ลูกา 22
22
เมี่ยน ต๊า หฒะเอ๋ย เฒาะ เยซู
(เป๊ย หมั่ง มัดทาย 26:1-5; มาโค 14:1-2; โยฮัน 11:45-53)
1ไม้ อัน ปี๊ง เญย ฌั้ว เญย ฒิบ, แอ๋ง ม่าย นอม บั๋ว เห่ว เสีย แหม่ง ฒิบ,#ธ้วด อียิบ 12:1-27 อ๊า ลั่ม เถา อ๊ะ. 2ไซ เมี่ยน เปย๊ย เหธา หฌาว เล์ย เญย ฟิน-แซง อ๋อย ปี๋ง เจี๊ยน ล์อ ฉัง ไต๋ เยซู, เหว่ย หฒุ นิ่น บัว กั้ม เหฑีย หฒวัง เมี่ยน.
ยูดาด แล์ง หม่าย เยซู
(เป๊ย หมั่ง มัดทาย 26:14-16; มาโค 14:10-11)
3วั้ว หฒั่น ซาตาน เปียะ ยูดาด เญย เฮญี้ยว. วั้ว เต้า ยูดาด, เมี่ยน หย่า เห่ว อิสะคาลิโอด. นิ่น โหฒว เยซู เญย เหฒียบ เหญ่ย เต้า ไซ-ก๋อ เญย เหยียด เต้า. 4ยูดาด ฯฒฯ มี่ง ไซ เมี่ยน เปย๊ย เหธา โก๋ว หฒั่ง ทิน-ฮู่ง เญย เปย๊า เญย แปง-เปย๊ย วั้ว ธ่าง ล่าง ฮนั้ง หาย นอ ไฮ่ เฒาะ เยซู จิว ปุน นิ่น บัว. 5วั้ว เต๋ย เมี่ยน อะเฮน้ย ไห่ หย่า แล์ง ปุน ญ่าน นิ่น. 6ยูดาด ฯฒฯ แล์ง อ๊ะ. ฯฒฯ ล์อ ฉัง, ต้ง หฒวัง เมี่ยน ไม้ เยียม เญย เฒี่ยง โห่, เฒาะ เยซู จิว ปุน นิ่น บัว.
เบ่น เสีย แหม่ง ฒิบ เญย หฮนาง
(เป๊ย หมั่ง มัดทาย 26:17-25; มาโค 14:12-21; โยฮัน 13:21-30)
7เจี๋ย ไม้ อัน ปี๊ง เญย ฌั้ว เญย ฒิบ, ต้ง อ๋อย หฒุ ไต๋ ยู่ง ตอน หญั่น เสีย แหม่ง ฒิบ วั้ว ต๋น หญั่น ฮบ เญย ฮนอย เถา อ๊ะ. 8เยซู พ้าย ปีเต เหธา โยฮัน, บั๋ว นิ่น บัว, “เม่ย บัว อ๋อย หฒุ มี่ง เบ่น เสีย แหม่ง ฒิบ วั้ว ต๋น หญั่น ฮบ ต้าย ปุน บัว ล่ม ฑ่อย หญั่น.”
9นิ่น บัว หน่าย ก๋า เยซู, “ไซ-เตี๋ย อ๋อย เยีย บัว มี่ง หาย เบ่น?” 10นิ่น เตา, “เม่ย บัว เปียะ ฒี่ง วั้ว หฒั่น ฯฒฯ ม่าย เต้า เมี่ยน ดาม นอม ตั๊บ เจี๊ยน ววม เญย เนีย-หะโล่ว ต้าย ปวั้ง เม่ย บัว. นิ่น เปียะ หาย นอม เปย๊า, เม่ย บัว กัน เจี๊ยน นิ่น เปียะ. 11หย่า หน่าย ก๋า เปย๊า-เฒี้ยว, ‘ไซ-เตี๋ย หน่าย, นิ่น เหธา นิ่น เญย ไซ-ก๋อ อ๋อย หฒุ เยียม หาย ฉง เปย๊า หญั่น เสีย แหม่ง ฒิบ วั้ว ต๋น หญั่น ฮบ?’ 12เปย๊า-เฒี้ยว ฯฒฯ ต้อ เม่ย บัว ฝาว มี่ง หมั่ง กู้ หงว่าย วั้ว ฑั่ง เปย๊า, ม่าย ฉง จั๊ง เญย. หญู่งๆ ม่าย ฑ่อย เหฑ่ง. เม่ย บัว เยียม หน่าย เบ่น อ๊ะ.”
