ሉቃስት ወንጌል 7

ፈወነ 7

እየሱስ ላዝ ኻልቀዝ ኣገልጋይ ቓዘጘ

(ማቲ. 8፡5-13)

1እየሱስ እኒንትቅ ኽዝቪዝ ዊግት ኻተት ግረ ቅፍርናዀም ትጐ ፊሩ። 2ጝግልም ላው ላዝ ኻልቀ ዊኑ፤ ጝቀነው ኣገልጋይድም ጭቕጘ ፅዊት ክርጠ ጕ ዊኑ። 3እየሱስት ጂጘድ ወሻንድም፦ «ኣለቀይጥን ተር ይኣገልጋይድየንት ቓዝጠ ማጥን ፊትርን ጨውጥን» የው ኣይዅዳነ ሽመቅልድዛት እየሱስትጐ እፃቑ። 4ጛይም እየሱስትጐ ተርጝ፦ «ጝጭስ እኒንት ፃቭተ ጥውሸኵ። 5ጘጝ ይናኽዝቭድ ቀነው እጅር የጝ፤ ይናምኵራቭድየንትም ተሰውድ ጘጝ የጝ» ይጛ ኪው ሽጝ ጨው።

6እየሱስም፦ «ቀሰው» የው ጛጅቅ ፊሩ፤ ጝጝኒዝጐ ችጝጠ ጓንድም ላዝ ኻልቀድ ጝወደጃንድ ጭጝ፦ «ኣደረወ! ክት ይጝን ፅራነይዝ ሳይል ጥወነውዝ ያን ጥውጨር እጅርም ኣይቀር ዝላተ። 7ያን ይቕምም ክጐ ተረነውዝ በቃቐርም ኣይቀር፤ ኣቓንስቅም ጝግል ኣቕር ክቃሊዝ ኣዝረውዝየ ይኣገልጋይድ ቓድጡ። 8ያን ይቕምም ይንየቱ ኻልቀ ፃቀር የጝ፤ ይጭስ ኣዚተቍ ይሳትቍ ዊተድር ቈሽ እኵ፤ ላውድ፦ ‹ፊጥ› ያንድ ፊረኵ፤ ላየድ ቈሽ፦ ‹ለው› ያንድ ተረኵ፤ ይኣገልጋይድም፦ ‹እኒንት ፃቭ› ያንድ ኣዚተጘ ፃቨኵ፤ ይርን ድቍጥን» የው እፃቑ።

9እየሱስም እኒንት ወሻንድ ዲንቅሹ፤ ብሩ የውም ጝት ቲክና ዊነው ኽዝቪዝ፦ «እነየው ኽየው እምንት እስራየላኒስ እኳ ችጚቀርም የኵን» ዩ። 10እፃሸቍድም ላዝ ኻልቀይዙ ጝኒል ዋጥርጛንድ ጝኣገልጋይድ ቓደጘ ችጝ።

እየሱስ ላይ ልጀጊርድት ዅርት ክረት ቓዘጘ

11እንዝ ግረ እየሱስ ጛምርሲዝ ናይን ይሽትረይ ላይ ኻትመትጐ ፊሩ፤ ጝክንደጢዝመ ንቕፀው ኽዝቭዝም ላው ኣቕጝ ፊር። 12ኻትመየንትል ጥወጘም እቅ እርሸ መውር ኻትመየንቲስ ፍጛ ዊን፤ ክረውድም ጝኘስ ላው ጭቝ ዅር ዊኑ፤ ጝኘየንም ልጀጊርድ ዊንች፤ ኻትመይዙ ንቕፀው ኽዝቭም ጝርጅቅ ዊኑ። 13ኣደረም ጝርት ቓላንድ ጝርስ ኣርኽርኽ፦ «ኣይዝዀች ሊዝተ» ዩ። 14ኣልት የውም ቃነ ቀሪዘድ ዳቑ፤ መውርጝ ዊነቍ እቅድም ቀጥ ይጝ ችብር፤ እየሱስም፦ «እፈ ጕለሸ ክተ! ጕ የኵን» ዩ። 15ክረውድም ጕን የው ጐይ ዊግተነው ኪርሙ፤ እየሱስም ጝኘስ፦ «ኣስ ክዅርት» የው ይዉ።

16ኽዝቭድም እጝቅቅ ጐውትዝ ስርሽ፦ «ይናማኽሊስ ኽየው ነቭይ ጕኩ፤ እደረም ጝኽዝቭድ ገቭስኩ» ያ እደረት ሚዝየንዙ። 17እየሱስት ጂጘድም ይዅዳ ኻግሪዝመ ላጥ ጝጅለወይዝቍ ኻግራኒዝቅ ወሽይቱ።

