ሉቃስት ወንጌል 20

ፈወነ 20

እየሱስት ስልጣኒዝቍዝ ኣልተው ዋቕረ

(ማቲ. 21፡23-27፤ ማር. 11፡27-33)

1ላው ግርየ እየሱስ መቅደሲስ ኽዝቭድ ክንሳ ወንጌልም ሲቭካ ዊኑ፤ ኣይንድም ካኽነጣነ ኻልቅጢዝመ ወሪትት ኽግ ክንሰጢዝ፣ሽመቅልድም ኣቕጝ ጝጐ ተር። 2ጝትም፦ «እስቲ ድቍ፤ እንዛት ፃቭረውድ ውር ስልጣንዝ የጝ? እንዛት ፃቭተ ማጥንስ ክጭስ ስልጣን ነየውድ ኣው የጝ?» ይጝ ዋቕር። 3እየሱስም ዊስ፦ «ያንም ክታት ላው ዊገ ዋቕርጨር ፈርጥን እስቲ ዊስጥን! 4ይዃንስት ጥምቅትድ እደረቲስመ ዊንስ እጅሪስ ዊኑ?» ዩ። 5ጛይም ጛስ ጛይ እንት ይጝ ማኽርኽሽ፦ «እደረቲስ የጝ ይናን፦ ‹እደስለ ውረ ጝት ለምሪርነቅ?› ይጠ የጝ። 6እጅሪስ የጝ ይናን ቈሽ ኽዝቭድ ይናት ቕርጘዝ ድድብጠ የጝ፤ ምላሰንድም ኽዝቭድ እጝቅቅ ይዃንስ ነቭይ ኣቐጘ ኣምንኩ።» 7ኣቓንስቅም፦ «ይን ኣዊስ ኣቐጘ ኣርቓይነቅም» ይጝ ዊስ። 8እየሱስም፦ «እደስለስ ያንም እንዛት ፃቨውድ ውር ስልጣንዝ ኣቐጘ ክታጭስ ድቈቅም» ዩ።

ወይኒዙ ኣታክልቲዝ ኣርጪዝ ተከድ

(ማቲ. 21፡33-46፤ ማር. 12፡1-12)

9እየሱስም እንዝ ግረ ኽዝቪዝ እኒን ተከድ ዊግተነው ኪርሙ፦ «ላው እጅር ወይንዙ ኣታክልት ቲክሉ፤ ጝትም ኣርጭዝ ክራይስ ላየ ኻግርል ፊር ዋጥሪጝቀ ኽየው ግርየ ዲቍሱ።#እሳ. 5፡1። 10ወይኒዙ ፍረነ ግርየድ ችጛንድም ኣታክልቲዝ ወነድ ፍረይስ ጝፊንተድ ለምርጠ በን ጝኣርሸድ እፃቑ፤ እዛይ ኣርጭድ ግን እፃሸው ኣርሸድየንት ድድብጝ ባደው ናን በርስ። 11ወነድም ዊስ ላየ ኣርሸ እፃቑ፤ ጛይ ግን ጝትም ድድብጝ ኣዋርዝጝ ባደው ናን በርስ። 12እንደ ገነ ቈሽ ሸወትረ ኣርሸ እፃቑ፤ ጛይ ግን ጝትም ድድብጝ ልኻንዝጝ በርጝ ቢዘ ፊስጝ ማል። 13ኣታክልቲዝ ወነድም፦ ‹ነስየ ውር ፃቫን ቺዝጡ ኣጢ! እስቲ ቈሽ ይቀነው ይዅርድየንት እፃጫ! ምናልቫች ጝት እኳ ኣይቭተቍ ኣጝሽ› ዩ። 14እዛይ ኣርጭድ ግን ጝዅርድየንት ቓልጛንድ ጛስ ጛይ፦ ‹እኒንመ ወራሽድ የጝ፤ ላቝጥን ቁነ፤ ጝርስትድም ይናቕምስ ኣጡ› ይጛ ማኽርሽ። 15ጝትም ኣታክልቲዝ ቢዘይል ፊስጝ ቍዉ፤

