Kutoma 5
5
Pidzukulu pya Adamu
(1Mbi. 1.1-4)
1Ipi mphidzukulu pya Adamu. Pidalenga Mulungu anthu, iye adaasasanya mwakulandana na iye ene.#Kut. 1.27, 28. 2Iye adaalenga iwo mamuna na mkazi mbaatsanzayisa. Tenepo iye adaathula “Anthu.”#Mt. 19.4; Mk. 10.6. 3Pikhali Adamu pyaka dzana na makumatatu pyakubalwa, iye adabala mwana wamamuna wakulandana na iye mbamthula Seti. 4Kubuluka penepo Adamu adakhala pontho na moyo pyaka pinango madzana masere. Iye adabala pontho ana anango 5mbafa ana pyaka madzana mafemba na makumatatu.
6Pikhali Seti na pyaka dzana na pishanu pyakubalwa, iye adabala mwana wamamuna dzinache Enosi. 7Kubuluka penepo adakhala pontho na moyo pyaka pinango madzana masere na pinomwe. Iye adabala ana anango 8mbafa ana pyaka madzana mafemba na khumi na piwiri.
9Pikhali Enosi na pyaka makumafemba pyakubalwa, iye adabala mwana wamamuna dzinache Kenani. 10Kubuluka penepo adakhala pontho na moyo pyaka pinango madzana masere na khumi na pishanu. Iye adabala ana anango 11mbafa ana pyaka madzana mafemba na pishanu.
12Pikhali Kenani pyaka makumanomwe pyakubalwa, iye adabala mwana wamamuna dzinache Mahalalele. 13Kubuluka penepo adakhala pontho na moyo pyaka pinango madzana masere na makumanayi. Iye adabala ana anango 14mbafa ana pyaka madzana mafemba na khumi.
15Pikhali Mahalalele pyaka makumatanthatu na pishanu pyakubalwa, iye adabala mwana wamamuna dzinache Yaredi. 16Kubuluka penepo adakhala pontho na moyo pyaka pinango madzana masere na makumatatu. Iye adabala ana anango 17mbafa ana pyaka madzana masere na makumafemba na pishanu.
18Pikhali Yaredi pyaka dzana na makumatanthatu na piwiri pyakubalwa, iye adabala mwana wamamuna dzinache Enoki. 19Kubuluka penepo adakhala pontho na moyo pyaka pinango madzana masere. Iye adabala ana anango 20mbafa ana pyaka madzana mafemba na makumatanthatu na piwiri.
21Pikhali Enoki pyaka makumatanthatu na pishanu pyakubalwa, iye adabala mwana wamamuna dzinache Metusela. 22Kubuluka penepo Enoki adakhala na moyo wakuphatizana na Mulungu pyaka madzana matatu. Iye adabala ana anango 23mbafa ana pyaka madzana matatu na makumatanthatu na pishanu. 24Enoki moyo wache onsene adakhala mukuphatizana na Mulungu. Kubuluka penepo iye hadaonekeve tayu, thangwi Mulungu adamkwata.#Aheb. 11.5; Yud. 14.
25Pikhali Metusela pyaka dzana na makumasere na pinomwe pyakubalwa, iye adabala mwana wamamuna dzinache Lameki. 26Kubuluka penepo adakhala pontho na moyo pyaka pinango madzana manomwe na makumasere na piwiri. Iye adabala ana anango 27mbafa ana pyaka madzana mafemba na makumatanthatu na pifemba.
28Pikhali Lameki pyaka dzana na makumasere na piwiri pyakubalwa, iye adabala mwana wamamuna 29mbalonga mbati, “Kubuluka kuna mataka onthowo ale adatembererwa na MBUYA mwana ushu anadzesa chiphedzo kubuluka panyatwa zathu zakuphata basa mwakunensa.” Tenepo mwanayo adamthula Nowa.#5.29 Nowa: Dzina yeneyi imbaveka ninga ya Chiheberi yakuti “Chiphedzo.” 30Lameki adakhala pontho na moyo pyaka pinango madzana mashanu na makumafemba na pishanu. Iye adabala ana anango 31mbafa ana pyaka madzana manomwe na makumanomwe na pinomwe.
32Pidakwanisa Nowa pyaka madzana mashanu, iye adabala ana atatu achimuna dzinawo Semu, Hamu na Yafeti.
Atualmente Selecionado:
Kutoma 5: SenaMw
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Bible Society of Malawi
