Mat 6

Jii ɛyjuŋ se yɛ giamtene ghel

1Jesus gese suuy ge: Ghɛn yɛ toknen se yɛ loo nɛɛy kenəə kejuŋe ghɛn yɛ din ge ghele yɛn, bek ge ghɛne nɛɛye dì é ghɛn jia yî kiile əbmakte se Ba ə wɛn wɛ əb luun ɛ ɛyyio. 2Ke me se lu ge wɛ̀ loo foo kefaa se wele ketan, ghàà wɛ̀ yɛ toŋe ɛyshoŋ ge ghele yɛn ka wɛ̀ fóon. Lu ghɛɛ-ghɛɛ ka ghel əbbuame lóó ɛ́ yɛ nɛɛy ɛ ngayse ɛyjem gese nɛ̀ se jiise ge ghele yɛ kokse ghene. Mɛ suuy əbluuy se ghɛn ge ghene kiilemen əbmakte ə ghen əbjim. 3Wɛ̀ yɛ lóó foo kefaa se wele ketan, ghàà wɛ̀ nɛɛy ge əbkoy ə viɛ əbkiye keele kenəə kɛ əbkoy ə viɛ əbtaa nɛɛyen, 4ka ɛyfoo ə yiɛ yɛ lu ɛ kenlete, é Ba ə viɛ wɛ əb yɛ́nen əbnəə wɛ wɛ̀ nɛɛyen ɛ kenlete náà laame wɛ.

Jii ɛyjuŋ se yɛ jem

(Luk 11.2-4)

5Ghɛn yɛ lóó jem se Feyine, ghàà ghɛn yɛ nɛɛy ka ghel əbbuam. Ghene loo ghene yɛ koŋ se teem ɛ ngayse ɛyjem gese nɛ̀ se əmnkonen mə jiise se yɛ jem ka ghele yɛ yɛne ghene. Mɛ suuy əbluuy se ghɛn ge ghene kiilemen əbmakte ghen əbjim. 6Wɛ̀ yɛ loo jem wɛ̀ lii ɛ wɛ̀ məme ndaa è tɛk əbchio ndaa è yɛ jem se Ba ə viɛ wɛ əb yɛ́nen əbnəə wɛ ɛ́ nɛɛyen ɛ kenlete é əb náà laame wɛ̀.

7Ghɛne loo jem ghàà ghɛn yɛ yese suuy əbnəə lólò se ɛydio ka ghel ghɛ ɛ́ keen wiy Feyine sɛɛ nɛɛy, kwaate ge Feyine yio ɛyjem ə ghen bek əbnəə əbdione wɛ ghene suuyen. 8Ghàà ghɛn yɛ jem ka ghene bek ge ba ə wɛn ke kefaa kɛ ghɛne shiin nɛ ghɛn geese yɛ bif. 9Lɛɛ ka loo ghɛn yɛ jem:

Ba ə wɛs wɛ əb luun ɛ ɛyyio,

nɛɛy é ghele yɛ ngvəmle ɛyghel ə yiɛ,

10Nɛɛy é ɛysak ə yiɛ gwiy se ghele,

é ghele yɛ nɛɛy kenəə kɛ wɛ̀ kɛŋen ge ɛ́ yɛ nɛɛy ɛ ntiɛ,

kɛn ka ke luun ɛ ɛyyio.

11Fó əbfua-əbyíɛ́ne se ghɛs lan vin,

12è lɛyse mbee sɛs ka ghɛs lɛyse sɛ ghel

ghɛ ɛ́ jasen se ghɛs.

13Nɛɛy é ghɛs jia lii se ɛymomse;

tɛɛke ghɛs se ɛyfime.

[Bek ka ɛysak ə əbfone luun yiɛ, nɛ̀ kediake

gese nɛ̀ ɛykoksee, əbliy əbjim. Amen.]

14Ghɛn lòò è yɛ lɛyse mbee sɛ ghele nɛɛyen se ghɛn, é Ba ə wɛn wɛ əb luun ɛ ɛyyio yɛ lɛyse sɛne. 15Dî nɛ ghɛn lòò jia yɛ lɛyse əbnəə wɛ ghele jasen se ghɛn, é Ba ə wɛn jia yɛ lɛyse mbee sɛn.

Jii ɛyjuŋ se yɛ bam əbfua-əbyíɛ́ne

16Ghɛne yɛ loo bam əbfua-əbyíɛ́ne ghàà ghɛn yɛ lu ɛysen ɛysen ka ghele əbbuame lóó ɛ́ gvənse ɛykek se nɛɛy ge ghele keele ge ghene bame əbfua-əbyíɛ́ne. Mɛ suuye əbluuy se ghɛn ge ghene kiilemen əbmakte ə ghen əbjim əbjim. 17Wɛ̀ yɛ loo bam əbfua-əbyíɛ́ne, wɛ̀ ko suu ɛykek ə yiɛ, è sol nɛ̀ keyióséne, 18ka ghele jia yɛ ke ge wɛ̀ bame, é yɛ ke kɛn ba ə viɛ wɛ əb yɛnsen wiy ge wɛ̀ bame. É Wen wɛ əb yɛ́nen əbnəə wɛ əb luun ɛ kenlete náà me laame wɛ̀.

