RUKA 21

Kîewa gîa ntigwa

(Mko. 12:41-44)

1Yiesû aaraithîîria oona bûra itonga biarutaga mbia bigîîkagîra îthandûkûûni rîra rîethîranagîrua biewa nyomba ya Ngai. 2Oona ntigwa îmwe nkîa yaruta tûcerecere twîrî. 3Yiesû eera arutwa baake, “Na mma ga nkûbwîra, ntigwa îno nkîa îkûruta mbia inyingî nkûrûki ya bara baaruta bonthe. 4N'ûntû bara bangî bonthe baaruta biewa bûra barî na cio. Îndî ntigwa îno yo, amwe na ûkîa bwa yo yaruta kîonthe kîra îkwîgwetie.”

Yiesû aagweta mantû ma kwomboranua kwa nyomba ya Ngai

(Math. 24:1-2; Mko. 13:1-2)

5Arutwa bamwe ibaugaga bûra nyomba ya Ngai yaakîîtwe bwega na maiga maathongi, na bûra yagemeetue na twiga twa goro tûthongi tûra antû barutagîra Ngai tûrî biewa biao. Yiesû auga, 6“Into bibi bûkwona bionthe, îgiita rîgaakinya wîgue gûtirî iiga rîgaatigwa rîrî îgûrû ya rîra rîngî. Monthe imakaanyagaarua.”

Mathîîna mara mayîîte

(Math. 24:3-14; Mko. 13:3-13)

7Arutwa babu bamûûria, “Mwarimû, tatwîre i rî mantû mamu magaakarîka, na i mbi îkoonania marî akubî gûkarîka?”

8Yiesû abeera, “Îmenyagîîreeni bûtikeeneerue i muntû n'ûntû antû baingî bakaaya bagîtûmagîra riîtwa rîakwa bakauga i bo Kîrîstû, na bakiugaga, ‘Kagiita i gaakinyu!’ Bûtikaabathingate. 9Bweegua ndûa ikîrûîgwa na bweegua gacagaca inyingî, bûtikaamake. Nwa mwanka mantû ta mamu meegue marî oogo mbere ya îgiita rîa mûthia rîkinya. Îndî ûyu t'uu mûthiro.”

10Yiesû aathi na mbere abeera, “Nthîgûrû îkaarûa na îra îngî, ûnene bûrûe na bûra bûngî. 11Nthîgûrû îkainaina mûno, mayûûra makeegua marî gûntû na gûntû, na ûkeegua kûrî na ndwari inthûûku. Ûkeegua kûrî na mantû maingî ma kûmakania na magegania ma kûrigaria makoonekana kuuma îgûrû.

12“Na mbere ya mantû mamu matuîkîka, bûkaagwatwa bûnyamaarue, bûtuîrwe îgamba *masinagoogiini, na bwingîrwe nceera. Bûkairwa kîrî anene na mangabana n'ûntû bwakwa. 13Na gaka ûkeegua karî kagiita keenu keega ga gûkûûyîîra. 14Mbere ya bûgiitîrwa îgamba bûtikeenyamaarie bûgîcûa bûra bûgaacookia. 15Îgiita rîakinya, i niû nkaabwaa ûûme mbwîre bûra bûkauga, bûra anthû beenu batakîûmba kûrega kana bakararia. 16Bûgaakunyanîrwa n'aciari beenu, aruanyûkwe, antû ba mwîrîga wenu, acoore beenu na bamwe beenu bakabûûragithia. 17Antû bonthe bakabûthûûra n'ûntû bwakwa. 18Îndî gûtirî kinya rûtundu rwa biongo bienu rûkaûra. 19Kûûmîîria kwenu gûkoonokia mîoyo yenu.”

