Génesis 5

Adánpita miraqkuna

1 Crónicas 1.1-4

1Kaychömi qellqashqa kaykan Adánpa tsurinkunapaq y paykunapita miraqkunapaqpis.

Runatam Dios Yaya kamarqan kikintanölla.#Mat. 19.4; Mar. 10.6. 2Ollqutapis warmitapis paymi kamarqan. Kamanqan junaqmi Dios Yaya nirqan runa kayanqanta. Tsaypitam kay patsachö alli kawayänanpaq bendisirqan.#Gén. 1.27-28.

3Pachak kimsa chunka (130) watayuq Adán kaykaptinmi tsurin Set yurirqan. Tsurin Setmi taytannölla karqan. 4Tsurin Set yurinqanpita pusaq pachak (800) wata masraqmi Adán kawarqan. Paypaqa tsurinkuna ollqupis y warmipis kayarqanraqmi. 5Isqun pachak kimsa chunka (930) watayuq kaykarmi Adán wañukurqan.

6Pachak pitsqa (105) watayuq Set kaykaptinmi tsurin Enós yurirqan. 7Tsaypitam Set kawarqan pusaq pachak qanchis (807) wata masraq. Setpa tsurinkunaqa ollqupis y warmipis kayarqanmi. 8Setqa isqun pachak chunka ishkay (912) watayuqmi wañukurqan.

9Enós isqun chunka (90) watayuq kaykaptinmi tsurin Cainán yurirqan. 10Tsurin Cainán yurinqanpita Enós kawarqan pusaq pachak chunka pitsqa (815) wata masraqmi. Enóspa tsurinkuna ollqupis y warmipis kayarqanraqmi. 11Enósqa isqun pachak pitsqa (905) watayuq kaykarmi wañukurqan.

12Cainán qanchis chunka watayuq (70) kaykaptinmi tsurin Mahalaleel yurirqan. 13Tsurin Mahalaleel yurinqanpita Cainán kawarqan pusaq pachak chusku chunka (840) wata masraqmi. Cainánpa tsurinkunaqa ollqupis y warmipis kayarqanraqmi. 14Cainán isqun pachak chunka (910) watayuq kaykarmi wañukurqan.

15Mahalaleel soqta chunka pitsqa (65) watayuq kaykaptinmi tsurin Jared yurirqan. 16Tsurin Jared yurinqanpita Mahalaleel kawarqan pusaq pachak kimsa chunka (830) wata masraqmi. Mahalaleelpa tsurinkuna ollqupis y warmipis kayarqanraqmi. 17Mahalaleel pusaq pachak isqun chunka pitsqa (895) watayuq kaykarmi wañukurqan.

18Jared pachak soqta chunka ishkay (162) watayuq kaykaptinmi tsurin Enoc yurirqan. 19Tsurin Enoc yurinqanpita Jared pusaq pachak (800) wata masraqmi kawarqan. Jaredpa tsurinkuna ollqupis y warmipis kayarqanraqmi. 20Jaredpis isqun pachak soqta chunka ishkay (962) watayuq kaykarmi wañukurqan.

21Enoc soqta chunka pitsqa (65) watayuq kaykaptinmi tsurin Matusalén yurirqan. 22Enocqa Dios Yaya munanqannömi kawakurqan. Tsurin Matusalén yurinqanpita kimsa pachak (300) wata masraqmi kawarqan. Enocpa tsurinkuna ollqupis y warmipis kayarqanraqmi. 23Enoc kawarqan kimsa pachak soqta chunka pitsqa (365) watam. 24Dios Yaya munanqannö kawanqanpitam Enocta Dios Yaya kawaykaqta apakurqan.#Heb. 11.5; Jud. 14.

25Matusalén pachak pusaq chunka qanchis (187) watayuq kaykaptinmi tsurin Lamec yurirqan. 26Lamec yurinqanpita Matusalén kawarqan qanchis pachak pusaq chunka ishkay (782) wata masraqmi. Matusalénpa tsurinkuna ollqupis y warmipis kayarqanraqmi. 27Matusalénpis isqun pachak soqta chunka isqun (969) watayuq kaykarmi wañukurqan.

28Lamec pachak pusaq chunka ishkay (182) watayuq kaykaptinmi tsurin yurirqan. 29Tsurin yuriskiptinmi Lamec nirqan: <<Kay patsata Dios Yaya maldicionashqa kaptinpis kay tsurïmi yanapamäshun arurpis alläpa mana ñakanapaq>>.

Tsaynö nirmi tsurinpa shutin churarqan Noéta.#5.29 Noé ninanqa yanapakuq ninanmi. 30Noé yurinqanpita Lamec kawarqan pitsqa pachak isqun chunka pitsqa (595) wata masraqmi. Lamecpa tsurinkunaqa ollqupis y warmipis kayarqanraqmi. 31Lamecqa qanchis pachak qanchis chunka qanchis (777) watayuq kaykarmi wañukurqan.

32Noé pitsqa pachak (500) watayuq kaykaptinmi tsurinkuna yuriyarqan. Tsay tsurinkunapa shutinkunam karqan Sem, Cam y Jafet.

Atualmente Selecionado:

Génesis 5: qxn

Destaque

Copiar