13นิ่น บัว ฯฒฯ มี่ง ปวัด หญู่งๆ ต๋อย เยซู ก๊อง เญย หว่า. นิ่น บัว ฯฒฯ เยียม วั้ว เบ่น เสีย แหม่ง ฒิบ เญย หฮนาง.
เยซู เหลียบ จั๋ง นิ่น วั้ว ต๋น หฮนาง
(เป๊ย หมั่ง มัดทาย 26:26-30; มาโค 14:22-26; 1 โคลินโท 11:23-25)
14เถา หญั่น เญย เฒี่ยง โห่, เยซู เหธา นิ่น เญย กง-โฒ่ บัว ฝาว เตี้ย หญั่น หฮนาง. 15เยซู ก๊อง บั๋ว นิ่น บัว, “เยีย ไม้ แก้ง หฒุ เสี่ยว โค้ว, เยีย หฒะเก้ง อ๋อย เหธา เม่ย บัว หญั่น น้าย ต๋น เสีย แหม่ง ฒิบ เญย หฮนาง ด่าง. 16เยีย บั๋ว เม่ย บัว, ยั่ง น้าย เจี๋ย เยีย ไม้ หญั่น เสีย แหม่ง ฒิบ เญย หฮนาง. ฒั้ว เถา น้าย ต๋น หฮนาง เญย เฒียน เอ๋ย เล์ย ตุ้น ยุ่น เหฑ่ง, เซ ต้ง ทิน-ฮู่ง ต้าย โหฒว เฒี้ยว กุ๊น เมี่ยน เญย เฒี่ยง โห่, เยีย หธีง ต้าย แอ๋ง ตุ๊ หญั่น.”
17ก๊อง ลิ์ว, เยซู เฒาะ ฒ้าน อะหงุ่น ติ๊ว ต้าย แล์ง ฒี่ง ทิน-ฮู่ง หย่า ก๊อง, “ฒิบ น้าย นอม ฒ้าน มี่ง ปุน ฆอย เหยียด ล่าน ฮบ เต๋ย. 18เยีย บั๋ว เม่ย บัว, ยั่ง น้าย เจี๋ย เยีย ไม้ ฮบ อะหงุ่น ติ๊ว. ฒั้ว เถา ทิน-ฮู่ง ต้าย โหฒว เฒี้ยว กุ๊น เมี่ยน หธีง ต้าย แอ๋ง ฮบ.”
19เยซู เฒาะ ฌั้ว ต้าย แล์ง ฒี่ง ลิ์ว ทิน-ฮู่ง, ฯฒฯ แมะ ฆอย ปุน ไซ-ก๋อ บัว, หย่า ก๊อง, “น้าย เยีย เญย ซิน, เซ เหว่ย เม่ย บัว เซี้ย เญย. เม่ย บัว อ๋อย หฒุ ฮนั้ง น้าย โหฒว เหว่ย จั๋ง เยีย.”
