ମାତିସ୍ 4
4
ଶାଏତାନ୍ ଯୀଶୁସିନ୍ ବିଡ଼୍ଚେ ଏରାଲିଦ୍
(ମାର୍କୁସ୍ ୧:୧୨-୧୩; ଲୁକାସ୍ ୪:୧-୧୩)
1ଆନ୍ତିନ୍ ଯୀଶୁସ୍ ପାବିତାର୍ ଆତ୍ମାତି ଭାର୍ପୁର୍ ମାନିକିରି ଯାର୍ଦାନ୍ ଯୋଡ଼ୁନ୍ତି କିର୍ରିୟାସ୍। ହତ୍କବାକେନ୍ ଆତ୍ମାଦ୍ ଯୀଶୁସିନ୍ ଶୁନ୍ଶାନ୍ ଆଡ୍ଡାଗେ ଅଚ୍ଚାକେରା, ଏନ୍ଦେର୍ଗେକା ଶାଏତାନ୍ଦ୍ ଆସିନ୍ ବିଡ଼୍ଚେ ଏରିୟାଦ୍। 2ଆରୁ ଆସ୍ ଉଲ୍ଲାନ୍ ମାଁହାନ୍ ଚାଲିଶ୍ ଦିନ୍ତକ୍, ଏନ୍ଦେର୍ହି ମାଲ୍ଲା ଅନୁସ୍ ମହୁଁସ୍, ଆରୁ ଇଦ୍ଘି ପାଛ୍ଲି ଆସ୍କେ କିଡ଼ା ଲାଗ୍ଗିୟାଦ୍। 3ଆଙ୍ଗେନ୍ ଶାଏତାନ୍ ଆସ୍କି ଚାହାଗେ ବାରିକିରି ତେଙ୍ଗିୟାଦ୍, “ଯଦି ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ, ହାଲେ ହୁକୁମ୍ ଚିଆ କା ଇ ଚାଁଚାଦ୍ ଆସ୍ମା ମାନକୋ।” 4ଲେକିନ୍ ଯୀଶୁସ୍ ଯାବାବ୍ ଚିଚ୍ଚାସ୍: “ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍ କା, ‘ଆଲାର୍ ଆସ୍ମାତି ଖାଲି ମା ଉଜ୍ଜନାଏ, ଲେକିନ୍ ପାର୍ମେଶ୍ଵାର୍ସ୍କି ଥୁମ୍ଣାନ୍ତି ଉର୍କା ଅଣ୍ଟା-ଅଣ୍ଟା ବଚନ୍ତି ଉଜ୍ଜନାଏ।’”
5ଆନ୍ତିନ୍ ଶାଏତାନ୍ଦ୍ ଯୀଶୁସିନ୍ ପାବିତାର୍ ସହର୍ ଯେରୁଶାଲେମ୍ଗେ ଅଚ୍ଚା କେରାଦ୍ ଆରୁ ମନ୍ଦିର୍ତା ଛାତ୍ ମିଆଁ ଇଲ୍ତିକିରି ତେଙ୍ଗିୟାଦ୍, 6“ଯଦି ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ, ହାଲେ ଇସ୍ତି କିୟାଁ ଡେଗାଚା; ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍: ‘ଆସ୍ ନିଙ୍ଘା ବାରେନୁ ତାଙ୍ଘା ଦୂଁତ୍ଜାମାରିନ୍ ହୁକୁମ୍ ଚିୟସ୍ କା, ନିଙ୍ଘା ହେଡ୍ଡୁ ଚାଁଚାତି ଚୋଟ୍ ମା ଲାଗ୍ଗବୁଲି ଆବ୍ଡ଼ାର୍ ନିଙ୍ଗାନ୍ ହେଖ୍ଖାତି ପାଣ୍ସର୍।’” 