Yiesû akîarîîria mantû ma kwînyangua kwa Njerusaremu

(Math. 24:15-21; Mko. 13:14-19)

20Kaîrî Yiesû auga, “Rîra bûkoona Njerusaremu yakîmbwa i njûûrî cia acikaarî, bûmenye kwînyangua kwa yo kûrî akubî. 21Bara ûkeegua barî Njundea, ibakuthûke bathi irîmaani. Bara ûkeegua barî gûku taûni ya Njerusaremu, nwa mwanka baume ku. Na bara na bo ûkeegua batarî naagu taûni, batikaathi noogo. 22Ntugû inu i ntugû cia îkaanûkia, kaingo *Maandîko Maatheru maûyûra. 23Eekûrû bara ûkeegua barî barito kana barî na tûgenke twa gwonkia, gîku na ti kînyamaara bakoona kagiita gaku! Antû ba nthîgûrû bonthe bakaagwatwa i kînyamaara kîînene, na Ngai akaboonia bûra bamûthûûrîîtie bûgana. 24Antû bamwe bakaûragîrwa ndûani. Bara bangî bataîgwe bairwe nceera nthîgûrû ingî. Njerusaremu îkaathwa n'antû bangî batarî Ayaundi mwanka rîra îgiita rîao rîkaathira, kûringana na mûbango wa Ngai.”

Kûûya kwa Mwana wa Muntû

(Math. 24:29-31; Mko. 13:24-27)

25Yiesû aathi na mbere na kuuga, “Antû bakoona magegania kuumania na riûa, mweri, na nthata. Nthîgûrû cionthe îkaagîa thîîna, antû baage wîrîgîîro n'ûntû bwa gîtuma kîra makûmbî ma rûûyî rwa îria makaaringa. 26Ûguaya na mathûgaanio bikaagirîkia antû baathûgaanîria mantû mara ûkeegua maayîîte gûtuîkîka nthîgûrû. Mainya ma îgûrû makainainua. 27Rîru i rîo antû bakoona Mwana wa Muntû aayîîte na îtu, arî na inya na mwago ûmûnene. 28Rîra mantû mamu magaakarîka, bûrûngame na ûcamba n'ûntû gûkûûrwa kwenu ûkeegua kûrî akubî.”

Kîthoomo kuumania na mûkûyû

(Math. 24:32-35; Mko. 13:28-31)

29Yiesû abaa ngerekano abeera, “Tathûkiani ngerekano ya mûkûyû na mîtî îra îngî yonthe. 30Rîra bwonaga mathangû maaririma ibûmenyaga thaano îrî akubî. 31Ûgu i ta bu ûkeegua kûrî rîra bûkoona mantû mamu magîkarîka. Rîra magaatuîkîka bûmenye n'ûnene bwa Ngai bwathengeera.

32“Na mma ga nkûbwîra, mantû mamu monthe magaatuîkîka rûciaro rûrû rûtarî rûthiru. 33Îgûrû na nthîgûrû bikaathira, îndî biugo biakwa bitikooro bithira.”

Karagaani bwîthuuranîrîte

(Mko. 13:32-37; Math. 24:36-44)

34Yiesû abeera, “Îmenyagîîreeni bûtikaagwatwe ûkombo i mîkarîre îtarî mîega, ntogoona, kana mantû ma nthîgûrû îno. N'ûntû bûkeethûngîria mantûûni ta mamu bûtiikara bwîthuuranîrîte. Ntugû îgaakinya 35îbûkirimanie ta mbea mûtegooni, ta bûra antû ba nthîgûrû bagaakirimanua gûntû kunthe. 36Kwoogu îmenyeereeni na rombagaani magiita monthe, kaingo bûûmba gwota gûkûrûkîîra mantûûni mamu monthe, na kaingo bûûmba gwîtîgîîrîka i Mwana wa Muntû.”

37Wakîra ntugû Yiesû aathiyaga nyomba ya Ngai akarutana antû. Ûgoro bwakinya aathiyaga kûraara Karîmaani ka Mîceituuni. 38Rûkîîrî antû bonthe baathiyaga nyomba ya Ngai bakamûthikîîria akîrutana.

Atualmente Selecionado:

RUKA 21: thk

Destaque

Copiar