luka 24

smoevovei 'o iesu

(matai 28:1-10; maluko 16:1-8; yohane 20:1-10)

1cu maikayo, ne micu moseo'ohngʉ, 'o maamespingi ihe hafa 'o ohe ayoca ci konamusngau ho uhto heuf'a. 2ihe aiti isicu pehtuezuha 'o fatu to phingi to heuf'a, 3cu yʉmeʉmʉ to feongo to heuf'a, at'inghi o'a ihe aiti 'o feango to iesu. 4ne mon'a seolʉa no ma'pepecvai, panto yoso cimo psoetiskou 'o yʉsʉhe mo aemo'au bichipi; 5mo kuici yamci 'o maamespingi ho m'ocnguyu ta ceoa, ihe mi'usni tomo yoso ho yainca: <mainci i'eima tamo mcoi ci cou 'o mo yaansou ci cou? 6o'a na mos'a yontan'e; 'amicu smoevovei 'o iesu. la talʉa 'o nia e'esi ne moso yone ngalilaya; ohsi yainca: 7<<te ahtao'te toveineni ta emucu ta mo yaa kuisi ci cou 'e okocou, spica to zuuzika, smoevovei ho tac'u miteuhi.>> >

8ihecueno talʉa 'o nia e'e to iesu, 9cu i'mi to heuf'a ho yuovei. mi'usnu to maskʉ ucni ci sitoo ho ito mocmo ci cou ho eʉsvʉta 'o ihe aiti. 10i'omo mi'usnu to sitoo ho eʉsvʉtʉ to ihe aiti mo no'upu 'o maliya to motala, yoyana, ino to yakovu ci maliya, ho i'omo fiho ci mocmo ci maamespingi. 11at'inghi 'o sitoo. ihe ta'unano mo eloʉngʉ 'e maamespingi, o'aihe taa'uzva 'o e'ehe. 12mo yʉc'ʉ 'o petelo ho toe'usnu to heuf'a, m'ohkuyu ho m'o'ayumonʉ to heuf'a, i'oc'o yʉteʉ 'o isi aiti, uk'anaci mocmosi. micu maine'e, na'na yamceni 'emo yuyafo ci a'a'ausna#panto piyo ci tposʉ noana'o uk'a 'e 1 secu eni..

to ceonʉ ne 'ima'usu

(maluko 16:12-13)

13conoc'o hie, to 'ayumona to tesi mo yoso 'ote emo'usnu to mo conci you, zou 'ima'usu 'o ongko ta you, 'o hiasi noteno ne 'elusalemu mo asonʉ 11kilo. 14mo pcaceoni ho yue'engha 'emo afu'u yuyafo ci hi'hioa. 15ne ihe seolʉa no engha, mo iachi tocmu'u tamo yoso 'o iesu, to'upu homo coeconʉ; 16ihe aiti 'o iesu, at'inghi o'a ihe honga. 17isi tuocosi to iesu: <ho mimu coeconʉ, cumas'a co imu yue'engha?>

cu tosvo 'emo yoso ho teonanac'o. 18'omo cihi zou koliupa 'o ongkosi, tuocosi 'o iesu: <tamo mimiyo ta 'elusalemu ci cou ma 'ac'os'a suu namo ih'unu o'te bochio tomo yuyafo ta mipiyohi ci hi'hioa?>

19yainca to iesu: <zous'a cuma?>

ihe yut'inga: <'ai'oeno hi'hioa to counazalo ci iesu! zou eyongensa, yonta tuhcu tamo botngonʉ ci cou ho ito hamo, hola yaahioa ho ya'ei la acʉhʉ yaa tonʉa; 20'o saisicoo ho i'o masoso'ehti ihe tʉtpʉta ho e'usna yaica, yʉsvʉta no mcoi, ho spica to zuuzika. 21omzala anana'va mingeovi ho yainca zous'a ic'o nate to'usnu ta 'isolaelu! o'amo anou maica, micu miteuhi 'e hi'hioa eni. 22mo piyo ci maamespingi ta 'ayumonamia ihe na'na poa yamci a'mi, mo sʉfeʉngnʉ uhto heuf'a, 23o'aihe aiti na feangosi. mo maine'e ho eʉsvʉta, ihe aiti na tensi, 'o tensi ihe eʉsvʉta to maamespingi ho yainca mio yaansou 'o iesu. 24panto mo maezo uhto heuf'a to lamia noteuyunu, aiti mo acʉhʉ maito e'e to maamespingi, yaeza o'a isi aiti 'o feango to iesu.>

25isicu mi'usni to iesu ho yainca: <kaebʉc'o mimu'so a'ʉmtʉ nongonongo! mainci imus'a na'na ngoveoa hocimu taa'uzva 'o e'e to eyongensa? 26'atees'aeno anana'o mita mo maica ci ceonʉ 'o kilisto niantec'u yʉmeʉmʉ no psoevohngʉ?> 27isicu ieni to ohela tposi to moose ho ito eyongensa, ahoza mi'usni ho engha 'o ohela tatoyangzi ta seiso cimo natʉ'ca ta iachisi ci a'a'ausna.

