Lukas 8

Parampuang-parampuang yang jaga bantu pa Yesus

1Abis itu, Yesus pigi bajalang bakuliling di kota-kota deng di kampong-kampong, Dia kase tau Kabar Bae tentang Tuhan Allah mo Berkuasa sebagai Raja pa orang-orang yang percaya pa Dia. Dia pe murit dua blas orang itu ada iko sama-sama deng Dia, 2#Mat. 27:55-56; Mrk. 15:40-41; Luk. 23:49 deng ada lagi babarapa parampuang yang iko sama-sama deng Dia. Dari parampuang-parampuang itu ada yang perna Yesus user setang-setang, deng ada yang Yesus perna kase sembu dari saki. Satu dari dorang dia pe nama Maria, yang biasa orang sebut Magdalena, Yesus perna user tuju setang dari dia. 3Ada lagi Yohana, Khuza pe bini. Khuza ini kapala pelayan di raja Herodes pe istana. Deng ada yang nama Susana deng banya parampuang laeng. Samua parampuang ini pake dong pe harta untuk bantu pa Yesus deng Dia pe murit-murit pe hidup hari-hari.

Umpama tentang bibit yang batumbu di tana ampa macam

(Mat. 13:1-9; Mrk. 4:1-9)

4Satu kali, ada banya orang dari kampong-kampong dong datang bakumpul pa Yesus. Waktu dorang samua so takumpul, Yesus kase tau satu umpama. Dia bilang, 5“Ada orang kobong satu pigi baambur bibit di kobong. Waktu dia ambur bibit itu, ada bibit yang jatu di jalang kong orang injang. Turus burung-burung di udara datang makang bibit itu sampe abis. 6Ada bibit laeng yang jatu di tana babatu-batu. Bibit itu batumbu tapi jadi kiring karna tarada aer. 7Kong ada lagi bibit yang jatu di tana yang dia pe rumpu baduri. Rumpu baduri itu me batumbu sama-sama deng bibit itu tapi dia lebe basar, jadi dia gepe tanaman yang so batumbu itu sampe mati. 8Tapi ada bibit laeng yang jatu di tana yang subur. Bibit itu batumbu deng babua banya skali sampe saratus kali lipa.”

Abis bilang umpama itu, Yesus bilang lagi, “Dengar itu bae-bae kong simpang di hati!”

Bibit yang jatu di tana ampa macam itu pe arti

(Mat. 13:10-17; Mrk. 4:10-12)

9Abis itu, Yesus pe murit-murit batanya pa Dia umpama tadi pe arti. 10#Yes. 6:9-10 Kong Yesus jawab, “Tuhan Allah biking ngoni bisa tau rahasia tentang bagimana Tuhan Allah Berkuasa sebagai Raja, tapi pa orang-orang laeng, hal itu Kita kase tau pake umpama, supaya deng bagitu, ‘Biar dorang lia, dorang tara mangarti apa yang dong lia. Biar dorang dengar, dorang tara mangarti apa yang dong dengar.’

11Ini umpama tadi itu pe arti: bibit itu Tuhan Allah pe firman. 12Bibit yang jatu di jalang, itu sama deng orang-orang yang so dengar Tuhan Allah pe firman kong Iblis datang ambe firman itu dari dong pe hati supaya jang dong percaya kong slamat dari dosa-dosa. 13Bibit yang jatu di tana yang babatu-batu, itu sama deng orang-orang yang dengar firman kong tarima itu deng hati sanang. Tapi firman itu dorang tara simpang bae-bae di dong pe hati, jadi tara batahang lama. Kalu dorang dapa susa deng cobaan, dorang tara percaya lagi pa Tuhan. 14Bibit yang jatu di tana yang ada rumpu baduri, itu sama deng orang-orang yang so dengar firman, tapi dorang pe hati tara tenang tentang dong pe hidup, dorang cuma cari harta, deng cuma suka hidup sanang. Jadi firman yang dorang dengar itu dorang tara biking, sampe firman itu tara bawa hasil apa-apa, sama deng bibit yang tara babua. 15Kong bibit yang jatu di tana yang subur, itu sama deng orang-orang yang so dengar firman, dorang simpang firman itu di dong pe hati yang bae, kong dorang biking firman itu turus-turus di dong pe hidup hari-hari.”

Umpama tentang lampu

(Mrk. 4:21-25)

16 # Mat. 5:15; Luk. 11:33 Yesus bilang lagi, “Tara ada orang yang pasang lampu kong tutu lampu itu deng satu barang atau taru di bawa koi. Tapi pasti dia taru lampu itu di dia pe tampa supaya samua orang yang maso di ruma bisa lia lampu pe cahaya. 17#Mat. 10:26; Mrk. 4:22; Luk. 12:2 Itu pe arti, apa yang skarang ada tasambunyi, nanti orang mo dapa tau, deng samua rahasia akan tabongkar. 18#Mat. 13:12, 25:29; Mrk. 4:25; Luk. 19:26 Karna itu, dengar bae-bae apa yang Kita bilang ini. Barang, kalu orang tarima apa yang Kita bilang, nanti Tuhan Allah mo bantu dia mangarti lebe banya. Tapi orang yang tara tarima apa yang Kita bilang, apa yang dia anggap dia so mangarti, Tuhan Allah akan ambe dari dia.”

