मत्ती 11

ईसु अर बतिस्मो देबाळो यहून्ना

(लूका 7:18–35)

1ईसु आपका बारा चेलानै हुकम देबा क पाछै बठैऊँ परचार करबा अर सीख देबा ताँई नगर्या म चलेगो। 2जद यहून्ना काळ-कोठड़ी म मसी का कामा की चरचा सुणी जणा बो आपका चेलानै ईसु कनै आ बुजबा ताँई भेज्यो, 3“थे बेई हो के जखा आबाळा हा नहिस म्हें ओरनै उडिकां?” 4ईसु बाऊँ बोल्यो, “थे जोक्यु बी सुणो अर देखो हो बो सक्यु यहून्नानै जार बताद्‍यो। 5आँदा ओज्यु देखीं हीं, लंगड़ा चालीं हीं, कोढ्या को कोढ धोयो जार्यो ह। बैरा सुणर्या हीं, मुरदानै जीवायो जार्यो ह अर गरीबा म चोखा समचार को परचार कर्यो जार्यो ह। 6भागहाळा ह बे जखा मेरै प बिस्वास करै ह।” 7अर जद यहून्ना का चेला बठैऊँ चाल पड़्या जणा ईसु लोगानै बतिस्मो देबाळा यहून्ना क बारां म खेबा लाग्यो, “थे उजाड़ म काँई देखबा गया हा, भाळऊँ हालता कूचानै? 8जणा काँई देखबा गया हा? के किमती गाबा पेरेड़ा मिनखनै? सुणो जखा किमती गाबा पेरीं हीं बे राजा का म्हेलमाळ्या म रेह्‍वै। 9जणा काँई देखबा गया हा? के परमेसर की खेबाळानै, पण म थानै बोलुँ हूँ जिनै थे देखबा गया हा बो परमेसर की खेबाळाऊँ बी बढकै ह। 10ओ बो ह जिकै बारां म पबितर सास्तर म मंडर्यो ह:

“देख म मेरा हलकारानै अधिकार क सागै तेरै अगाऊ भेजूँ हूँ।

जखो लोगा का हियानै तेरै ताँई त्यार करसी।”#11:10 यूनानी पोथी म अंय्यां मंडर्यो ह क बो तेरै आबा ताँई गेलो त्यार करसी।

11“म थानै सची खेऊँ हूँ लूगाईऊँ जलमेड़ा सगळा मिनखा म बतिस्मो देबाळा यहून्नाऊँ बडो कोई मिनख कोनी जलम्यो। पण ईस्बर नगरी का राज म छोटाऊँ छोटो बी बिऊँ बडो ह। 12#लूक 16:16बतिस्मो देबाळा यहून्ना की टेमऊँ लेर परमेसर का राज क सागै मारपीट करी जावै ह अर बे मारपीट करबाळा जोरामादी बि राजनै लेबा की कोसिस करै ह। 13यहून्ना की टेम ताँई सगळा परमेसर की खेबाळा अर मूसा का नेम-कायदा परमेसर को समचार देता हा। 14#मत्त 17:10–13; मर 9:11–13ज थारै मऊँ कोई इ बातनै मानबो चावै क आबाळो एलिआ ओई ह, जणा बो इनै मानले। 15जिकै कान ह बो बानै खोलल्यो। 16म इ पिडी का मिनखा की बराबरी किऊँ करूं? अ तो गुवाड़ म बेठ्या बा टाबरा की जंय्यां ह जखा एक दुसरानै हेलो देर खेवै ह। 17‘म्हें थारै ताँई बाजो बजाया पण थे नाच्याई कोनी। म्हें थारै ताँई बार घाली पण थे रोयाई कोनी।’ 18बतिस्मो देबाळो यहून्ना आयो बो ओरा की जंय्यां नइ तो चोखो खातो हो अर नइ अँगूरी पीतो हो जणा बी लोग खया इकै मांयनै ओपरी बलाय ह। 19मिनख को बेटो ओरा की जंय्यां खातो-पीतो आयो अर बे खेवै ह, ‘ओ पेटू अर दारूड़ो ह चुंगी लेबाळा अर पाप्या को भाईलो ह।’ परमेसर की बुदी प चालबाळा आपका करमाऊँ बिकी बुदीनै सई साबित करै ह।”

परमेसर की सुणाई नइ करबाळी नगर्या प धिक्कार

(लूका 10:13–15)

20ईसु बा नगर्यानै दिदकारबा लाग्यो जाकै मांयनै बे बोळासारा चमत्कार कर्या हा। क्युं क बठै का मिनख आपका पापऊँ तौबा कोनी कर्या। 21“खुराजीन अर बेतसदा म रेह्बाळा मिनखा प हाय ह अत्ता-अत्ता ताजूब का काम आ नगर्या म कर्या गया, ज अ काम सूर अर सैदा नगर्या म कर्या जाता जणा बठै का मिनख बोरी का गाबा पेर'र खुद प राख बुरकार, कदकाई दिखा देता क बे पापऊँ तौबा कर लिआ हीं। 22पण न्यायहाळै दिन थारी दसा सूर अर सैदाऊँ बोळी बेत्ती बुरी होसी। 23अर कफरनूम म रेह्बाळो थे के राजी होवो हो, की ईस्बर नगरी जास्यो? पण थानै तो सिदो नरक म पटक्यो जासी। क्युं क थारै मांयनै जखा चमत्कार कर्या गया हा बे सदोम नगरी म कर्या जाता जणा बा नगरी आज ताँई भसी रेह्ती। 24#मत्त 10:15; लूक 10:12पण म थारूँ खेऊँ हूँ न्यायहाळै दिन थारा मिनखा की दसा सदोम नगरी का मिनखाऊँ बेत्ती खराब होसी।”

ईसुनै मानबाळानै सुक-स्यांती मिलसी

(लूका 10:21,22)

25बठैई ईसु बोल्यो “ओ परम-पिता ईस्बर नगरी अर धरती का मालिक म तेरो गुणगान करूं की तू आ बातानै ज्ञान्याऊँ अर स्याणाऊँ लखोर राखी अर गुठा छाप प आका भेदानै खोल्या। 26क्युं क ओ थारी नजर्या म चोखो हो। 27#यह 3:35; यह 1:18; 10:15मेरै हाता म मेरो परम-पिता सक्यु सूप्यो ह अर परम-पिता क अलावा कोईबी बेटानै कोनी जाणै अर कोईबी बेटा क अलावा परम-पितानै कोनी जाणै। अर बे मिनख बापनै जाणै ह जिनै बेटो बतावै ह।” 28ईसु बाऊँ बोल्यो, “हे आखता होयड़ो अर बोजऊँ दबेड़ा मिनखो मेरै कनै आओ म थानै अराम देस्युँ। 29थे मेरी हाळीनै लेल्यो अर बिनै लादल्यो अर थे मेरूँ सीखो क्युं क म सिदो-सादो अर मेरो हियो दयाऊँ भरेड़ो ह। जिऊँ थानै बी अराम मिलसी 30क्युं क मेरी हाळी अराम दायक अर मेरो बोज हळको ह।”

Atualmente Selecionado:

मत्ती 11: एस डब्लु वी

Destaque

Copiar