Ghɛn bááté ɛykɛŋ ə yɛn è lɛm nɛ lu ɛyyio

(Luk 12.33-34)

19Ghàà ghɛn yɛ baate ɛykɛŋ ə yɛn lɛme ɛ ntiɛ fɛn bene fɛ lòó babvəlese laa, é əblee baŋ, nɛ gese lu ghaa lòó ɛchoŋe choŋ. 20Ghɛn yɛ baaté ɛykɛŋ ə yɛn lɛme nɛ lu ɛyyio bene lòó babvəlese jia laa, é əblee jia baŋ, nɛ gese lòó ɛchoŋe jia kol è lii è choŋ. 21Ke lu dî bek ge ɛykɛŋ ə wele lóó lu ghááy, ɛytem ə wene yɛ lu fô.

Ɛyshiɛ lu kekaaken

(Luk 11.34-36)

22Ɛshiɛ lu kefaa kɛ ke fóon ɛyban se əbghune, nɛ ɛshiɛ ghiɛ kè loo lu è yɛ yɛn əblik, é əbghun ə viɛ əbjime yɛ lu ɛyban. 23Dî nɛ ɛ́ loo lu è yɛ lifle, é əbghun ə viɛ yɛ lu ɛ nfiine. Ɛyban yɛ ɛy luun ɛ wɛ məm lɛ sɛ̀ɛ̀ nfiine əblike jia me fin se ŋaŋ-a?

Feyine kiynen se ghele wene

(Luk 16.13; 12.22-31)

24Lòó wel jia yɛ fɛl se ɛbay ɛbaa, buu dî, é əb yɛ koŋe əblee bane əblee, kene əb yɛ yionen se əblee, kiye əblee lolo. Lòó ghɛn jia yɛ fɛl se Feyine gese fɛle se əbkaa.

25Mɛ me se suuye se ghɛn ge, ghàà ghɛn yɛ fof kum kefaa kɛ yiɛ gese nɛ̀ kɛ nəə se geese yɛ chii, gese nɛ̀ ndəy sɛ yɛ mak se əbghun. Ɛychii lɛ báà se chia əbfua-əbyíɛ́ne nɛ əbghune chia ndəyse-a? 26Ghɛn liɛ nfek se əmnənme, əm sɛɛ jia lem əbfua-əbyíɛ́ne, kaa wiy, ki wiy techia, dî nɛ Ba ə wɛn wɛ əb luun ɛ ɛyyio yiɛse ghene. Ghɛn lɛ báà se chia əmnən-a? 27Loo fof ndɛ ɛ ghɛne məm è gise kɛn kentime əbliy se wen ɛychii.

28Lu bek ghɛ wɛ ghɛne fofen kum ndəyse. Ghɛn yɛn əbgii ka əb lóó əb yɛ buse jof. Əb sɛɛ jia fɛl, baa wiy ndəyse. 29Dî nɛ mɛ suuy se ghɛn ge, chèmè nè lu əbfon wɛ Solomon wɛ əb nè lafen lɛɛy, fene ɛylaf ə wene nè báà jof è mɛy kegii kelee. 30Feyine lɛ nɛɛy nɛ əbgii wɛ əb kuyɛn əbkwak keke kejuŋ, əbgii wɛ əb kuyen lan nɛ loo lu ɛ likebvəchi ɛ́ kwaay se kiy, é əb jia nɛy loote nɛɛy é ghɛn yɛ kek kejuŋ-a, ɛybeeme yɛne bɛɛne layte ghɛ lɛ?

31Ke me se lu ge ghàà ghɛn yɛ fofe bif ge: Ghɛse nɛy yiɛ ghɛ? Ghɛse nɛ̂y nəə ghɛ, kene ghɛse nɛ̂y mak ghɛ? 32Ghel ghɛ ɛ́ báà se ke Feyine lɛme ɛytem ə ghen nɛ lu əbfua nɛ̂ ghan. Ba ə wɛn wɛ əb luun ɛ ɛyyio ke ge ghɛne shii əbfua nɛ̂ vin. 33Ghɛn yɛ luŋ nɛ lu se kiile keleŋ ɛ məme ɛysak nə Feyine, gese nɛɛye ka əb kɛŋen, é əb náà fo əbfua nɛ̂ vin se ghɛn əbjim. 34Ke me se lu ge ghàà ghɛn yɛ gel kum likebvəchi bek ge likebvəchi lu nɛ̀ ngɛkse wene. Kechii lóó ke yɛ ki sɛ wene sɛ ngɛkse.

Atualmente Selecionado:

Mat 6: oku

Destaque

Copiar