«ነስየ ኣታክልቲዝ ወነድ እዛይ ኣርጭድዛት ወረጘ ፃቭጡ ተከኵ? 16ጝቕም ተር እዛይ ኣርጭድ ቍውጡ፤ ወይኒዙ ኣታክልትድም ላጥ ኣርጭዝ ይውጡ» ዩ። ኽዝቭድም እኒንት ወሻንድ፦ «እነየውድስ ነሲነ!» ይ። 17እየሱስ ግን ኽዝቪዝጐ ቓላ እንት ዩ፦ «እደስለ፦ ‹ግምበኝጥድ ነቅጘው ቕርጘድ ማይዘኒዝ ኣውር ኣቑ› ይሽት ፃፍሸዊዙ ትርጕምድ ወረጘ የጝ?#መዝ. 118፡22። 18ጘጝ ቕርጘይል ሊቨውድቅ ኪልድሽ ብትንትን ይጡ፤ ቕርጘድየን ጝቕም ጝዲጊል ሊቨው እጅርድ ግን ጫፍልቕሽጡ።»

19ወሪትት ኽግ ክንሰጢዝመ ካኽነጣነ ኻልቅጢዝም እኒን ተከድየንት ዊግተውድ ጝታማጥን ኣቐጘ ኣርቕጛንስቅ ኣይንድ በውዝ ፃይጥጘ በንጝ ዊን፤ ዊገድ ግን ኽዝቭድ ጐውት።

ግቭር ኪፍለነውዝ ማጥን ኣልተው ዋቕረ

(ማቲ. 22፡15-22፤ ማር. 12፡13-17)

20እየሱስትም ፃይጥጘ ሚቸው ግርየ ደምዝጛ ዊን፤ ጭሰጭሰው ደጘይል ችጝሰው ቃል ጝቕምቲስ ችጝጥጘ በንጛ ዊን፤ እንዝ ማጥን ፃድቃን ተክጝ ጘጝ ዊግተው ዊገይዝ ፃውረቍ ሰላያን ጝጐ እፃቕ። 21ሰላያንድም እየሱስትል ኣልትጝ፦ «ክንሰተወ! ክት እማንት ዊግተስመ ክንስተስ ኣርቕነኵን፤ እደረት ጒደነድ እማንዝ ክንስረኵጚ ኣውማውስቅ ኣድልዋርም። 22እስቲ ድቍ፤ ቂሳርስ ግቭር ኪፍለነው ጥውሸኵመ ጥውሻው?» ይጝ ዋቕር። 23እየሱስ ግን ጝታተኰልድ ኣርቕ እንት ዩ፦ 24«እስቲ ላው ቍርሽ ቓሊስጥን፤ እድ ቍርሺል ፅበው ፅፈሺዝመ ሚልኪዝ ኣውቱ የጝ?» ዩ፤ ጛይም፦ «ቂሳርቱዋ» ይጝ ዊስ። 25ጘጝም፦ «እደስለስ ቂሳትርትውድ ቂሳርስ፣ እደረትውድ ቈሽ እደረስ ይውጥን» ዩ። 26ጛይም ኽዝቪዝ በዊል ዊግተቍ ዊቂዝ ፃውረነው ቸሊየቍም፤ ጘጝ ዊሰው ዊገይዝም ጊርምሽጛ ዝም ይ።

ክርጘይስ ጐነዝቍዝ ኣልተው ክርክር

(ማቲ. 22፡23-33፤ ማር. 12፡18-27)

27ክርጘይስ ጐነድ ኻድየቍ ሰዱቃኒስም ላው ላውድ እየሱስትል ኣልትጝ እንት ይጝ ዋቕር፦#ኻወ. 23፡8። 28«ክንሰተወ! ሙሴ፦ ‹ላው እጅር እውነት ድው ዅር እዅሪጝቀ ክርሽ ክረዊዝ ጝዝንድ እቸን እውነየንት ድው ክረዊዝ ዚረ ቲኪነ› የው ይናጭስ ጝኽጊዝ ፃፍኩ።#ዘዳ. 25፡5። 29እደስለ ላጝጠ ዚን ዊን፤ እጝቂስቅ ኽየውድ እውነት ድው ዅር እዅሪጝቀ ክሩ። 30ጝሳቱ ጝዝንድም እቸን እውነየንት ድው እዅሪጝቀ ክሩ። 31ሸወትረድም ጘጝት፤ እደይጛ ላጝጠድቅ እቸን እውነየንት ድውጝ እጝቅቅ ዅር እዅሪጝቀ ክር። 32እጝቂስቅ እግርገይል ቈሽ እውነየን ክርች። 33ነስየ ላጝጠድቅ ድውጛንስቅ እኝቸን እውነየን ክርጘይስ ጐነይዝ ኰር ኣዊዝ እውነ የጝ ኣረውድ?» ይ።

