LUKE 21

Hejel wiꞌikam uwi mahkigdag

An g neid g Mark 12:41-44

1Sh am hu hebai dadha idam Jesus mash am e shulig g ha‑mahkigdag am wehhejed g geꞌe cheopi. Kush g s‑kakais muꞌi am shulig g lial. 2Tsh am hema jiwia g al shoꞌigkam oks mash d hejel wiꞌikam k atsh gohk s‑oꞌamchu am shul. Kush am neid g Jesus 3ch hab ha ahg g e‑chuhchai, “Neh, ihda al shoꞌigkam oks at baꞌich i geꞌe mahkigdag hab juh mo hegam s‑kakais. 4Hegam o ab wabsh mahk hegai mo haschu i pi tatchua no pi wabsh s‑lialiga. T wabshaba ihda al oks wehs mah mo haschu al i edgid mat hekaj wo chum kihdagk.”

Matsh wo i e wua g Tutuligo geꞌe ha‑cheopi

An g neid g Matthew 24:1-2; Mark 13:1-2

5Kush am haꞌi neneok ab amjed g geꞌe cheopi ch am aꞌaga mo si s‑kehg hab mahs ch si s‑kehg hohodaikaj hab junis ch si s‑kehg mahkigdagkaj e heosid.

Sh hab kaij g Jesus, 6“Heuꞌu. Nt wabshaba wo si shel em‑ahgi mo e aihim mat wehs wo i e shul ihda mam neid.”

Matsh g geꞌe kudutalig wo i wuhsh

An g neid g Matthew 24:3-14; Mark 13:3-13

7Sh g chuhchaij ab kakke ch hab kaij, “Hekid at hab wo i e juh ihda? Kut haschu d wo chehgidak matt heg ab wo s‑mahchk mo e aihim matki am hab wo e juh?”

8Sh hab kaij g Jesus, “Mt wo s‑e nenꞌoidad ch pi am hu wo e iattogi. Muꞌi at an wo i wuwha aꞌahidag oidam k ni‑wepo wo e chehcheg hab kaijch mo d Jiosh si Kehsha ch hab wo chei mat e ai g tash. Pi g am hu wo i ha oid idam. 9An at wo kaida mo am hahasko aꞌai e cheggia g jejewed. Kumt wabshaba pi heg hekaj wo e kudutad, chum as hems wo wohok. Hemho wa at hab wo mahsk haꞌichu wehpeg. K wabshaba pi hab d ahga mat e ai mat wo huhug g jewed. 10Jejewed at ab aꞌai wo i e cheggia. 11T an aꞌai hab wo e juh mat g jewed shaꞌi s‑ta ehbidam wo uꞌugij. T g bihugig wo gehsh k g s‑cheawagig ab wo i hih. S‑ta ehbidam haꞌichu at am wo i e chehgi ab dahm kahchim t amjed.

12“Mat koi hab wo e juh ihda, kumt an wo em‑uꞌu k wo em‑shoꞌigchud k am wo em‑uꞌapa chechopi ha wui k wo em‑kuh. Kumt wo e lodai am ha tahgio g kokownal nam pi ab s‑ni‑wohochud. 13Id at am wo em‑apꞌet mamt am wo ah g s‑kehg haꞌichu ahgaj g Jiosh. 14Pi g am heki hu wo e kudutad heg hekaj mamt has wo chei hejel e wehhejed. 15Ab ant wo em‑mah g neꞌoki ch amichudadag. Kut pi wo e nako g em‑obga mas ab wo wui kekiwua mamt has wo chei. 16Em‑jehj ch em‑wepnag ch em‑hajuni ch em‑naipijju at am wo i em‑dagito ha wui g hahaꞌichu. Kumt haꞌijj wo e koꞌij. 17Muꞌijj at wo s‑em‑kehꞌel nam pi ab ni‑hiwig. 18Mt wabshaba s‑ap am wo gahi wuwha mamtp has wo i em‑juh 19k wabsh wo s‑ha bahbgi. T g Jiosh wo em‑doꞌibia.