7ଯୀଶୁସ୍ ଶାଏତାନ୍ବନ୍ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଆରୁହି ଲେଖ୍ଚ୍କା ରାଇଦ୍ କା: ‘ନିନ୍ ନିଙ୍ଘାଏ ପ୍ରାଭୁ ପାର୍ମେଶ୍ଵାର୍ସିନ୍ ବିଡ଼୍ଚେ ଆମୁ ଏରୁ।’”
8ଇଦ୍ଘି ପାଛ୍ଲି ଶାଏତାନ୍ଦ୍ ଯୀଶୁସିନ୍ ଅଣ୍ଟା ମେଚ୍ଛା ପାର୍ତ୍ତା ମିଆଁ ଅଚ୍ଚାକେରା ଆରୁ ଦୁନିଆଁନ୍ତା ଜାମା ରାଜୀନ୍ ଆରୁ ଆଦ୍ଘି ଶୋଭା ଗୁଠିନ୍ ଏଦିକିରି ତେଙ୍ଗିୟାଦ୍, 9“ଯଦି ନିନ୍ ଏଙ୍ଗାନ୍ ହାଠୁୱାରିକିରି ଯୋହାର୍ କାମୟ ହାଲେ, ଏନ୍ ଇବ୍ଡ଼ା ଜାମାନ୍ ନିଙ୍ଗାଗେ ଚିଅନ୍ଲାଗନ୍।” 10ଆଙ୍ଗେନ୍ ଯୀଶୁସ୍ ଶାଏତାନ୍ବନ୍ ତେଙ୍ଗିୟାସ୍, “ହେ ଶାଏତାନ୍ ଏଙ୍ଘାସ୍ତି ବୁଙ୍ଗୁ କାଲ୍, ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍: ‘ନିନ୍ ନିଙ୍ଘା ପ୍ରାଭୁ ପାର୍ମେଶ୍ଵାର୍ସିନ୍ ଯୋହାର୍ କାମୟ, ଆରୁ ଖାଲି ଆସ୍କି ସେବା କାମୟ।’”
11ଆଙ୍ଗେନ୍ ଶାଏତାନ୍ଦ୍ ଆସିନ୍ ଆମ୍ବିକିରି ବୁଙ୍ଗିୟା କେରା, ଆରୁ ଏରା, ସରଗ୍ଦୂଁତ୍ଜାମାର୍ ବାରିକିରି ଆସ୍କି ସେବା କାମାଗେ ଲାଗ୍ଗିୟାର୍।
ଗାଲିଲୀନୁ ଯୀଶୁସ୍ ସେବା ନାଲ୍ଖୁ କାମାଗେ ସୁରୁ କାମାଲ୍ଦାସ୍
(ମାର୍କୁସ୍ ୧:୧୪,୧୫; ଲୁକାସ୍ ୪:୧୪,୧୫,୩୧)
12ଯେତ୍କବାକେନ୍ ଯୀଶୁସ୍ ମେନ୍ଚାସ୍ କା ଯୋହାନ୍ସିନ୍ ବନ୍ଦୀ କାମ୍ଚେଇଚିଚ୍କାନାଏ, ତା ଆସ୍ ଗାଲିଲୀଗେ କେରାସ୍। 13ଆରୁ ଆସ୍ ନାଜ୍ରେତ୍ ସହର୍ବନ୍ ଆମ୍ବିକିରି କାଫାର୍ନାହୁମ୍ ସହର୍ନୁ ରାଗେ ଲାଗ୍ଗିୟାସ୍, ଏକାଦ୍ କା ଯୁବୁଲୁନ୍ ଆରୁ ନାପ୍ତାଲି ଏରିୟାଘି ହଁସ୍ରା ଖାଁଣିନୁ ରାଇଦ୍। 14ଏସ୍କେ କା ଇଶାୟାହ୍ସ୍ ନାବୀସ୍କି ଦ୍ୱାର୍ନୁ ତେଙ୍କା, ଇ କାତ୍ଥା ପୁରା ମାନ୍ନାଦ୍:
