Matayo 5

Nkiteng'ena naiteng'eniche ꞉Yeso to ldonyuo

1Kore payie edol ꞉Yeso lturrurri, neiliep nkeper e ldonyuo. Kore payie ewuon, nepuonu looiteng'eni lenyena netii ninye, 2neiteng'en ninche ejo,

3<<Emayiana lolo ooyielo aajo laisinak era taa ltauja,

amu nenche nkitoria e chumata.

4 # Isa 61:2 Emayiana lolo ooichir,

amu keitigiri ninche.

5 # SNk 37:11 Emayiana lolo oobor,

amu ninche oojung nkop.

6 # Isa 55:1,2 Emayiana lolo oaata sumach o nkure e sotua oipida o Nkai,

amu keitiemuni ninche.

7Emayiana lolo oaata lng'er,

amu keing'erruni ninche.

8 # SNk 24:3,4 Emayiana lolo oaata ltauja supati, amu kedol ꞉ninche Nkai.

9Emayiana lolo ooitemeleticho,

amu keipoti ninche aajo nkera e Nkai.

10 # 1Pet 3:14 Emayiana lolo ooitami sina tankaraki naata sotua oipida o Nkai,

amu nenche nkitoria e chumata.

11 # 1Pet 4:14 <<Imayianana tenedeki ntae, neitami sina, neiteenikini ntae mbaa pooki torrok e sapare tankaraki nanu. 12#2Ng'a 36:16; Asat 7:52Enting'idata, nichipapa amu keikitok laata inchi te chumata, amu nejia apake eikuna payie eitam sina#5:12 Kore nejo payie eitam sina naa keitodolu ajo keri apa loibonok le Nkai. loibonok le Nkai ootii tekue ntae.

Makaat o wong'an

(Marko 9:50; Luka 14:34–35)

13 # Mrk 9:50; Luka 14:34,35 <<Irara ntae makaat#5:13 Kore ltung'ani oji kepi tana makaat too Lburania, naa keipirita ltung'ani oata nyuata ta Nkai o ng'eno nagut. e nkop, kake amaa, teneichunyie mpijan, nyo epiki aitoki payie epiju? Merokure eata tipat, mara tenenang'ari boo meeidacha ꞉ltung'ana.

14 # Yoa 8:12, 9:5 <<Irara ntae wong'an e nkop. Meisudoroi lkerenket otii nkeper e ldonyuo. 15#Mrk 4:21; Luka 8:16, 11:33Nemeinoki sii lkilang'ilang'et nepukurokini loket, kake kepiki nkeper e ng'oji netala, payie eitoong ltung'ana pooki ootii nkaji. 16#1Pet 2:12Nejia sii entaas ntae: Enchoo wong'an inchi metoong'a tekue ltung'ana, payie edol ninche asat inchi supati neisis Papa linchi oti chumata.

Eyewuo Yeso aitabaya nkitanapat

17<<Emijo kayewuo aiturraa nkitanapat e Musa anaa loibonok le Nkai. Eitu alotu aitaa meitoki, kake kayewuo paatum aitabai katukul. 18#Luka 16:17Naa kedede kajoki ntae, kore ana metabana neng'ututari chumata o nkop, meatae hooyia sirata anaa lkardati loo nkitanapat oimin eitu eitabari pooki naayieuni. 19Metaa kore pooki ng'ae ogil Nkitanapata kini too kuna Kitanapat, eiteng'en lkulie metaasa nejia, naa keaku ninye le siedi te nkitoria e chumata. Kake kore pooki ng'ae oas, neiteng'enicho kuna Kitanapat, naa keipoti aajo lkitok te nkitoria e chumata. 20Amu kajoki ntae, tanaa mirara ltung'ana loosipat oleng aalang Lparisayo o laiteng'enak loo nkitanapat, naa mijing'jing katukul nkitoria e chumata.

Nkiteng'ena naipirita ngoro

(Luka 12:57–59)

21 # Nai 20:13; Nkit 5:17 <<Itining'o apa aajo ketiakaki ltung'ana le apa nchere,

amu kore loar metua, naa keichiaakino neiguanareki.

22<<Kake kajoki ntae, kore ilo ogorokino lalache lenye naa keichiaakino payie eiguanareki. Naa kore sii looidach lalache lenye ajo, <Meitoki ira,> naa keichiaakino nkiguana e nkitoo ee Lyiaudi, naa kore ilo ojo likae, <Lo madai!> naa keichiaakino nelo lmoti le nkima.

23<<Naaku, tiniyau iyie nkichooroto ino lperere la lasar, niparru ajo keata lalache lino mbae namen te iyie, 24tung'ai nkichooroto ino tekue lperere la lasar, nilo ang'as amelet o lalache lino, nilotu taa aitai nkichooroto ino tesiedi.