Orang yang biking Tuhan pe firman, dia itu Yesus pe keluarga

(Mat. 12:46-50; Mrk. 3:31-35)

19Satu kali, Yesus pe mama deng Dia pe sudara-sudara datang lia pa Dia, tapi dorang tara bisa badekat karna ada banya skali orang. 20Di situ ada satu orang yang kase tau pa Yesus, “Bapa, Bapa pe mama deng sudara-sudara ada di luar. Dorang mau baku dapa deng Bapa.”

21Kong Yesus bilang, “Sapa yang dengar deng biking Tuhan Allah pe firman, dorang itu suda Kita pe mama deng Kita pe sudara-sudara.”

Yesus kase berenti angin kancang

(Mat. 8:23-27; Mrk. 4:35-41)

22Satu kali, Yesus deng Dia pe murit-murit nae di parau. Dia bilang pa dorang, “Mari suda torang ka sana di sabla talaga.” Turus dorang ka sana. 23Waktu dorang sementara balayar, Yesus tidor. Kage-kage, angin kancang skali batiop kong dong pe parau ponong deng aer, sampe dorang so mo tenggelam.

24Turus Yesus pe murit-murit kase bangun kong bilang pa Dia, “Guru, Guru, torang so mo mati ini!”

Yesus bangun kong togor angin deng omba basar itu. Turus, angin deng omba itu berenti, kong talaga itu jadi todo.

25Kong Yesus bilang pa Dia pe murit-murit, “Bikiapa kong ngoni tara percaya pa Kita?”

Dorang jadi tako deng herang, kong dorang baku bilang, “Dia parenta pa angin deng omba kong angin deng omba me iko Dia pe parenta! Orang macam apa Dia ini e?”

Yesus user setang pa satu orang di daera Gerasa

(Mat. 8:28-34; Mrk. 5:1-20)

26Yesus deng Dia pe murit-murit balayar turus sampe di talaga Galilea pe sabla, di orang Gerasa pe daera.#8:26: Orang Gerasa pe daera ini ada sebagian orang bilang, ‘Gadara’ deng sebagian lagi bilang, ‘Gergesa’. 27Waktu Yesus turung dari parau, ada laki-laki satu datang pa Yesus. Dia kemasukan banya setang. Dia datang dari kota yang di dekat situ kong dia so lama tara pake baju deng so lama tara tinggal di ruma, dia cuma tinggal di kubur-kubur goa. 28Bagitu dia lia pa Yesus, dia bataria deng berlutut pa Yesus pe muka. Turus, dia bicara kuat-kuat bagini, “Ado Yesus, Tuhan Allah yang Paling Tinggi pe Anak! Ngana mo biking apa pa kita? Kita mohon, jang siksa pa kita.” 29Orang itu bilang bagitu pa Yesus, barang Yesus baru suru setang-setang kaluar dari pa dia. Karna setang-setang itu amper salalu kuasai pa orang itu, sampe orang-orang di kota itu jaga ika dia pe tangan deng kaki pake rante untuk tahang pa dia. Tapi orang itu dapa kase putus rante itu, kong setang-setang bawa pa dia di padang gurun, tampa yang jao dari kampong.

30Kong Yesus tanya pa setang yang ada pa orang itu, “Ngana pe nama sapa?”

Setang itu jawab, “Torang pe nama Legion.” Legion pe arti, ‘deng ribu’, barang ada banya skali setang yang kuasai pa orang itu.

31Kong setang-setang itu bamohon pa Yesus supaya jang Dia suru dong maso di jurang maut, tampa tahang setang-setang.

32Tara jao dari situ, ada babi banya skali yang sementara bacari makang di panta-panta gunung. Kong setang-setang itu bamohon pa Yesus supaya Dia kase biar dorang maso di babi-babi itu. Kong Yesus kase iko dong pe mau. 33Turus setang-setang itu kaluar dari orang itu, kong maso di babi-babi. Abis itu, babi-babi itu lari kancang di pinggir jurang, turus samua balumpa ka bawa di talaga kong mati di situ.

34Pe lia bagitu, orang-orang yang jaga babi-babi itu lari. Pe sampe di kota deng kampong-kampong di dekat situ, dong carita samua yang so jadi. 35Abis itu, orang-orang dari kota deng kampong-kampong di dekat situ datang untuk lia apa yang jadi. Dorang datang pa Yesus kong lia orang yang kemasukan so dudu di dekat Yesus pe kaki, dia so bae kong dia so pake baju. Pe lia itu, dorang jadi tako. 36Orang-orang yang lia samua itu, dorang carita pa orang-orang yang baru datang di situ bagimana sampe orang yang kemasukan itu so bae. 37Kong samua orang di daera Gerasa bamohon pa Yesus supaya Dia kase tinggal dorang pe daera karna dorang samua so tako skali.

