मत्ती 4

ईसुनै बिचास्यो जाबो

(मरकुस 1:12,13; लूका 4:1–13)

1 # इबरा 2:18; 4:15 जणा पबितर आत्मा ईसुनै उजाड़ म लेगी जिऊँ सेतानऊँ बो बिचास्यो जावै। 2बो चाळिस दिन अर चाळिस रात निरहार रिह्यो। अर जद भूखऊँ बिकी आंतड़ी ऐठबा लागी। 3जणा बिचास्बाळो सेतान बिकन आर ओडायो, “ज तू परमेसर को बेटो ह जणा आ भाठाऊँ बोल क रोटी बण जावै।” 4ईसु बिनै जुबाब दिओ, पबितर सास्तर म मांडेड़ो ह क,

“मिनख रोटीऊँई कोनी जीवै पण बो हरेक बि बचनऊँ जखा परमेसर आपका मुंडाऊँ बोलै ह जीवै ह।”

5बिकै पाछै सेतान बिनै पबितर नगरी यरूसलेम म लेगो अर मनदर की चोटी प खड़्यो कर दिओ। 6अर बिऊँ बोल्यो, “ज तू सचमई परमेसर को बेटो ह जणा अठैऊँ तळै कुदज्या।” क्युं क पबितर सास्तर म मांडेड़ो ह क,

“परमेसर आपका ईस्बर नगरी दुतानै हुकम देसी,

अर तेरा पगा म कांकरो गडै इऊँ पेलीई बे तनै हात्युहात बोचलेसी।”

7ईसु बिऊँ बोल्यो, “पबितर सास्तर म ओबी मांडेड़ो ह क:

“‘तू तेरा परबु परमेसरनै मना बिचासजे।’ ”

8बिकै पाछै सेतान बिनै एक उचासा डूँगर प लेगो अर सगळो जगत को राजपाट अर ठाट-बाट दिखायो। 9अर बोल्यो, “ज तू मेरै आगै गोडा टे'कर मनै धोकै जणा म ओ सगळो राजपाट तनै दे देस्युँ।” 10जणा ईसु बिनै बोल्यो, “हे सेतान दूर भागज्या!” पबितर सास्तर म मांडेड़ो ह:

“तू परबु परमेसर किई भगती करजे अर बिकिई सेवा करजे।”

11जणा सेतान बिकनऊँ चलेगो अर, ईस्बर नगरी दुत आर बिकी देखभाळ करबा लाग्या।

ईसु की सेवा की सरूआत

(मरकुस 1:14,15; लूका 4:14,15)

12 # मत्त 14:3; मर 6:17; लूक 3:19,20 जद ईसु अंय्यां सुण्यो क यहून्नानै केद कर लिओ गयो ह जणा बो गलिल म चलेगो। 13#यह 2:12अर बो नासरतनै छोडर कफरनूम नगर म जखो दरिआव क किनारै जबलुन अर नपताली दिसावर म ह बठै जार रेह्बा लाग्यो, 14जिऊँ यसाया परमेसर की खेबाळो जखा बचन बोल्या हा बे पूरा होवै,

15“जबलुन अर नपताली दिसावर जखो यरदन नदि क अगुणी दिसा म ह। गलिल जखी परमेसरनै नइ ध्यारबाळा मिनखा की भौम ह।

16जखा अँधेरा म बेठ्या हा, बे च्यानणो देख्या; अर जखा मोत का काळ म हा बाकै उपर बी च्यानणो चमक्यो।”

17 # मत्त 3:2 जद ईसु कफरनूम म हा बि टेमई परचार करबो चालू कर्यो, “थे पापऊँ तौबा करो! क्युं क ईस्बर नगरी को राज सांकड़ै ह।”

ईसु चेलानै टाळ्यो

(मरकुस 1:16–20; लूका 5:1–11)

18एक बर ईसु गलिल दरिआव क किनारै-किनारै जार्यो हो जणा दो भायानै देख्यो बामैऊँ एक को नाम समोन जिनै पतरस बी खेता हा; अर बिकाळो भाई अंदरिआस हो बे दरिआव म जाळ गेरर्या हा; क्युं क बे मछी पकड़बाळा हा। 19ईसु बाऊँ बोल्यो, “मेरै गेल आओ, म थानै मिनखानै भेळा करबा की सीख देस्युँ।” 20बे तावळासा आपका जाळ फेकर ईसु क गेल होलिआ। 21बठैऊँ क्युंक दूर चालबा क पाछै ईसु देख्यो क जब्दि का बेटा याकूब अर बिको भाई यहून्ना आपका बाप क सागै न्याव म जाळ सुदार्या हा बानै आपकै कनै बुलायो। 22बे बी तावळासा न्याव अर आपका बापनै छोडर बिकै गेल होलिआ।

ईसु रोगलानै निरोगो कर्यो

(लूका 6:17–19)

23 # मत्त 9:35; मर 1:39 ईसु गलिल नगरी की सगळी झघा म घूमतो होयो अर अरदास करबाळी झघा म परमेसर का राज का चोखा समचार क बारां म बतातो अर लोगा का रोग अर कमजोरीनै दूर करतो रिह्यो। 24सगळा सिरीया देस म बिकी चरचा फेलगी अर लोग सगळा रोगलानै जखा भात-भात का रोगाऊँ रोगला हा, जखा पिड़ा म पड़्या हा, फेंट होईड़ा, जामै दोरा आता हा अर हवा भेयड़ा मिनखानै बिकन ल्याया अर बो बा सगळानै निरोगो कर दिओ। 25इ बजेऊँ गलिल अर दिकापुलिस, यरूसलेम, यहूदिआ अर यरदन नदि क परलै नाकै की नगर्या का मिनख हा बाकी घणीसारी भीड़ की भीड़ बाकै गेल होगी।

Atualmente Selecionado:

मत्ती 4: एस डब्लु वी

Destaque

Copiar