20หญั่น ลิ์ว หฮนาง, เยซู แอ๋ง เฒาะ ฒ้าน อะหงุ่น ติ๊ว ต้าย ก๊อง, “น้าย นอม ฒ้าน เซ หล่ง เยีย เญย ฑย้าม เหลียบ เจี์ย เญย เซียง-แหง่ง หว่า, เซ เหว่ย เม่ย บัว เหลี่ยว ธ้วด ต้าย.”#เยเลมี 31:31-34
21“หมั่ง ม่าะ! อ๋อย หม่าย เยีย วั้ว เต้า เญย ปั์ว เหธา เยีย เญย ปั์ว จวั่ง เตี้ย หลอง เจี๊ยน.#สีง ฑูง 41:9 22เยีย, ป้าม เมี่ยน เญย ตอน, อ๋อย หฒุ เอย ทิน-ฮู่ง จา-ด่าง ตี่ง ต้าย เญย เกวย เสย, มป่า หม่าย เยีย วั้ว เต้า ฒู้ง หฒุ โค้ว อ๊ะ.”
23ไซ-ก๋อ บัว ฯฒฯ ล่าน หน่าย ล่าน นิ่น บัว หาย เต้า อ๋อย โหฒว ธ้วด น้าย เต๋ย สี่.
ไซ-ก๋อ บัว แฑง หาย เต้า โหฒว เก้า โฮล
24ไซ- ก๋อ แฑง เจี์ย ต้าย ก๊อง, เยียม นิ่น บัว บุด๋ง, อ๋อย หฒุ ฝุน นิ่น บัว หาย เต้า โหฒว โฮล เจี๋ย.#มัดทาย 18:1; มาโค 9:34; ลูกา 9:46 25เยซู บั๋ว นิ่น บัว, “จั๋น เญย ฮู่ง กุ๊น เจี๊ยน แปะ ฝีง. โหฒว เจียน-โฟ้ว วั้ว เต๋ย, แปะ ฝีง เห่ว, ‘เฑีย เมี่ยน เญย ก๋อ-โย์ว.’#มัดทาย 20:25-27; มาโค 10:42-44 26มป่า เม่ย บัว ไม้ หอบ หฒุ ฮนั้ง หน่าย. เม่ย บัว หาย เต้า โหฒว เก้า โฮล เจี๋ย, วั้ว เต้า อ๋อย หฒุ โหฒว ฮนั้ง เก้า หลุน เจี๋ย วั้ว เต้า. หาย เต้า โหฒว เปย๊ย, วั้ว เต้า อ๋อย หฒุ โหฒว ฮนั้ง โปว นอ.#มัดทาย 23:11; มาโค 9:35 27หาย เต้า โหฒว เก้า โฮล? เฒว์ย เจี๊ยน หญั่น วั้ว เต้า ไฟ หลิ่ว เล์ย วั้ว เต้า? เฒว์ย เจี๊ยน วั้ว เต้า โหฒว เก้า โฮล ไม้ เฒ์ย? มป่า เยีย เยียม เม่ย บัว บุด๋ง ฮนั้ง ฟู-สู เญย เมี่ยน นอ.#โยฮัน 13:12-15 28เยีย ปวั้ง หฒุ โค้ว เม่ย บัว เหธา เยีย เยียม, ไม้ กวั่ง เยีย. 29เยีย เญย เตีย ฮนั้ง หาย นอ เฒาะ นอม กั๊วะ ปุน เยีย, เยีย ฯฒฯ ฮนั้ง วั้ว นอ เฒาะ นอม จิว ปุน เม่ย บัว. 30เซ เหว่ย ปุน เม่ย บัว เยียม เยีย เญย กั๊วะ เหธา เยีย จวั่ง เตี้ย หญั่น จวั่ง เตี้ย ฮบ. เม่ย บัว หย่า ตุ๊ เฒว์ย เหว่ย, เซี้ยม วั้ว เต๋ย เหฒียบ เหญ่ย ฝีง อิสะลาเอน เมี่ยน.#มัดทาย 19:28
เยซู จา-ด่าง ก๊อง ปีเต ไม้ เหญี่ยม นิ่น
(เป๊ย หมั่ง มัดทาย 26:31-35; มาโค 14:27-31; โยฮัน 13:36-38)
31“ซีโมน อ้า! ซีโมน! หมวัง โอ่. ซาตาน ตุ๊ ทิน-ฮู่ง ฆอย ฑุ่ย เสย เม่ย บัว เหยียด ฒู้ง ฮนั้ง เมี่ยน หญม ธุ นอ. 32มป่า เยีย ฒู้ง เหว่ย เม่ย เต๋า เก๋า โท้ ทิน-ฮู่ง ปุน เม่ย เสียน ว้วน, ไม้ ถุย. เม่ย แอ๋ง หฑวน ต้าย ล์อ เยีย, เม่ย อ๋อย หฒุ เถง เม่ย เญย ก๋อ-โย์ว เฮ้น เจี์ย ต้าย.”