15“ଯୁବୁଲୁନ୍ ଦେଶ୍ ଆରୁ ନାପ୍ତାଲି ଦେଶ୍ ସାମ୍ଧୁର୍ ଚାହାନ୍ତା ଆରୁ ଯାର୍ଦାନ୍ ଯୋଡ଼ୁଘି ହାପାଖାନ୍ତା, ଦୁସ୍ରା ଜାତିୟାର୍ଘି ଗାଲିଲୀ ରାଚା। 16ଉହାନୁ ଅକ୍କୁ ଆଲାର୍, ଅଣ୍ଟା ବାଡ଼୍କା ବିଲ୍ଲୀ ଏରିୟାର୍; ଆରୁ ମରନ୍ଘି ଏଲ୍ଚ୍କାନୁ ନେଦ୍ ରାନାଏ, ଆବ୍ଡ଼ାର୍ଘି ମିଆଁ ବିଲ୍ଲୀ ଚାମ୍କାରାଚା।”
17ହୁ ସାମାୟନ୍ତିନ୍ ଯୀଶୁସ୍ ପ୍ରଚାର୍ କାମାଗେ ସୁରୁ କାମିକିରି ତେଙ୍ଗାଗେ ଲାଗ୍ଗିୟାସ୍, “ପାସ୍ତାରା ଏନ୍ଦେର୍ଗେକା ସରଗ୍ ରାଜୀଦ୍ ଚାହାନୁ ବାର୍ଚା କେର୍କିଚି।”
ଯୀଶୁସ୍ ତାଙ୍ଘା ପହେଲା ଚେଲାରିନ୍ ମେହାଁଲ୍ଦାସ୍
(ମାର୍କୁସ୍ ୧:୧୬-୨୦; ଲୁକାସ୍ ୫:୧-୧୧; ଯୋହାନ୍ ୧:୩୫-୪୨)
18ଯୀଶୁସ୍ ଗାଲିଲୀ ହଁସ୍ରା ଖାଁଣିନୁ କୁଦ୍ଦନାବାକେନ୍ ଦୁଇ ଭାଇରିନ୍ ଏରିୟାସ୍। ଶିମୋନ୍ ଏକାସିନ୍ କା ପାତ୍ରାସ୍ ବାଲିୟାର୍, ଆରୁ ତାଙ୍ଘା ଭାଇ ଆନ୍ଧ୍ରିୟାସ୍ସିନ୍ ଆବ୍ଡ଼ାର୍ ହଁସ୍ରାନୁ ଫିକା ଜାଲ୍ଲି ଆଚ୍ଛାଲିୟାର୍, ଏନ୍ଦେର୍ଗେକା ଆବ୍ଡ଼ାର୍ କେଉଁଟା ରାଚାର୍। 19ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି ବାରା, ଏନ୍ ନିମାନ୍ କେଉଁଟାର୍ଘି ଲେଖା ବାନାବନ୍ ଏକାର୍ କା ଆଲାରିନ୍ ଏଙ୍ଘା ପାଛ୍ଲି-ପାଛ୍ଲି ଗୁଡ଼ିଆନା ବାଲା ବାନାବର୍।” 20ହୁଙ୍ଗେନିନ୍ ଆବ୍ଡ଼ାର୍ ଜାଲ୍ଲିବନ୍ ଆମ୍ବିକିରି ଯୀଶୁସ୍କି ପାଛ୍ଲି-ପାଛ୍ଲି କେରାର୍।