25<<Tesioki, tining'ore ilo litarare ewuon irukurukore to nkoitiei, payie intai sotua eitu kiya netii ladung'oni le nkiguana, nikiya ꞉ninye netii sikarii, nikinang'akini atua jila. 26Kedede kaajoki mimpung'u teinie katukul, ana talaa sintii le siedi.

Nkiteng'ena naipirita loloito

27 # Nai 20:14; Nkit 5:18 <<Itining'o apa aajo ketejoki, <Miloloito.> 28Kake kajoki nanu ntae, kore pooki ng'ae oing'or ng'oriei, neng'uar, naa etaasa ninye loloito o inia ng'oriei ta ltau lenye. 29#Mat 18:9; Mrk 9:47Kore tinikintasur ꞉nkong'u ino e tetene taasa ng'oki, tukurtu, nturrai. Amu naikach tininturraa rubata nabo e sesen, alang teneitodokini sesen lino pooki atua lmoti le nkima. 30#Mat 18:8; Mrk 9:43Kore aitoki tinikintasur nkaina ino e tetene taasa ng'oki, tudung'u, nturrai. Amu naikach tininturraa rubata nabo e sesen alang teneitodokini sesen lino pooki atua lmoti le nkima.

Nkiteng'ena naipirita arata e nkauti

(Matayo 19:9; Marko 10:11–12; Luka 16:18)

31 # Nkit 24:1–4; Mat 19:7; Mrk 10:4 <<Netejoki aitoki, <Kore ꞉ilo oar nkauti e nkitok enye, keiririkino payie eicho ninye mpalai naitodolu ajo ketaraki nkauti.> 32#Mat 19:9; Mrk 10:11,12; Luka 16:18; 1Lkor 7:10,11Kake kajoki nanu ntae, kore ilo oar nkauti e mparratut enye, mara ake teneas ꞉inia parratut enye loloito, naa etipika ninye mpaach metaasa loloito. Naa kore pooki ng'ae oyem mparratut nataraki nkauti naa ketipikaki rruachet naasie loloito.

Nkiteng'ena naipirita lmumai

33 # Lal 19:12, Nki 30:2; Nkit 23:21 <<Itining'o aitoki aajo, etiakaki ltung'ana le apa, nchere <Migil lmumai lino, kake mbung'a ilo mumai litamie Laitoriani.> 34#Yak 5:12, Isa 66:1; Mat 23:22Kake kajoki nanu ntae, emimanyare katukul, abaki chumata, amu ninye lorika le nkitoo e Nkai, 35#Isa 66:1, SNk 48:2tanaa nkop, amu ninye lorika loo nkejek enyena, tanaa Yerusalem, amu lkerenket le ilo Kinkii kitok.#5:35 Kore ilo Kinkii kitok naa Nkai eipirita tene ng'oji. 36Nimimanyare sii nkue ino, amu miindim hoo aiborrie anaa aitoroko lpapita obo. 37Enchoo <ee> inchi metaa <ee> o <mara> metaa <mara,> amu kore nkae namara ana, naa ilo torno eing'uaa.

Entacham lmang'ati linchi, nimintalaklak ntorrok

(Luka 6:29–30)

38 # Nai 21:24; Lal 24:20; Nkit 19:21 <<Itining'o apa aajo ketejoki, <Tinikikurtu ꞉ltung'ani nkong'u, nekurtuni sii nenye, naa tinikintai lalae, neitaini sii lenye.> 39Kake kajoki nanu ntae, emimbooyo ltung'ani torno. Tinikiwoch ꞉ltung'ani seder e tetene, wuatuwuataki, mikitoocho nkae. 40Naa tinikiya ꞉ltung'ani mikinguanareki tankaraki keyieu nikisimarie nkila ino e atua, nchoo abaki ne oriong. 41Naa kore likisimaki chomo kilomita nabo, chomo tenebo o ninye nkae nabo. 42Kore likiomon, nchoo, nimirriny sii ꞉ilo likiyieu nikisilen.

Entacham lmang'ati linchi

(Luka 6:27–28,32–36)

43<<Itining'o apa aajo ketejoki, <Tachama le latia ino, nimbai lmang'antita lino.> 44Kake kajoki nanu ntae, entacham lmang'ati linchi, niomonokiki lolo ooitam ntae sina, 45payie itumtum aataa nkera e Papa linchi oti chumata. Amu keitoong'oki ꞉ninye ndama lolo torrok o supati, neicho nchan loosipat o lamara loosipat. 46Amaa, tinichamcham lolo oaacham ntae, nyo laata nitumtum ntae? Amaa, meas echi laitalakunok le kodi nejia? 47Naa amaa, tinirorokiki lalachera linchi aapeny, nyo supat nitaasa alang nataasa lkulie? Aa meas echi lolo lemeyielo Nkai nejia? 48#Lal 19:2; Nkit 18:13Naaku, kore sii ntae, entaa lemeata ntioto ana payie era Papa linchi oti chumata lemeata ntioto.

Atualmente Selecionado:

Matayo 5: saq

Destaque

Copiar