33ปีเต เตา, “เฒี้ยว อ้า! ไม้ กุ๊น เปียะ โล่, ไม้ กุ๊น ไต่, เยีย เฒี่ยง หย่า เหธา เม่ย เหยียด ดุย. ไต่ หย่า เหธา เม่ย เหยียด ค้วด.”
34เยซู ก๊อง, “ปีเต อ้า! เยีย บั๋ว เม่ย, อี้ ฮนอย ไจ ไม้ แก้ง หฆาย, เม่ย อ๋อย ก๊อง ปัว หฑุ่น เม่ย ไม้ ฮิ้ว ตุ๊ เยีย.”
ญ่าน บัวะ, บัวะ จ๋อง, หฑุ ด๊าว
35เยซู แอ๋ง หน่าย ก๋า นิ่น เญย ไซ-ก๋อ บัว, “เยีย พ้าย เม่ย บัว มี่ง วั้ว หฒั่น, เยีย บั๋ว เม่ย บัว ไม้ ตู๋ง ต้อ ญ่าน บัวะ, หย่า ไม้ ตู๋ง ต้อ บัวะ ตั๊บ กะน้าย ไฟ ต้อ เฮ่, เม่ย บัว ธา หาย หญู่ง ไฟ?”#มัดทาย 10:9-10; มาโค 6:8-9; ลูกา 9:3; 10:4
นิ่น บัว เตา, “ไม้ ธา หาย หญู่ง.”
36เยซู ก๊อง, “มป่า อี้ หฒั่น หาย เต้า ม่าย ญ่าน บัวะ ไฟ ตั๊บ กะน้าย เญย บัวะ อ๋อย หฒุ ต้อ เจี๊ยน มี่ง. หาย เต้า ไม้ ม่าย หฑุ ด๊าว อ๋อย หฒุ หม่าย นิ่น เญย ต้ม ลุย ม์าย ฒูง. 37กีง-โซว เฟี้ย เจี๊ยน ก๊อง,
‘นิ่น หฒุ ฝุน เหธา ฒุ์ย-เมี่ยน ฟี่ ฮนั้ง.’
เยีย บั๋ว เม่ย บัว, น้าย โจ๋ว หว่า อ๋อย เยียม เยีย ธ้วด ต้าย, ฒู้ง ธ้วด เจี๊ยน อ๊ะ.”#อิสะยา 53:12
38ไซ-ก๋อ บัว ก๊อง, “เฒี้ยว อ้า! หมั่ง ก๋า น้าย! ม่าย อี ฒูง หฑุ ด๊าว.”
เยซู เตา, “น้าย เก๋า อ๊ะ.”
เยซู มี่ง กะลั้น บง เต๋า เก๋า
(เป๊ย หมั่ง มัดทาย 26:36-46; มาโค 14:32-42)
39เยซู ธ้วด ฒี่ง มี่ง หย่า ฮนั้ง เหยียด เกา นอ, มี่ง กะลั้น บง. ไซ-ก๋อ บัว กัน เจี๊ยน มี่ง. 40เถา วั้ว นอม ต๋อง, เยซู บั๋ว นิ่น บัว, “เม่ย บัว อ๋อย หฒุ โท้ ทิน-ฮู่ง เถง เม่ย บัว ไม้ หฒุ ปวั้ง เสย เฮญี้ยว เญย สี่.”