28ne micu emocmu'u to tehe usa ci you, mo mais'a ten'a emo'cʉ'cʉnʉ 'o iesu. 29ihe tʉtpʉta ho yainca: <micu meove si hie, tec'u 'eopsi, mateko'so no'upu a'mi!> micu yʉmeʉmʉ 'o iesu, te no'upu tamo yoso. 30nemo seolʉano yusuhngu ho bonʉ, isi eepza to iesu 'o pang, mi'usnu to hamo ho to'aveoveoyʉ, cu tipcia, faeni tamo yoso. 31micu akameosʉ maavo 'o mcoohe, ihecu eno honga 'o iesu; at'inghi ihe akameosa o'tena aiti 'o iesu. 32mo yupa mainca 'emo yoso: <ne mito pcaceoni mo mi'usnu a'to ho ya'ei, ne isi esansana 'o seiso, 'amos'aeno totiski nomo yunzou ci puzu co 'tohʉngʉto?>

33micu osni yʉc'ʉ, peisvovei ne 'elusalemu. yone'e, ihe aiti mo noteuyunu 'o maskʉucni ci tesi ho i'o mo piyo ci cou, 34ihe seolʉa no engha: <micu a'ʉmtʉ smoevovei 'o nooe'oca. mohcu aopa'to to saimong!>

35i'omo yoso ihe yaeza eʉsvʉta 'o ihe aiti ta ceonʉ, ho mainenu na a'a'ausnasi nemo tipici to pang hocu ko'ko honga ho zou i'o iesu.

aopa'to to tesi 'o iesu

(matai 28:16-20; maluko 16:14-18; yohane 20:19-23; sitoo 1:6-8)

36ne ihe seolʉa no yu'e'engha 'e hi'hioa eni, akameosʉ, mo iachi yac'ʉ ta 'ayumonahe 'o iesu, mi'usni, ho mainca: <temu'sola soanono#panto piyo ci tposʉ noana'o uk'a ci <mi'usni ho mainca: <<temu'sola soanono!>> >.!>

37ihe smoyoa ho yamci, ta'unano hzoo 'e ihe aiti. 38isi mi'usni to iesu ho yainca: <mainci mimus'a ma'tipvongʉ. maincis'a ma'pepecvai? 39aiti 'e emucu ho i'e t'ango'u! 'a a'o, o'as'a mocmo ci cou! tiothoma a'o, 'atemucueno cohivi; na hzoo uk'a ci beahci ho cʉehʉsi, temu aiti, mi'o yaa beahci ho yaa cʉehʉ.>

40ne isin'a yainca, isi ho'usneni 'o emucu ho i'o t'angosi ho poa aitneni#panto piyo ci tposʉ noana'o uk'a 'e 1 secu eni.. 41o'amocu ihe seecʉ'ha taa'uzva, at'inghi mo yamci ho kaebʉ. isi tuocosi to iesu: <pano te peelʉi ana ci cuma tan'e?> 42ihe cu yaeni to isi chua ci yoskʉ ho faeni. 43isi tiova to iesu, yonta tuhcu ta tesi ho ana.

44ataveisi isi cu mi'usni 'o tesi ho yainca: <'e acʉcʉhʉ ci hi'hioa eni 'aeno 'o o'ula eʉsvʉta muu ne mohton'a noteuyunu ne auyusi: 'o isi engha to hoolicu to moose, matpotposʉ to eyongensa, ho ito sihen, 'omo afu'u natʉ'ca a'o cimo macoconi ci hi'hioa te ahtuo'te acʉhʉ esmi.>

45isicu paavi 'o 'tohʉngʉhe, poa cohivneni 'o e'e to seiso. 46ivaha mi'usni ho yainca: <'e isi tposi ta seiso: te tikuzkuzoa 'o kilisto, ho tac'u miteuhi. te i'mi to mcoi ho smoevovei. 47temu boemi to ongkosi, epeaska 'e e'e no ma'vovei ho ina peteongaso no kuisi, ahoi ta 'elusalemu psoengongaboa ta mauhpʉhpʉngʉ. 48'aeno muu nate 'akasi ci cou ta hi'hioa tan'e. 49te'o iachia pafeni muu 'o ohsila teomneni to amo'u; temu yonta hosa ho mooteo, ac'ʉhʉ ho tac'u cmʉ'ho muu nate i'mi ne pepe ci tonʉ.>

ohpepe 'o iesu

(maluko 16:19-20; sitoo 1:9-11)

50acnguhu, engocha to iesu 'o tesi ho yuyafo to hosa, uhne potaniya. nemo yone'e, isi hoepzeni to iesu 'o emucusi ho tooyokeoi 'o tesi. 51ne isi seolʉano tooyokeoi 'o tesi cu mongoi, cu noa tiova ho ohpepe#panto piyo ci tposʉ noana'o uk'a ci <cu noa tiova ho ohpepe>.. 52ihe p'ohkui 'o iesu, 'aveoveoyʉ 'o 'tohʉngʉhe ho yuovei ne 'elusalemu, 53la conino yonto seiten ho tohmomoengʉ to hamo.

Atualmente Selecionado:

luka 24: bsnfe

Destaque

Copiar