Yohanes 8

Parampuang satu dapa tangka ada baku tidor deng orang yang bukang dia pe laki

1Yesus pigi di Bukit Zaitun. 2Dia pe beso pagi-pagi skali, Yesus pigi ulang di Ruma Ibada Pusat pe kompleks. Banya orang datang pa Dia, turus Dia dudu kong mangajar pa dorang di situ.

3Waktu Yesus sementara mangajar, pemimpin-pemimpin agama Yahudi datang pa Dia. Dorang itu guru-guru agama yang ahli lima kitab Musa deng orang dari aliran fanatik yang pe nama Farisi. Dorang bawa parampuang satu yang dong dapa riki ada baku tidor deng orang yang bukang dia pe laki. 4Dorang kase badiri pa dia di orang banya pe tenga-tenga, kong dong bilang pa Yesus, “Guru, parampuang ini dapa tangka waktu dia ada baku tidor deng orang yang bukang dia pe laki. 5#Im. 20:10; Ul. 22:22-24 Kalu iko aturan-aturan di lima kitab Musa, parampuang-parampuang yang macam bagini, musti dapa lempar deng batu sampe mati. Kalu menurut Guru bagimana?” 6Dorang tanya bagitu untuk tes pa Yesus, supaya kalu Dia jawab sala, dorang ada alasan untuk kase sala pa Dia. Tapi Yesus cuma maruku kong batulis deng Dia pe jari di tana.

7Waktu dorang tanya turus-turus pa Yesus, Dia badiri kong bilang pa dorang, “Sapa dari ngoni yang tara berdosa, dia suda yang kamuka lempar pa parampuang ini deng batu.” 8Abis itu, Dia maruku ulang kong batulis di tana.

9Waktu guru-guru agama Yahudi yang ahli lima kitab Musa deng orang-orang Yahudi dari aliran Farisi dengar Yesus bilang bagitu, dorang mulai pigi satu-satu dari situ, mulai dari yang paling tua. Kong dia pe ahir kabawa, tinggal Yesus sandiri deng parampuang itu yang masi ada di situ. 10Turus Yesus badiri kong tanya pa parampuang itu, “Ibu, dong samua yang mo hukum pa ibu so di mana? Tara ada satu orang yang kase hukuman pa ibu?”

11Parampuang itu jawab, “Tara ada, Bapa.”

Kong Yesus bilang pa dia, “Kita me tara kase hukuman pa ibu. Pigi suda, kong mulai skarang jang biking dosa lagi e!”]

Yesus itu tarang dunia

12 # Mat. 5:14; Yoh. 9:5 Yesus kase turus Dia pe bicara pa orang banya yang masi ada di situ bagini, “Kita ini tarang dunia yang kase tarang manusia pe hati. Sapa saja yang iko pa Kita, dia itu tara akan hidup dalam galap, tapi dia akan hidup di dalam tarang, yang biking dia dapa hidup deng Tuhan Allah slama-lamanya.”

13 # Yoh. 5:31 Kong orang-orang Yahudi dari aliran Farisi bilang pa Yesus, “Yang Bapa bilang itu tara butul, karna Bapa ada basaksi tentang Bapa pe diri sandiri.”

14Yesus bilang pa dorang, “Biar lagi Kita basaksi tentang Kita pe diri sandiri, tapi yang Kita kase tau itu butul, karna Kita tau dari mana Kita datang deng ka mana Kita pigi. Tapi ngoni, ngoni tara tau, dari mana Kita datang deng ka mana Kita pigi. 15Ngoni jaga kase sala orang iko manusia pe pikiran, tapi Kita, biar cuma satu orang me Kita tara kase sala. 16Tapi kalu Kita mo hukum orang, Kita hukum orang deng butul, karna Kita tara hukum sandiri, tapi Kita sama-sama deng Kita pe Bapa yang utus pa Kita. 17Di ngoni#8:17: Yesus lagi orang Yahudi, tapi Yesus bilang, ngoni, pa orang agama Yahudi dari aliran Farisi bagitu, barang dorang talalu pegang kuat aturan agama Yahudi sampe dorang tara mo percaya pa Yesus. pe aturan-aturan di lima kitab Musa ada tatulis bagini: kalu mo basaksi tentang satu hal, musti ada dua orang yang basaksi supaya tau itu butul. 18Bagitu lagi, ada dua yang basaksi tentang Kita: Kita pe diri sandiri, deng Bapa yang so utus pa Kita.”

19Kong dorang bilang pa Dia, “Di mana Guru pe Bapa kong?”

Yesus jawab, “Ngoni tara kanal pa Kita, deng ngoni me tara kanal pa Kita pe Bapa. Kalu ngoni kanal pa Kita, pasti ngoni kanal lagi pa Kita pe Bapa.”

20Kata-kata ini Yesus bilang waktu Dia sementara mangajar di Ruma Ibada Pusat pe kompleks, dekat tampa taru kotak persembahan. Tapi tara ada satu orang yang tangka pa Dia, karna bolong sampe dia pe waktu.

