Naanearü ügüchiga 11
11
Torre ga máchanexü̃chixü̃ ga Babéwa naxügüxü̃
1Rü yexguma ga guxü̃ma ga duü̃xü̃gü rü wüxitama ga nagawa nidexagü.
2Rü ínachoxü̃ nawa ga yema naane ga éstewaama yexmaxü̃. Rü nawa nangugü ga wüxi ga naane ga metachinüxü̃ ga Chináxanewa yexmaxü̃. Rü yexma naxãchiü̃gü.
3-4Rü wüxi ga ngunexü̃gu rü nügümaxã nidexagü rü ñanagürügü: —¡Ngĩxã tanaxü ya wüxi ya ĩane rü wüxi i torre i máchanexü̃chixü̃ i daxũguxü̃ i naanewa nguxü̃! Rü ngẽmaãcü tá tachiga rü wüxiwa tangexmagü rü taxũtáma yigüna tixĩgachi —ñanagürügü. Rü yemaca̱x nutachicüxü mucüma ga ladriyu nanaxügü rü ñu̱xũchi ínanagu. Rü cheméü̃tucharachicüxü rü o̱xwüchara nixĩ i norü ladriyuarü ñaxcuruxü̃. Rü yemaacü ladriyumaxã nanaxügü ga yema torre ga daxũguxü̃ ga naanewa nguxchaxü̃xü̃.
5Natürü nüma ga Cori ya Tupana rü ínarüxĩ nax íyadauãxü̃ca̱x ga guma ĩane rü yema torre ga duü̃xü̃gü íxügüxü̃.
6Rü nügüãẽwa ñanagürü: —Ñaa duü̃xü̃gü rü wüxiwatama nangẽxmagü rü wüxitama i nagawa nidexagü. Rü ngẽmaca̱x nixĩ i naxügüãxü̃ i ñaa puracü. Rü ñu̱xma rü nataxuma i ta̱xacü i tá íyachaxãchigüxẽẽxü̃ nax nüxü̃ naxoexü̃ca̱x i ngẽma.
7¡Rü ngĩxã ítarüxĩgü nax naguxü̃raü̃xü̃ i nagawa yadexagüxẽẽchigüxü̃ca̱x nax tama nügüga nacua̱xgüxü̃ca̱x i ngẽma duü̃xü̃gü! —ñanagürü.
8Rü yemaacü nixĩ ga Cori ya Tupana ga guxü̃ ga naanegu nawooneãxü̃ ga yema duü̃xü̃gü. Rü yemaacü nüxü̃ narüxoe ga nax naxügüãxü̃ ga guma ĩane.
9Rü guma ĩane rü Babégu naxãéga yerü yema naanewa nixĩ ga Cori ya Tupana nango̱xẽẽxü̃ ga muxü̃ma ga toraxü̃xü̃ ga naga nax to ga nagawachigü yadexagüxü̃ ga ñoma ga naanecüã̱x ga duü̃xü̃gü. Rü yemaacü guxü̃ ga naanegu Tupana nanawoone.
Chéü̃taagüchiga
(1 Cr. 1.24-27)
10Rü ñaagü nixĩ ga nataagü ga Chéü̃ ga Noé nane. Rü taxre ga taunecü nawena ga gumá mucü ga taxüchicü ga yexguma Chéü̃ nüxü̃́ yexmagu ga 100 ga taunecü, rü nabu ga nane ga Arpacháx.
11Rü yemawena ga Chéü̃ rü 500 ga taunecü namaxü̃ rü nüxü̃́ nayexma ga togü ga nanegü rü naxacügü.
12Rü Arpacháx rü nüxü̃́ nayexma ga 35 ga taunecü ga yexguma nabuxgu ga nane ga Chéra.
13Rü yemawena ga Arpacháx rü 403 ga taunecü namaxü̃ rü nüxü̃́ nayexma ga togü ga nanegü rü naxacügü.
14Rü Chéra rü nüxü̃́ nayexma ga 30 ga taunecü ga yexguma nabuxgu ga nane ga Ébe.
15Rü yemawena ga Chéra rü 403 ga taunecü namaxü̃, rü nüxü̃́ nayexma ga togü ga nanegü rü naxacügü.
16Rü Ébe rü nüxü̃́ nayexma ga 34 ga taunecü ga yexguma nabuxgu ga nane ga Pérex.
17Rü yemawena ga Ébe rü 430 ga taunecü namaxü̃ rü nüxü̃́ nayexma ga togü ga nanegü rü naxacügü.
18Rü Pérex rü nüxü̃́ nayexma ga 30 ga taunecü ga yexguma nabuxgu ga nane ga Reú.
19Rü yemawena ga Pérex rü 209 ga taunecü namaxü̃ rü nüxü̃́ nayexma ga togü ga nanegü rü naxacügü.
20Rü Reú rü nüxü̃́ nayexma ga 32 ga taunecü ga yexguma nabuxgu ga nane ga Cherúx.
21Rü yemawena ga Reú rü 207 ga taunecü namaxü̃ rü nüxü̃́ nayexma ga togü ga nanegü rü naxacügü.
22Rü Cherúx rü nüxü̃́ nayexma ga 30 ga taunecü ga yexguma nabuxgu ga nane ga Nacóx.
23Rü yemawena ga Cherúx rü 200 ga taunecü namaxü̃ rü nüxü̃́ nayexma ga togü ga nanegü rü naxacügü.
24Rü Nacóx rü nüxü̃́ nayexma ga 29 ga taunecü ga yexguma nabuxgu ga nane ga Téra.
25Rü yemawena ga Nacóx rü 119 ga taunecü namaxü̃ rü nüxü̃́ nayexma ga togü ga nanegü rü naxacügü.
26Rü Téra rü yexguma 70 ga taunecü nüxü̃́ yexmaguwena rü nüxü̃́ nayexma ga tomaepü̱x ga nanegü ga Abráü̃ rü Nacóx rü Aráü̃.
Térataagü
27Rü ñaagü nixĩ ga nataagü ga Téra. Rü nüma ga Téra rü nüxü̃́ nayexma ga tomaepü̱x ga nanegü ga Abráü̃ rü Nacóx rü Aráü̃. Rü nüma ga Aráü̃ rü Lox nanatü nixĩ.
28Rü gumá Aráü̃ rü ĩane ga Úr ga Cadéuanewa yexmanegu nayu. Rü nanatü ga Téraxü̃pa nayu nagutama ga guma ĩane ga nagu nabuxü̃ne.
29Rü Abráü̃ rü Charáimaxã naxãxma̱x rü Nacóx ga Milcámaxã. Rü ngĩma ga Milcá rü Aráü̃acü iyixĩ rü ngĩeya̱x iyixĩ ga Ixcáx.
30Natürü ga Charái rü taguma ixãxacü.
31Rü Téra rü ĩane ga Úrwa ínaxũxũ ga Cadéuanewa nax Canaáü̃anewa naxũxü̃ca̱x. Rü yéma nanaga ga nane ga Abráü̃ rü nataxa ga Lox rü naneã̱x ga Charái. Natürü yexguma guma ĩane ga Aráü̃wa nangugügu rü yexma naxãchiü̃gü.
32Rü guma ĩanegu nixĩ ga nayuxü̃ ga Téra ga yexguma 205 ga taunecü nüxü̃́ yexmagu.
Atualmente Selecionado:
Naanearü ügüchiga 11: tcaP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2022, Wycliffe Bible Translators, Inc. All rights reserved.