41ก๊อง ลิ์ว, นิ่น กั้น แอ๋ง มี่ง นอม ต๋อง โก เต๋ย เญย, ด่ง ฒอย เหยียด เลา หละเปย๊ย โก เญย ต๋อง, เยียม วั้ว เกว่ย เหฌี่ย เหธา ทิน-ฮู่ง ก๊อง หว่า. 42นิ่น ก๊อง, “อา เตีย อ้า! สี ก๊อง เอย เตีย เญย เอ๋ย นอ, โท้ เฒาะ ฆอย เยีย อ๋อย หฒุ ฮบ น้าย นอม ฒ้าน.#22:42 “อ๋อย หฒุ ฮบ น้าย นอม ฒ้าน” เป๊ย อ๋อย หฒุ เสี่ยว โค้ว. มป่า ไม้ ตู๋ง เอย เยีย เญย เอ๋ย. อ๋อย หฒุ เอย เตีย กั้น เญย เอ๋ย ฮนั้ง.”#22:42 ม่าย เต๋ย โล์-ฮนอย โซว ไม้ ม่าย 22:43-44 น้าย เต๋ย อี เหยี่ยม.
43ม่าย เต้า ฟิน-เมี่ยน เยียม ทิน-ต้อง ต้าย หิ่น ธ้วด เถง ชะ เยซู. 44เยซู ปะหละ เฑ่า ตุ๊ โค้ว ไห่ ฯฒฯ จา หล่ง ชะ เต๋า เก๋า. นิ่น ธ้วด หั่น เหยียด นอม เหยียด นอม โฮล เญย, ฮนั้ง ฑย้าม นอ เดี๊ยบ เหฌี่ย เดา.
45เยซู เต๋า เก๋า ป่า, เจี์ย ซิน ต้าย เถา ไซ-ก๋อ บัว วั้ว, ปวัด นิ่น บัว หลาย เฑ่า ตุ๊ โค้ว ไห่, มฌ่อม หมี่ อ๊ะ. 46นิ่น ก๊อง บั๋ว ไซ-ก๋อ บัว, “เม่ย บัว ฝู่ง ฮนั้ง น้าย นอ มฌ่อม? เจี์ย ซิน โท้ ทิน-ฮู่ง เถง เม่ย บัว ไม้ หฒุ ปวั้ง เสย เฮญี้ยว เญย สี่ ม่าะ!”
เมี่ยน เฒาะ เยซู
(เป๊ย หมั่ง มัดทาย 26:47-56; มาโค 14:43-50; โยฮัน 18:3-11)
47เยซู ก๊อง หว่า ฒู้ง ไม้ แก้ง เซ้ด, ม่าย กวั้น เมี่ยน ต้าย. เหฒียบ เหญ่ย เต้า ไซ-ก๋อ เญย เหยียด เต้า, บั๋ว เห่ว ยูดาด, หย่า ต้อ เจี๊ยน นิ่น บัว ต้าย. ยูดาด มี่ง ฟัด เญย อ๋อย ฒม เยซู. 48มป่า เยซู หน่าย, “ยูดาด อ่า, เม่ย ฒม เยีย, ป้าม เมี่ยน เญย ตอน, เหว่ย เฒาะ เยีย หม่าย ไฟ?”
49เหธา เยซู เยียม วั้ว เต๋ย ไซ-ก๋อ ปวัด อ๋อย ม่าย หาย หญู่ง สี่ ธ้วด, นิ่น บัว ฯฒฯ หน่าย ก๋า, “เฒี้ยว อ้า! แปง หฑุ ด๊าว ฮงะ นิ่น บัว ตุ๊ เญย ซ่าะ?” 50ม่าย เต้า ฒู้ง ฮงะ ต้ม ไซ เมี่ยน เญย โน่ว ฯฒฯ ไพ หฒุ โน่ว เญย บย่าว ปูง มน่อม ดุ๊ด หมี่ อ๊ะ.