Mash g Jesus am ahg mat wo e padch g Jerusalem

An g neid g Matthew 24:15-21; Mark 13:14-19

20“Shondal at an wo biha g Jerusalem. Kumt hab wo s‑mahchk mo e aihim mat oi wo e padch g kihhim. 21Hemho wa at am wo ahhio dohdaꞌag wui hegam mat am wo haꞌichugk Judea chekshani ch ed. T hegam mo am haꞌichug Jerusalem kihhim t am hemho wa wo ahhio ab amjed. Kut hegam mo gam hu wabsh jegko kih pi am hu wo i wahp kihhim ch ed 22nat pi wo e ai mat wo s‑koꞌokam ha namkid g Jiosh k am wo wohokamch wehs hegai mo an oꞌohanas oꞌohanaj ed. 23Ih shoꞌig! S‑ta at ehbidam wo mahsk am ha wehhejed hegam mat wo chuꞌuchum mahmadk ch hegam mat wabsh wo kia woꞌok g ali. Ab at wo i hih g geꞌe shoꞌigdag id dahm jewed. T g s‑koꞌok ha‑namkidadag ab wo gei ha ab idam hemajkam heg hekaj ha‑chuꞌijig. 24Mt wo haꞌi ha kokda k wo haꞌi ha lilsochud k gam hu wo i ha ui mehk jewed wui. Kut g gawul mahs hemajkam an wo bei ihda Jerusalem k ia wo i e chiwiadad am hugkam mat wo kuhgit g ha‑apꞌedag g gawul mahs hemajkam.

Matsh ep wo jiwia g Jiosh alidag

An g neid g Matthew 24:29-31; Mark 13:24-27

25-26“T wo e uꞌugij mo haschu an hab chuꞌig t‑dahm. Kut s‑ta ehbidam hab wo e juh g tash ch mashad ch huhuꞌu k wo dagito g e‑wopogga. Kut g ge shuhdagi an wo wewgad ch an wo toꞌotonkad. T id wehs wo chehgi mat geꞌe haꞌichu hab wo e juh wehsko jewed dahm. T g hemajkam wo si s‑ehbidad wehs jejewed ch ed ch wo s‑e chuhug nat ge wo mahchk mat haschu has wo e juh. 27Kunt ab hahawa si s‑masma wo i hud chewagi ch ed ab Jiosh kihdag amjed ahni Jiosh si Kehsha. Kut am wo e maskogi g ni‑gewkdag. 28Bat masma wo e chehgi mo ab e aihim g ha‑doꞌibiadag hegam mat ab wo ni‑hiwgad. Kut heg hekaj wo chum si s‑ap e taht mat hekid wo i shonwua ihda mani em‑ahgid.”

Mamtsh has masma wo s‑amich g jiwhiadaj

An g neid g Matthew 24:32-35; Mark 13:28-31

29-30Tsh amjed g Jesus am ha ahgi ihda haꞌichu wepogida ahga, “Neh, mt wo s‑mahchk mo g toniabkam e aihim mamt wo nei mat g suhna jeꞌe ch nahnko mahs uꞌus ab wo i iꞌiwgi. 31K hab wa masma hab mahs mamt wo nei mat hab wo e juh idam mani am heki hu em‑ahgid k wo s‑mahchk mo e aihim mant ep wo jiwia.

32“Neh, hegam mat wo nei ihda mani em‑ahgid at d wabsh wo kia dodakamk jewed dahm mat hekid wehs am hab wo e juh. 33Wehs am gam hu hab wo i e juh ihda Jiosh nahtoi mam in neid. T wabshaba g ni‑neꞌoki pi hekid gam hu hab wo i e juh.

Mamt wo si s‑e nenꞌoidad

34“Si g wo s‑e nenꞌoidad mat haha wabsh wo em‑ai hegai tash. Mt am hu pi wo mahchk. Pi g am wo shaꞌi e hiwgid mamt wabsh si muꞌi haꞌichu k ed wo e nakogad ch wo si e gegosidad ch wo nawkkoꞌod ch g e‑kihdagkaj wo e kudutad. 35Hegai tash at am hab haha wabsh wo si e juh wehs hemajkam ha tahgio. 36Mt wo si s‑e nenꞌoidad ch wo e hoꞌigeꞌidahunad chum hekid mamt ab wo uꞌukch g gewkdag ch s‑ap am gahi wo wuhsh wehs ihda mat am hab wo e juh. Nt pi an hu haꞌichu wo em‑abch ahni Jiosh si Kehsha mamt hekid wo ha lodai g hemajkam.”

37-38Sh g Jesus wehs tashkaj am ha mashcham geꞌe cheopi ch ed. Kush muꞌijj am wui daiw wabsh i sisiꞌalimad mat ab wo kaiha. Sh am i huhuduk, sh gam hu hihhim idam Jesus Olive Uꞌus Kawulk wui ch am koksho.

Atualmente Selecionado:

LUKE 21: ood

Destaque

Copiar