21ଆସ୍ତି କାଟେ ଗେଚ୍ଛା ଆଘ୍ଲି କେର୍କାନ୍ତିନ୍, ଯୀଶୁସ୍ ଆରୁ ଦୁଇ ଭାଇରିନ୍ ଏରିୟାସ୍। ଆବ୍ଡ଼ାର୍ ଜେବେଦୀସ୍କି ହାଦ୍ଦୁର୍ ୟାକୁବ୍ ଆରୁ ତାଙ୍ଘା ଭାଇ ଯୋହାନ୍ସ୍ ରାଚାର୍। ଆବ୍ଡ଼ାର୍ ତାହ୍ମା ବୁଆ ଜେବେଦୀସ୍ ଗାନେ ଡଙ୍ଗାନୁ ତାହ୍ମା ଜାଲ୍ଲିନ୍ ସାଜାବାଲିୟାର୍, ଯୀଶୁସ୍ ଆବ୍ଡ଼ାରିନ୍ହି ମେହିଁୟାସ୍। 22ଆଖାନେନ୍ ଆବ୍ଡ଼ାର୍ ଡଙ୍ଗା ଆରୁ ତାହ୍ମା ବୁଆସିନ୍ ଆମ୍ବିକିରି ଯୀଶୁସ୍କି ପାଛ୍ଲି-ପାଛ୍ଲି କେରାର୍।
ଯୀଶୁସ୍ ବେହ୍ମରିୟାରିନ୍ ବାନେ କାମାଲ୍ଦାସ୍
(ଲୁକାସ୍ ୬:୧୭-୧୯)
23ଯୀଶୁସ୍ ଗାଲିଲୀ ରାଜୀନୁ କୁଦ୍ଦ୍ତେ ରାଚାସ୍, ଆରୁ ଆବ୍ଡ଼ାର୍ଘି ସାଭା ଆଡ଼୍ପାଗୁଠିନୁ ଉପ୍ଦେଶ୍ ଚିଆଲିୟାସ୍, ଆରୁ ପାର୍ମେଶ୍ଵାର୍ସ୍କି ରାଜୀଘି ସୁସାମାଚାର୍ ଶୁଣାବାଲିୟାସ୍ ଆରୁ ଆଲାର୍ଘି ଜାମା ରକମ୍ଘି ବେମାର୍ ଆରୁ ତାହ୍ମା କମ୍ଜୋର୍ବନ୍ ବାନେ କାମାଲିୟାସ୍। 24ଆରୁ ଗୋଟା ସିରିଆ ରାଜୀନୁ ତାଙ୍ଘା କାତ୍ଥା ଫାଏଲାରାଚା କେରା; ଆଲାର୍ ଜାମା ରକମ୍ ବେହ୍ମରିୟା, ଆରୁ ଦୁଃଖୁ ସାହୁ ଆଲାରିନ୍ ଯୀଶୁସ୍କି ଚାହାଗେ ଅନ୍ଦ୍ରାର୍। ଆଲାର୍ ଭୁତ୍ତୁଲାକ୍କା ଆଲାରିନ୍, ଆରୁ ମିର୍ଗି ବେହ୍ମରିୟାରିନ୍ ଆରୁ ଏକ୍ଆଙ୍ଗିୟା ବେହ୍ମରିୟାରିନ୍ ଯୀଶୁସ୍କି ଚାହାଗେ ଅନ୍ଦ୍ରାର୍ ଆରୁ ଯୀଶୁସ୍ ଆବ୍ଡ଼ାରିନ୍ ବାନେ କାମ୍ଚାସ୍। 25ଆରୁ ଗାଲିଲୀ ଦେକାପଲି, ଯେରୁଶାଲେମ୍, ୟାହୁଦା ପ୍ରଦେଶ୍ ଆରୁ ଯାର୍ଦାନ୍ ଯୋଡ଼ୁ ହା ପାଖାନ୍ତି ଢେର୍ ଆଲାର୍ ତାଙ୍ଘା ପାଛ୍ଲି-ପାଛ୍ଲି ବାର୍ଚାର୍।
Atualmente Selecionado:
ମାତିସ୍ 4: xis
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© (Active) Wycliffe Bible Translators, Inc. All rights reserved.