51มป่า เยซู ก๊อง, “ไม้ ตู๋ง โหฒว ม่าะ!” นิ่น ฯฒฯ ฮลัว วั้ว เต้า โน่ว เญย มน่อม หฒ่อ หลง หมี่ อ๊ะ.
52เยซู ก๊อง บั๋ว ต้าย เฒาะ นิ่น วั้ว เต๋ย ไซ เมี่ยน เปย๊ย เหธา โก๋ว ฮู่ง ติ่น เญย แปง-เปย๊ย เหธา เมี่ยน โก๋, “เม่ย บัว ปวัด เยีย ฮนั้ง หฒะ แปง หธีง ต้าย ต้อ เจี๊ยน หฑุ ด๊าว เหธา เดี๋ยง-ด๋น ต้าย เฒาะ เยีย? 53เยีย ฮนอยๆ เหธา เม่ย บัว เยียม หฒั่ง ทิน-ฮู่ง เญย เปย๊า, เม่ย บัว หย่า ไม้ เฒาะ. มป่า อี้ หฒั่น เซ เม่ย บัว เญย เฒี่ยง โห่ อ๊ะ. หฮมวัง เญย ชะ หย่า กุ๊น เจี๊ยน.”#ลูกา 19:47; 21:37
ปีเต ไม้ เหญี่ยม เยซู
(เป๊ย หมั่ง มัดทาย 26:57-58,69-75; มาโค 14:53-54,66-72; โยฮัน 18:12-18,25-27)
54นิ่น บัว เฒาะ เยซู ต้อ มี่ง ต้ม ไซ เมี่ยน เญย เปย๊า. ปีเต หย่า กัน เจี๊ยน มี่ง มป่า เล่ย โก เต๋ย เญย. 55เยียม หลาด กะญั์ว, บุด๋ง วั้ว นอม ต๋อง, นิ่น บัว ปั๊ว เจี๊ยน โต์ว เฒว์ย เจี๊ยน. ปีเต หย่า เหธา นิ่น บัว เฒว์ย วั้ว. 56ม่าย เต้า มเซียะ โปว ปวัด ปีเต เฒว์ย โต์ว-เหฑ่า เฮลน, โต์ว แอ๊ง หฒุ ปีเต. วั้ว เต้า โปว นุๆ เญย หมั่ง หย่า ก๊อง, “น้าย เต้า หย่า เหธา วั้ว ล่าน เมี่ยน เยียม.”
57มป่า ปีเต ไม้ เหญี่ยม. นิ่น ก๊อง, “เม่ย น้าย เต้า มเซียะ ตอน อ้า! เยีย ไม้ ฮิ้ว ตุ๊ นิ่น นีอา.”
58อ๊า ตั้ง แอ๋ง ม่าย เต้า เมี่ยน ปวัด ปีเต ฯฒฯ ก๊อง, “เม่ย หย่า ต้ง เหยียด เต้า วั้ว กวั้น เมี่ยน นีอา.”
มป่า ปีเต เตา, “เม่ย หน่าย เต้า เมี่ยน อ้า! เยีย ไม้ เฒ์ย เหลาะ.”
59ฆะฮ้า เหยียด นอม เฒี่ยง โห่ เญย ต๋อง, แอ๋ง ม่าย เต้า เมี่ยน ต้าย ตี่ เจี๊ยน ก๊อง, “น้าย เต้า ด่ง หาย ฒู้ง โหฒว เหยียด เต้า นิ่น เญย เมี่ยน, เหว่ย หฒุ นิ่น เซ กาลิลี เมี่ยน.”