Yesus dari sorga deng mo babale di sana

21Jadi, Yesus bicara lagi waktu Dia sementara mangajar di Ruma Ibada Pusat pe kompleks bagini, “Kita mo pigi di tampa laeng, deng ngoni mo cari-cari pa Kita, tapi ngoni tara dapa pa Kita. Ngoni tara percaya pa Kita, jadi waktu ngoni mati, ngoni pe dosa-dosa tara dapa ampun. Kong di tampa yang Kita mo pigi itu, ngoni tara mungkin pigi di situ.”

22Pe dengar itu, pemimpin-pemimpin agama Yahudi baku bilang, “Dia mo bunu diri kaapa? Barang Dia bilang, di tampa yang Dia mo pigi, torang tara mungkin pigi di situ.”

23Kong Yesus bilang pa dorang, “Ngoni ini orang-orang yang pe asal dari dunia ini, tapi Kita pe asal dari sorga. Ngoni cuma tau orang-orang di dunia pe pikiran, tapi Kita lebe dari itu. 24Jadi tadi Kita bilang pa ngoni, ngoni akan mati karna ngoni pe dosa-dosa tara dapa ampun. Barang, ngoni tara percaya ‘Kita ini’#8:24: Waktu Yesus bilang, Kita ini, Dia bilang itu pake kata-kata yang sama deng yang waktu Tuhan Allah kase kanal tentang Dia pe diri sandiri pa nabi Musa (Kel. 3:14). Jadi Yesus pe maksut, Dia itu suda Tuhan Allah lagi. Dia suda, sama deng yang Kita so perna bilang pa ngoni.”

25Kong dorang bilang pa Dia, “Jadi, Bapa ini sapa?”

Yesus jawab pa dorang, “Kita ini sama deng yang Kita so kase tau pa ngoni dari dulu. 26Sebenarnya masi banya lagi yang musti Kita bilang deng kase sala pa ngoni. Tapi Kita cuma mo bilang pa ngoni apa yang Kita dengar dari Dia yang so utus pa Kita. Yang Dia bilang itu butul, kong itu suda yang Kita kase tau pa orang-orang di dunia.”

27Orang-orang yang ada badengar pa Yesus tara mangarti, yang Yesus sementara bilang pa dorang itu tentang Dia pe Bapa di sorga. 28Jadi, Yesus bilang pa dorang, “Nanti waktu ngoni so angka pa Anak Manusia yang dari sorga untuk dapa salib, baru ngoni sadar, Dia itu Kita ini suda yang Tuhan Allah janji. Kong ngoni lagi mo tau, Kita tara biking apa-apa iko Kita pe mau sandiri, tapi samua yang Kita bilang, itu dari Bapa sama deng yang Bapa ajar pa Kita. 29Kong Dia yang so utus pa Kita, ada sama-sama deng Kita. Dia tara perna kase biar Kita sandiri, karna Kita salalu biking Dia pe hati sanang.”

30Waktu dorang dengar Yesus bilang samua itu, banya orang jadi percaya pa Dia.

Ajaran yang butul biking torang bebas dari dosa

31Turus, Yesus bilang pa orang-orang agama Yahudi yang so percaya pa Dia, “Kalu ngoni biking turus Kita pe ajaran, ngoni butul-butul Kita pe murit. 32Deng ngoni akan tau yang butul dari Tuhan Allah, kong itu mo biking ngoni jadi bebas, tara sama deng orang karja yang taika deng dia pe tuang.”

33 # Mat. 3:9; Luk. 3:8 Kong dorang bilang pa Dia, “Torang ini Abraham pe turunan, kong torang tara perna jadi orang karja yang taika deng dia pe tuang. Jadi bagimana kong Bapa bilang, torang ini mo bebas?”

34Yesus bilang pa dorang, “Inga bae-bae yang Kita bilang ini. Tiap orang yang biking dosa, dia taika deng dosa, sama deng dosa itu biking dia jadi orang karja. 35Ambe conto, orang yang jadi orang karja, dia tara tinggal tetap di dia pe tuang pe ruma deng dia pe tuang pe keluarga. Tapi kalu orang itu ana, dia akan tinggal sama-sama turus deng dia pe keluarga di dalam ruma itu. 36Jadi kalu Anak Allah kase bebas pa ngoni dari dosa, ngoni butul-butul so bebas.

37Kita tau, ngoni ini Abraham pe turunan, tapi biar bagitu ngoni berusaha mo bunu pa Kita, karna ngoni tara mau tarima Kita pe ajaran. 38Yang Kita ajar pa ngoni itu, apa yang Kita lia dari Kita pe Bapa. Tapi ngoni, ngoni iko apa yang ngoni dengar dari ngoni pe papa.”

39Dorang bilang pa Dia, “Torang pe papa itu Abraham.”

Yesus bilang pa dorang, “Kalu ngoni ini butul Abraham pe turunan, tantu ngoni biking sama deng yang Abraham so biking. 40Tapi apa yang ngoni biking tara sama deng Abraham, mala ngoni berusaha mo bunu pa Kita cuma karna Kita so bilang pa ngoni ajaran yang butul, yang Kita dengar dari Tuhan Allah. Apa yang ngoni biking itu tara iko sama deng yang Abraham so biking. 41Tapi ngoni so biking iko ngoni pe papa yang laeng pe conto.”