ጣምቀተ ይዃንስ እየሱስትል እፃ እፃቕጘ

(ማቲ. 11፡2-19)

18ይዃንስት ክንደጥድም እንዛትቅ ይዃንስስ ድቍ፤ ጘጝም ጛጊስ ሊጘድ ጭጝ፦ 19«ተርጡ ይን ሊሚደነርድ ክትመ? ዊንስ ላየ ሊሚድነ?» የው ኣደረ ትጐ እፃቑ። 20እቅድም እየሱስትል ተርጝ፦ «ጣምቀተ ይዃንስ፦ ‹ተርጡ ይን ሊሚደነርድ ክትመ? ዊንስ ላየ ሊሚድነ?› የው ክጐ እፃቑ» ይጝ ድቍ።

21እየሱስም ኣይንድ ንቕፀቍ እቅ ጝታፅውዘይስመ ርኩሳን መንፈሳኒስ ቓዙ፤ ንቕፀቍ ኻርብድም ጝታእልጣንድ ብዙ። 22እድ እፃሸቍድዛትም፦ «ፊትርን ቓልድርነዊዝመ ወሽርነዊስዝቅ ጣምቀተ ይዃንስስ ድቍጥን፤ ኻርብድ ቓልጘኵ፣ ኻካዛንድ ቓድጝ ጝታልኵዝ ፃጝጘኵ፣ ለምፃማንድ ቓድጘኵ፣ ዲቋራንድ ወሽጘኵ፣ ክረቍድም ጕጘኵ፣ ድኺዝም ወንጌል ሲቭክሸኵ።#እሳ. 35፡5-6፤ 61፡1። 23ይት ተጠራጥርሻው እጅርድቅ ቀቫሸው ይጝ» ዩ።

24ይዃንስቲስ እፃሸቍድ ፊርጘት ግረ እየሱስ ይኳንስት ማጥን ኽዝቪዝ እንት ያ ዊግትጠ ኪርሙ፦ «በራኸይል ፍርነውድ ውር ቓልትርነ የጝ? ፊግየ ዊዝውዘው ኣቲነድመ? 25እደስለ ውር ቓልትርነ የጝ ፍርነውድ? ሸግጥ ኣልብ ሲረው እጅር ቓልትርነመ? ሸግጥ ኣልብ ሲረቍዝመ ሽልምልምሽጛⶔ ፅበቍዝ ንጕሳኒዝ ጝኒል እኵ። 26ቈሽስ ውር ቓልትርነ ተትርኑ? ነቭይ ቓልትርነመ? የይ! ቓልትርነ ተትርነውድ ነቭዪስም ዲቈውድ የጝ። 27‹እንወ ክበው በዊል ፃጛ ክጒደነድ ኣስለው ይእፃሸረድ በርስጭር› ይሽት ፃፍሸውድም ጝማጥን የጝ።#ምል. 3፡1። 28እቍኒስ እዅርሸቊስቅ ይዃንስት ዲቈውም እጀው፤ እደረት ምጝግስቲስ ግን እጝቂስቅ እጥንድ ጝጊስ ዲቍጡ የኵን» ዩ።

29ቀረጥ ቀቨቍድ እኳ እዳቒጝቀ ወሸው ኽዝቭድቅ ይዃንስት ናኒዝ ጣምቅሽ እደረት ጒደነድ ጭቅየው ኣቐጘ ልብቱ። 30ፈሪሳኒዝመ ወሪትት ኽግ ክንሰጢዝ ግን ይዃንስትዝ ጣምቅሻይነቅም ይጝ እደረት ምኽርድ ተቃውምሽ።#ማቲ. 21፡32፤ ሉቃ. 3፡12።

31እየሱስም እንት ዩ፦ «ነስየ እን ዚምኒዝ እቅድ ውርዝ ተክዝጭር? ወረጘስ ተክጘኵ? 32ኣርይ ስፍረል ጐይጝ ጛስ ጛይ ጭጘጭጝሽጛ፦ ‹ኣቲነ ዋስኑን፤ ክትን ግን ዚቪርነቅም፤ ሊዝ ሊስኑን ክትን ግን ሊዚርነቅም› ይጛ ዋርደቍ እፈርድ ተክጘኵ። 33ምላሰንድም ጣምቀተ ይዃንስ ኣረ ዂጝቀ ወይንዙ ሚዝም ዝዪጝቀ ተራን፦ ‹ጋኒንዝ ፃይሽኩ› ይርኑ። 34እጅር ዅር ቈሽ ዃ ዝያ ተራን፦ ‹ዀይረ! ዝየተ ኽጥያትኝጥዝመ ቀረጥ ቀቨቍዝቅ ወደጅ› ይርኑ። 35ዊገድ ግን ጥቨቭት እማንትነይድ እጝቅ ጝርቝሪዝ ኣመካይነትዝ ደደደድሹ።»

