom, hot tëm ti kanse rayche fon te welt ketsaycht un tëne sayn macht 9un saat:

— Ich kewe tich tas ales wëns tuu tich foer mich kniye tuust un mich aan peete tuust.

10Yeesus antwort:

— Kee wech, Satanaas! Ti Hayliche Xrifte saan:

— “Peet te Hër, tayne Hërkot, aan

un tiin sonst nimant.”

11Tan is te taywel wech kang, un ti ëngle sin khom fer Yeesus se fersoriche.

Yeesus fangt sayn aarwat aan in Kalilëya

Markus 1.14-15; Lukas 4.14-15

12Wii Yeesus se wise kriit hot tas Yohan in ti katee khom weyer, is er noo ti rechioon fon Kalilëya kang. 13Is nët in Nasaree keplip, awer is in ti xtat Kafarnaum woone kang, am rant fom Kalilëya lakoo, in te keechënt fon Sepulon un Naftalii. 14Tas is paseyert fer sich in se hale was te profët Isaiias kesaat hat:

15“Lant fon Sepulon un lant fon Naftalii, in te richtung fom meer, an te aner sayt fom Jortan flus, Kalilëya, woo ti pakaane woone!

16Tas folek woo in te tunkelheet leept wërt en xtarek licht siin! Un tas licht wërt laychte iwich tii woo in te tunkel rechioon fom toot leewe!”

17Fon too an foran hot Yeesus aan kefang sayn mensaaj ann se saan. Eyer saat:

— Royert aych fon ayre sinte, wayl te Hërkots Raych is xon ticht.

Yeesus ruuft fier fixer

Markus 1.16-20; Lukas 5.1-11

18Yeesus waar langst te rant fom Kalilëya lakoo am keen wii eyer tswaay priiter woo fixer waare kesiin hot: Simon, aach Pheeter kenënt, un Antrëas. Tii waare uf em see, am fixe mit netse. 19Yeesus saat tëne:

— Khomt mit mich, ich tuun aych lërne mënxe fixe.

20Tan hon se sayn nëtse laye kelos un sin mit Yeesus kang.

21Un pisye wayter, hot Yeesus anere tswaay priiter kesiin, Tiaako un Yohann, Sepeteu sayn puuwe. Tii waare mit sayne fater uf em poot, ti nëtse am flike. Yeesus hot ti tswaay keruuf 22un, im selwiche momënt, hon se sayne fater un te poot tsurik kelos un sin mit tëm kang.

Yeesus untericht un heelt fiil layt

Lukas 6.17-19

23Yeesus is torich ti kans Kalilëya kang, in te sinakooke am unterichte, ti kuute naychkheete fom Raych am aan saan un ti laytunge un xlime krankheete fom folek am heele. 24Ti naychkheete iwich Yeesus hon sich in te kans rechioon ferprayt, sokaar in Siiria. Tesweche hot tas folek layt mit ferxiitne krankheete un ale sorte layte pis an Yeesus keprung, soo wii epilëptiker, kelaamte un pesetste fon temoone; un eyer hot se al keheelt. 25Kroose krupe fom folek sin em imer noo kang: waare layt fon Kalilëya, fon te Tseen Xtët, fon Yeruusalëm, fon Yutëya un fon te rechioone uf te Eest sayt fon Yortan flus.

Atualmente Selecionado:

Mateus 4: NTHunsrik

Destaque

Copiar