Mwanzo 4
4
Ovokoliwa wa Kayiini na Apeele
1Adamu khurapalelana muukhaawe Haawa, ye khwiimittha khumpattha mwaana khuntthaja nzina la Kayiini.#4:1 Nzina ntthi la Kayiini lina maana a kampattha. Ye khulupa yoori: “Khwa otakha wa Nnyizinku kampattha mwaana wanlume.” 2Khwiimittha theenya khumpattha mwaana nkina wanlume, ttwiiye Kayiini. Khuntthaja nzina la Apeele. Apeele khwiiya makhampuzi wa pwittipwitthi, Kayiini khwiiya namalima.
3Siikhu moote, Kayiini khutiisa mishumo za mmashapa oteela omwinkha zaakha Nnyizinku. 4Apeele na ye zwaamu yawe khutiisa pwittipwitthi etile yaari yamwanzo ottheeriwa ya nliphanko mwawe, khushija khuthawula phantte epile zoosamini zaya oteela omwinkha zaakha Nnyizinku, ye khwiiya wootuveliwa ti Apeele na zaakha yawe. 5Ila Kayiini khwa zaakha yawe etile aatiisiyeeyo, Nnyizinku khuhintuveli. Tiito Kayiini khukatipukha na khufuka ajihi yawe.
6Nnyizinku khumuuzela Kayiini araka: “Wakatipukhela ni na khufuka ajihi? 7Amana weeyo oretta saana, khunkhupaleliwa? Ila amana weeyo ohiretti saana, ojuwe yoori twampi eri vanlako, entta wuuwejela yoori ewiirukhele yuushintte. Weeyo enuuhithajiya oshintta twampi yaya eto.”
8Aphano Kayiini khumuuza ttwiiye Apeele yoori: “Nlawe ntthuttu.” Noofiya ntthuttu khunzukuluwela khumuula.
9Paata ya toole, Nnyizinku khumuuzela Kayiini araka: “Ttwiiyo Apeele ori vayi?” Khujipu yoori: “Akijuweeni! Namweekesela wa ttwiiyaku ti miiyo?”
10Nnyizinku khumuuzela theenya araka: “Warettela ni etthu nkhama eti? Osiile! Va tuniya taamu ya ttwiiyo entta okhuwa. 11Nasaapi ethiiti, Woolanikha ti weeyo va tuniya ethiito enywiiyeeyo khwa mmakhono mwawo taamu ya ttwiiyo. 12Amana weeyo olima nka ohiruweraka. Va tuniya weeyo nka weettaka ojeettettela nkhama ntthu wootthira.”
13Kayiini khumuuza Nnyizinku yoori: “Hukhumu yaka khuluyeene channu akinkhitiri. 14Leelo wakiikara va tuniya apha yoori kihiiye vamote na weeyo, miiyo kinttela ojeettettela nkhama namatthira va tuniya, na wakhula anttelaaye okisikana ontta okuula.”
15Nnyizinku khunjipu yoori: “Wala! Khahiyo toowo! Wakhula otule anttelaaye owuula oniiya woohukhumwiwa swaafu sapa.” Ye khunttha alama vamwiili yoori wakhula aninsikanaaye ahimuule. 16Aphano Kayiini khumwazeyana na Nnyizinku khulawa khwiikhala nti wa Nooti#4:16 Nzina ntthi la Nooti lina maana a ojeettettela., okhu lintthamuwaawo njuwa phantte ya Eeteni.
17Ye khurapalelana muukhaawe, khwiimittha khumpattha mwanawe Enookhi. Kayiini khujeka sitati khutthaja nzina nttintthile la mwanawe Enookhi. 18Enookhi khunvokola Eraati, Eraati khunvokola Mehujayeele, Mehujayeele khunvokola Metusayeele, Metusayeele khunvokola Lameekhi.
19Lameekhi khuwaarala aakha awiri, mmote nzina lawe laari Aada. Otu nkina nzina lawe laari Siila. 20Aada khumpattha mwanawe khuntthaja nzina la Yapaali, paapa wa atthu apale aari wiikhalaaye mmaheema aari ofuwaaye nyama. 21Ttwiiye nzina lawe laari Yupaali, oto aari paapa wa atthu apale ooshi animpiyaaye tthakare na apale ampiyaaye phivi. 22Siila khumpattha mwaana khuntthaja nzina la Tupaali Kayiini, ye aari funti wa waattala zaana za khoopiri na zuuma. Tupaali Kayiini aarina nlupuwe aari wiitthiwaaye Naama.
23Lameekhi khuwooza aakha awe yoori:
“Aada na Siila!
Mwikisiileze aakha aka:
kamuula ntthu mwaasa wookivulalisa,
shaapu mmote mwaasa wookiphirisa.
24Amana Kayiini ariphiwa hukhumu swaafu sapa,
Lameekhi onttela oriphiwa swaafu saapiini na sapa.”
Ovokoliwa wa Seethi
25Adamu khurapalelana muukhaawe theenya khumpattha mwaana khuntthaja nzina la Seethi#4:25 Nzina ntthi la Seethi lina maana a oninkha., Haawa khuri: “Nluku akinkha mwaana nkinoko wonriphelavo Apeele otule ooliweeyo ti Kayiini.” 26Seethi na ye khumpattha mwaana khuntthaja nzina la Enooshi.
Wakathi aya otthuupo phi laaziyeevo waaputwiwa nzina la Nnyizinku.
Atualmente Selecionado:
Mwanzo 4: eko
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2020, Wycliffe Bible Translators, Inc. All rights reserved.