ላይ እውነ እየሱስት ሽቱ ቓስረጘ

36እንዝ ግረ ፈሪሳኒስ ላውድ እየሱስት ጝጝኒል ኣብኑወ ጭጙ፤ ጘጝም፦ «ቀሰው» የው ፊር ምዘት ዅጠ መዲል ጐዩ። 37ኣይንድም ጘጝ ኻትመይል ፅብረይ ላይ ኽጥያትኘ እውነ እየሱስ ፈሪሳነውዝ ጝኒል ምዘት ዅጠ ጐየጘ ወሽራንድ፣ ሽቱ እቻቐው ኣልቫስጥረውስት ብልቃጥ ፃይር ተርች።#ማቲ. 26፡7፤ ማር. 14፡3፤ ይዃ. 12፡3። 38እየሱስት እግርገይልም ችብትር ሊዝራ ጝርእርዝ ጝልኵድ ናኽርድራ ጝርኣውር ፅቭቀይዝ ኻዝች፤ ጝልኵድየንትም እምቝራ ሽቱዊዝ እቓሰነው ኪርምች። 39እየሱስት ጝጝኒል ጭጘው ፈሪሳነውድ ግን እኒንት ቓላንድ፦ «እን እጅርድ ነቭይ ኣቓንሰ እኝቸን ጝት ዳቕረይ እውነየን ኣው ኣረጘ፣ ቈሽም ኣወይረይ ኽጥያትኘ ኣረጘ ኣርቕጠቀ ዊኒየው» የው ጝእዘኒዝ ኻስቩ።

40እየሱስም፦ «ስሙንወ! ያን ክጭስ ድቈው ዊገ እኩ» ዩ፤ ጘጝም፦ «ክንሰተወ ቀሰው ድቋ» ዩ። 41«ላው እዱሰተ እጅርዝ ሊጘ ቢን ጕይጥ እቅ ዊን፤ ላውድ ኣኰ ላ ቍርሻን ሊጘትረድ ቈሽ ኣኵርጝን ቍርሻን እዱርጝ ዊን። 42እንዝ ግረ ጝታቪልቅ ኪፍለነው ብጛንስቅ እድ እዱሰው እጅርድ ጝታቢንድ ሳቝሩ፤ ነስየ እንዛይ ቢን ጕጢስ እድየን ጊንዝቪዝ ጕርየድየንት ጭቕጘ ፃቭ ቀንጡድ ኣውየን ተከኵ?» የው ዋቕሩ።

43ስሙንም፦ «ንቕፀቍ ቢኒስ ሳቝርሸውድ የጝ ተከኵ» የው ዊሱ፤ እየሱስም፦ «እማን የጝ ይረውድ» ዩ። 44እውነየንትጐም ዋጥር የው ስሙንት እንት ዩ፦ «እኝቸን እውነየንት ቓልደኵመ? ያን ክጝኒል ጥዉን፤ ክት ግን ይልኲዝ ኣቝ እኳ ነዪረርም፤ ጚ ግን ይልኵድ ጝርእርዝ ናኽርዳ ጝር ኣውር ፅቭቀይዝ ኻዝች። 45ክት ይት እምቚረርም፤ ጚ ግን ያን ጥወት ኪርምር ነኳን ኣሽ ይልኵድ እምቘነውድ ቀቪረይም። 46ክት ይኣውርድ ዘይትዝ ቓሲረርም፤ ጚ ግን ይልኵድ ሽቱዝ እቓስች። 47ምላሰንድም ኽየው ጝርኽጥያትድ ይቅር ይሽታንስቅ ጚ ይት ጭቕጘ ቀንች፤ ዊቱ ኽጥያትድ ይቅር ይሽተው እጅር ግን ዊቱዝ የጝ ቀነውድ።»

48እየሱስም እውነየንት፦ «ክኽጥያትድ ይቅርይሽትኩ» ዩ። 49ጝጅቅ መዲል ጐይጝ ዊነቍድም፦ «እኒን እጅርድ ኽጥያት እኳ ይቅር የውድ ጘጝ ኣው ኣቕ የጝ?» ይጛ ጝታእዘኒዝ ኻስቨነው ኪርም። 50እየሱስም እውነየንት፦ «ክእምንትድ ቓዝኩ፤ ዲግተዝ ፊጥ» ዩ።

Atualmente Selecionado:

ሉቃስት ወንጌል 7: ኽምጣኣኪ

Destaque

Copiar