60มป่า ปีเต เตา, “เม่ย หน่าย เต้า เมี่ยน อ้า! เยีย ฒู้ง ไม้ ฮิ้ว ตุ๊ เม่ย ก๊อง หาย หญู่ง.” ปีเต ก๊อง น้าย เต๋ย หว่า ไม้ แก้ง เซ้ด, ไจ ฯฒฯ หฆาย อ๊ะ. 61เฒี้ยว ฮวิน หฑวน หมั่ง เจี๊ยน ปีเต, ปีเต ฯฒฯ จั๋ง หฒุ ฒิ่น ด่าง เฒี้ยว ก๊อง เญย หว่า, “อี้ ม์วน ไจ ฒู้ง ไม้ แก้ง หฆาย, เม่ย ไม้ เหญี่ยม เยีย ปัว หฑุ่น.” 62ปีเต ฯฒฯ ธ้วด มี่ง ชะ เญี้ยม ตุ๊ โค้ว ไห่.
เยซู หฒุ เมี่ยน เบ๊าะ, หฒุ เมี่ยน จั๊ด
(เป๊ย หมั่ง มัดทาย 26:67-68; มาโค 14:65)
63โก๋ว เยซู วั้ว เต๋ย เมี่ยน กวัด โตะ จั๊ด เยซู หย่า เบ๊าะ นิ่น. 64นิ่น บัว ปวัง เจี๊ยน นิ่น เญย มฒีง หน่าย นิ่น, “ไธ ก๋า! หาย เต้า เบ๊าะ เม่ย?” 65นิ่น บัว หย่า ก๊อง หว่า ธั้ม เญย ฮว้วด เยซู.
เยซู เยียม กุ๊น สี่ หวุ่ย หฒุ เซี้ยม
(เป๊ย หมั่ง มัดทาย 26:59-66; มาโค 14:55-64; โยฮัน 18:19-24)
66ลู่ง ฌัง วั้ว หฒั่น, ยิวไท เมี่ยน เญย เมี่ยน โก๋ เหธา ไซ เมี่ยน เปย๊ย เหธา หฌาว เล์ย เญย ฟิน-แซง กั๊บ ฒุ้น แอ๋ง ต้อ เยซู มี่ง เยียม นิ่น บัว เญย กุ๊น สี่ หวุ่ย หฑะเฮมียน. 67นิ่น บัว ก๊อง, “สี ก๊อง เม่ย หฒะเก้ง กีตู่, บั๋ว เยีย บัว ม่าะ!”
เยซู เตา, “สี ก๊อง เยีย บั๋ว เม่ย บัว นอ, เม่ย บัว หย่า ไม้ เสียน. 68สี ก๊อง เยีย หน่าย โจ๋ว หว่า เม่ย บัว, เม่ย บัว หย่า ไม้ เตา. 69มป่า ยั่ง น้าย เจี๋ย, เยีย, ป้าม เมี่ยน เญย ตอน, ฯฒฯ เฒว์ย เจี๊ยน ม่าย ชะ เญย ทิน-ฮู่ง เญย บย่าว แหมง.”
70นิ่น บัว เหยียด ฒู้ง ก๊อง, “วั้ว หญู่ง, เม่ย โหฒว ทิน-ฮู่ง เญย ตอน?”
เยซู เตา นิ่น บัว, “เยีย ต้ง หาย เต้า เม่ย บัว กั้น ก๊อง ลิ์ว อ๊ะ.”
71นิ่น บัว ก๊อง, “เยีย บัว ไม้ หฒุ แอ๋ง หล่ง หาย หญู่ง โหฒว ฒอง-เหฒง อ๊ะ. เยีย บัว ฒู้ง ไฮ์ นิ่น กั้น เญย ฑุ่ย ก๊อง ลิ์ว อ๊ะ.”
Atualmente Selecionado:
ลูกา 22: IuMiTH
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Mien Bible (Thai Script) © Thailand Bible Society, 2007