Karna itu Yesus nae di parau kong balayar ulang. 38Orang yang tadi kemasukan itu bamohon pa Yesus supaya dia bisa iko pa Yesus. Tapi Yesus suru dia pigi. Yesus bilang, 39“Lebe bae, ngana pulang suda di ngana pe ruma, kong carita samua yang Tuhan Allah biking pa ngana.”

Jadi orang itu pulang kong kase carita pa orang-orang di samua tampa di kota itu samua yang Yesus so biking pa dia.

Yairus pe ana hidup ulang Parampuang yang pendarahan sembu

(Mat. 9:18-26; Mrk. 5:21-43)

40Waktu Yesus bale dari sabla talaga, orang banya sambut pa Dia deng rasa sanang, karna dong samua ada tunggu-tunggu pa Dia. 41Waktu itu, ada satu orang datang pa Yesus, dia pe nama Yairus. Dia itu kapala di satu ruma ibada agama Yahudi. Dia berlutut pa Yesus pe muka kong bamohon supaya Yesus datang pa dia pe ruma. 42Barang, dia pe ana yang cuma satu itu ada saki amper mati. Dia pe ana itu parampuang, dia pe umur kira-kira dua blas taong.

Yesus pigi pa Yairus pe ruma. Sementara Yesus bajalang ka sana, ada orang banya skali yang baku-baku gepe mo badekat pa Yesus. 43Di orang banya yang baku-baku gepe itu ada parampuang satu yang so dua blas taong menderita karna pendarahan. [Dia so kase abis samua dia pe harta untuk barobat di sagala dokter], tapi tarada satu yang bisa kase sembu pa dia.#8:43: Di babarapa teks asli bahasa Yunani dulu-dulu, kata-kata, Dia so kase abis samua dia pe harta untuk barobat di sagala dokter, itu tara ada. 44Parampuang itu badekat pa Yesus dari balakang kong dia sontong Yesus pe ujung juba. Waktu itu suda, dia pe pendarahan langsung berenti.

45Yesus tanya, “Sapa yang sontong pa Kita?”

Samua orang tara ada yang barani mangaku. Kong Petrus bilang pa Yesus, “Guru, ada banya skali orang yang baku-baku gepe deng Guru ini kong!”

46Yesus bilang, “Tapi pasti ada satu orang yang sontong pa Kita, barang Kita rasa ada kuasa yang kaluar dari Kita pe badan untuk kase sembu pa dia.”

47Parampuang itu barasa apa yang dia biking itu tara bisa sambunyi, jadi deng totofore dia ka sana berlutut pa Yesus pe muka. Di samua orang di situ pe muka, dia carita, bikiapa sampe dia sontong Yesus pe juba. Dia me bilang waktu dia sontong pa Yesus, dia langsung sembu.

48Kong Yesus bilang pa parampuang itu, “Ibu,#8:48: Kata ibu ini sebenarnya di teks asli pake istila, ‘anak-Ku’ untuk kase tunju, Yesus rasa kasiang pa parampuang itu. skarang ibu so sembu karna percaya pa Kita. Pulang suda deng hati tenang.”

49Bagitu Yesus masi bicara, orang satu dari Yairus pe ruma datang kong bilang pa Yairus, “Bapa, bapa pe ana so mati. Jadi tara usa biking pusing lagi pa Guru.”

50Waktu Yesus dengar apa yang orang itu bilang, Dia bilang pa Yairus, “Jang tako, percaya saja. Bapa pe ana pasti mo sembu.”

51Waktu dorang so sampe di Yairus pe ruma, Yesus tara kase bae orang-orang maso di dalam. Yang bisa maso di situ cuma Petrus, Yohanes, Yakobus deng ana itu pe papa deng mama. 52Samua orang sementara manangis deng badodora pa ana yang mati itu. Tapi Yesus bilang, “Jang manangis. Ana ini tara mati. Dia cuma tidor.”

53Pe dengar Yesus bilang bagitu, dorang cuma kase tatawa pa Dia, karna dorang tau ana itu so mati.

54Abis itu Yesus pegang ana itu pe tangan deng bilang bagini, “Ana e, bangun suda!” 55Kong ana itu hidup ulang,#8:55: Di teks asli untuk kata, hidup ulang, ada tulis, ‘dia pe roh ada bale ulang pa dia’. turus badiri. Abis itu Yesus suru dorang kase makang pa ana itu. 56Ana itu pe papa deng mama jadi herang skali. Tapi Yesus larang dorang kase carita pa sapa-sapa tentang apa yang jadi itu.

Atualmente Selecionado:

Lukas 8: PB MMU

Destaque

Copiar