34እየሱስም፦ «እን ኣልሚዝ እቅድ ድውጘኵ፤ ገባሽጘኵ። 35ተረው ኣልሚዝመ ክርጘይስ ጐነይዝ ችጘነውዝ በቃቐቍ እቅድ ግን ድዋቍም ገባሻቍም። 36መላካታኒዝጘ ኣጛንስቅም ጝዝግረ ክራቍም፤ ክርጘይስ ጕጛንስቅም እደረት ቝር ጛይ። 37ክርጘይስ ጐነዝቍዝ ኣቓንድም ሙሴም ቍጥቋጠይዙ ልየይዝቍዝ ዊግተው ታሪኪዝ፦ ‹ኣቭርኻምት ኣምላክ ይሳቅት ኣምላክ ያይቈቭት ኣምላክ› የው ጭጝኩ።#ዘፀ. 3፡6። 38ኣቓንስቅም እጝቅቅ እደረስ ፅበቍ ኣጛንስቅ እደረ ፅበቍዝ ኣምላክ የጝጚ ክረቍዝ ኣምላክም ኣየው» ዩ።

39ወሪትት ኽግ ክንሰጢስም ላው ላውድ፦ «ክንሰተወ! ቀሰው ፃቭር ዊግትሩ» ይ። 40እንዝ ግረ ላው እጅር እኳ ጝት ዋቕርጠ ዲፍሪየውም።

ክርስቶስ ጝቕምት ኣውት ዅር ኣቐጘ ዋቅረ ኣልሱ

(ማቲ. 22፡41-46፤ ማር. 12፡35-37)

41እንዝ ግረ እየሱስ እቅ፦ «ክርስቶስ ዳዊትት ዅር የጝ ይጘውድ ኣወይጝ የጝ? 42-43ዳዊት ጝቕም መዝሙር መፃፊዝ፦

‹ኣደረ ይኣደረት፣

<ክፃለታንድዛት ክልኲዝ ደደነ ፃቭጪስቅ፣

የለዊል ጐይ> ዩ።›

የው እጀውቃ።#መዝ. 110፡1። 44እደስለ ዳዊት ጝቕም ኣደረ የው ጭጘውዝየ ኣወይ የጝ ክርስቶስ ዳዊትት ዅር ኣቐውድ?» የው ዋቕሩ።

ወሪትት ኽግ ክንሰጢስ ጣጝቅቅሸነው

(ማቲ. 23፡1-36፤ ማር. 12፡38-40)

45ኽዝቭድቅ ወሻ እየሱስ ጝክንደጢዝ እንት ዩ፦ 46«ዘፈፍ የው ቅምስ ሲርጝ ጅልወነው ቀነቍ፣ ኣርየ ብጣይስም ሲለም ይሽተነው፣ ምኵራቪስም ኪብረነ ወምበር፣ ድግስ ጝኒስም ኪብረው ስፍረል ጐይጥጘ በነቍ ወሪትት ኽግ ክንሰጢስ ጣጝቅቅጭጥን። 47ጛይ ልጀጊርዳኒዝ ጝንጥድ ቢዝብዝጘኵ፤ እጅርዝ እትልጥጘ ማጥንም ጝታፀለውትድ ሊጊስጘኵ፤ ኣቓንስቅም ጛይ ወሰው ፍርድ ችጝጥቍ።

Atualmente Selecionado:

ሉቃስት ወንጌል 20: ኽምጣኣኪ

Destaque

Copiar