Mata 3

Yohana ba ge kee nda baptem, temeya ge Dok ne

Mrk 1.2-8; Luk 3.1-20

1Del ma guwa̰ bergete, Yohana ba ge kee nda baptem zuɗ-ɗa zum, ka oy fare ge babur pul ge Jude ne go. 2Ka janna go: Sok ge Dok kee muluk mbyaɗɗa go, ḛ seŋe ta se, ḛ ho fareba ge Fare ge Kwaɗa ta. 3A ne sḛ ge ndu ge zwagre Dok wa Ezay ka faa ne fare ne, sok ge ka janna go:

«Ano, a ka̰a̰l ge ndu ge oy no ge babur pul go nee ne, jan go:

Ḛ ca vin̰a ge Bagezok pe,

Ḛ haa vin̰a ma temel ge ne pe me.»#Eza 40.3.

4Yohana sḛ kaa ge ba̰a̰ ge àa kê ne ge jambal ge jujul zi susu ge na ta, kaɗ ge hoo dab vwalla ge na pul go me. Ka wal tene ge tere mage daram nùm ge ful zige ma. 5Nda ge kaa ge Jerusalem diŋ ma, ge suwa ge Jude ne go ma peɗ, ge mangaɗam Urdun wa go ma peɗ me, àa ka mbo ya ge ne ta. 6Ne sḛ ka kee num baptem ge mangaɗam Urdun se, guwa̰ ge àa ka jan maa sone ma zum go.

7Sok ge Yohana kuwa go Farisi mage Saduki ma ka mbo ya gḛḛ ge na ta kee baptem, jan num go: Rusu ge dḭḭ ta ge gole go ma, a huɗi hate ḛ chiya twam ge Dok ne ge mbo no ya voo ne de? 8Ḛ mbo mboya ge jwab ge ngay go, ḛ seŋe ta ja se ge ḛ kaŋ keeya ge sone ma go. 9Ne kaa ge ḛ duwa ge ḛ pagal zì go, Abraham daa ḛ baŋ ne kade to. Ago mbi jan ḛ ne no, koo ge njal mbe ge ḛ kuwa num no ma ta, Dok ge pool seŋe num Abraham baŋ ma. 10Ḛ kuwa go sariya ge Dok ne ndaa ja zì guwa dinna ge cay ee ya ee zoo ge ɔwara ma pe go go, ɔwara ge diige peɗ ge tol ndwa ge kwaɗa to ma, àa chal ne gezi, àa dol ne ge ol zì. 11Mbi, mbi kee ḛ baptem mam se ge ee ḛ seŋe ta ya se ge ɓul mɔɗwag pe, ɗaŋɗe, ndu ge mbo no ge mbi guwa̰ ya, a pool gḛḛ waɗe mbi. Mbi be mbyaɗ ndage ne tyako ma ge ne ko zì to. Ne sḛ mbo kee ḛ baptem ge On̰om ge Harcal mage ol. 12A ge ta̰a̰l in̰ale swa ge na tok go, mbo in̰ale na swa gezi mɔɗwag, gisi mboo mbo kan ne ge ol ge piri to zì yà, ɗaŋɗe, kwate na swa ndwa ge hal se.

Yohana kee Zeso baptem

Mrk 1.9-11; Luk 3.21-22; Yoh 1.32-34

13Ge dwam a̰me go ɗu, Zeso ɗege ge suwa ge Galile ne go, mbo ya ge Yohana ta mangaɗam Urdun wa go, ndwa go ne ke na baptem. 14Ɗaŋɗe, Yohana vin ne to, jan ne go: Mbi ɓyare zoo go mo ke mbi baptem ne. Mo sḛ gwan mbo ya ge mbi ta ne de! 15Zeso gwan ge ne janna go, vḭḭ go, ano mbe no, ne kee ge sego, ago sok keeya go mbe go, nè huy kaŋ ge Dok ɓyare ge nè ta ma wa. Ge sok mbe go, Yohana vin kee ne baptem. 16Sok ge num tok aa ge baptem keeya mbe go gaw, Zeso ndee ge mam se ya digi, kuwa pḭḭ ma hageya gezi, On̰om ge Dok ne siri ya se dinna ge maale go, mbo ya kaɗ ge ne pagal. 17Ḛ kuwa, nda za̰a̰ ka̰a̰l a̰me faa fare mbe ma no ge pḭḭ ma zì ya go: Mo mbi Van ne, mbi laa wa̰a̰ mo gḛḛ, mbi sḛ kee tii gḛḛ ge mo pe.

Atualmente Selecionado:

Mata 3: kiaGRB

Destaque

Copiar