Dorang jawab, “Ee, torang ini bukang ana di luar nika. Torang pe Bapa cuma satu, Dia itu Tuhan Allah.”

42Yesus bilang pa dorang, “Kalu Tuhan Allah itu ngoni pe Bapa, ngoni akan sayang pa Kita, barang Kita ini datang dari Tuhan Allah kong skarang Kita ada di sini. Kita datang bukang karna Kita pe mau sandiri, tapi karna Dia suda yang utus pa Kita. 43Ngoni tara mangarti deng apa yang Kita so bilang, karna ngoni tara mau tarima Kita pe ajaran. 44Ngoni pe papa itu Iblis, setang-setang pe raja, barang ngoni suka biking ngoni pe papa itu pe mau. Iblis itu, dari dulu sampe skarang ini, dia pangbunu orang. Dia tara tau biking yang butul, karna pa dia itu tara ada yang butul. Waktu dia bafoya, dia bilang itu memang dari dia pe sifat sandiri, karna dia itu pangbafoya, kong dia itu samua pangbafoya pe papa. 45Tapi karna Kita ini jaga kase tau ajaran yang butul, ngoni tara percaya pa Kita. 46Sapa dari ngoni yang bole kase bukti, bilang Kita biking dosa? Tara ada to? Kalu Kita bicara yang butul, bikiapa kong ngoni tara percaya pa Kita? 47Sapa saja yang pe asal dari Tuhan Allah, dia dengar kong tarima Tuhan Allah pe ajaran. Tapi ngoni ini tara mau dengar Tuhan Allah pe ajaran, karna ngoni pe asal bukang dari Tuhan Allah.”

Yesus itu so kamuka ada waktu Abraham bolong lahir

48Pemimpin-pemimpin agama Yahudi langsung hina pa Yesus, “Ee Bapa, memang butul yang torang bilang, Bapa ini bukang orang Israel, tapi Bapa ini orang Samaria#8:48: Orang Samaria itu yang orang Yahudi anggap dorang itu bukang Tuhan Allah pe umat, deng dorang itu sesat. yang so kemasukan setang.”

49Yesus jawab, “Kita ini tara kemasukan setang. Kita hormati pa Kita pe Bapa, tapi ngoni hina pa Kita. 50Kita tara cari puji deng hormat untuk Kita pe diri sandiri. Ada Satu yang mau supaya Kita dapa puji deng hormat, deng Dia itu suda yang mo adili pa sapa yang sala deng sapa yang butul. 51Inga bae-bae yang Kita bilang pa ngoni ini. Sapa saja yang iko Kita pe ajaran, dia tara akan mati sampe slama-lamanya.”

52Pemimpin-pemimpin agama Yahudi itu bilang pa Dia, “Skarang so jelas, Bapa memang kemasukan setang. Abraham deng nabi-nabi laeng so mati samua, tapi Bapa bilang kata, sapa yang iko Bapa pe ajaran, orang itu tara akan mati sampe slama-lamanya. 53Jang sampe Bapa bapikir Bapa lebe hebat dari torang pe orang tua dulu-dulu, Abraham. Memang dia so mati. Nabi-nabi laeng me so mati. Bapa ini sapa kong bicara macam bagitu?”

54Yesus jawab, “Kalu Kita cari puji deng hormat, pujian itu tara ada dia pe guna. Tapi Kita pe Bapa yang puji deng hormat pa Kita. Kong Dia itu suda yang ngoni jaga bilang ngoni pe Tuhan Allah. 55Tapi sebenarnya ngoni tara kanal pa Dia. Kita ini yang kanal pa Dia. Kalu Kita bilang Kita tara kanal pa Dia, Kita ini pangbafoya sama deng ngoni. Tapi yang sebenarnya, Kita kanal pa Dia, deng Kita jaga iko apa yang Dia bilang. 56Ngoni pe orang tua dulu-dulu Abraham sanang skali waktu dia masi hidup, barang dia tau Tuhan Allah pe janji, nanti dia mo lia Kita datang. Kong skarang waktu Kita datang, Abraham so lia Kita so datang, jadi dia sanang skali.”

57Pe dengar Yesus bilang bagitu, pemimpin-pemimpin agama Yahudi itu bilang pa Dia, “Bapa pe umur saja bolong lima pulu taong. Bagimana kong Bapa bilang Bapa so lia pa Abraham?”

58 # Kel. 3:14 Yesus jawab, “Dengar bae-bae yang Kita bilang pa ngoni ini. Waktu Abraham bolong lahir, Kita ini#8:58: Kel. 3:14 so kamuka ada.”

59 # Yoh. 5:18 Pe dengar Yesus bilang bagitu, pemimpin-pemimpin agama Yahudi itu ambe batu mo lempar pa Dia, tapi tara sangka-sangka Yesus so pigi kaluar dari Ruma Ibada Pusat.

Atualmente Selecionado:

Yohanes 8: PB MMU

Destaque

Copiar