Матта 9

Исайи паралич кайир сагъ апӀуб

1Гьаддихъан Иса, люткейиъ эъну, тмуну гъирагъдихъ хъайи Чан шагьриз гъюру.

2Ва магьа Дугъахьна, паралич дубхьну, сар ахниъ ахънайир хьади гъафи. Исайи, дурарин зурба хъугъвал дябкъну, паралич кайириз гъапи:

– ЮкӀв ижми апӀин, Йиз бай! Яв гунгьарилан хил алдабгъураза.

3Мушвʼин сакьюдар къанунчйири чиб-чпикди гъапи: «Мугъу Аллагьдиз къаршу гафар кӀура».

4Дурарин фикрар аьгъяди, Исайи гъапи:

– Гьаз усал фикрар ичв юкӀвариъ тӀаърачва? 5Фу рягьят ву: «Яв гунгьарилан хил алдабгъураза» пуб, вая «гъудужвну лиц» пуб? 6Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай.

Хъа Дугъу паралич кайириз: «Гъудужв кӀуразавуз, гъадабгъну яв ахин, яв хулаз гъарах», – кӀуру.

7Ва думу, гъудужвну, чан хулаз гъягъюру.

8Му гъябкъю халкь мюгьтал гъахьи, ва дурари адмийириз мициб гьюкум туву Аллагьдин тярифар апӀуз хъюгъю.

Исайи Матта ктагъуб

9Ва гьадлинтина гъягъюрайиган, Исайиз налукар уч апӀрушвахь деънайи Матта кӀуру сар кас рякъюру ва дугъаз кӀуру:

– Узухъди гъач.

Маттара, гъудужвну, Дугъахъди гъягъюру.

10Хъасин, Иса Дугъан хулаъ суфрайихъ гутайиз гъюн йивну дахънайиган, хайлин налукар уч апӀрударна гунагькрар дуфну, Дугъахъди ва Дугъан ученикарихъди деъру. 11Му аьгьвалат дябкъну, фарисйири Исайин ученикариз кӀуру:

– Ичв Мялимди налукар уч апӀурайидарихъдина гунагькрарихъди гьаз ипӀура?

12Му гъеебхьган, Исайи гъапи:

– Духтир сагъидариз ваъ, хъа аьзарлуйириз лазим ву. 13Учву сабан «Гъурбан апӀуб ваъ, хъа рягьим апӀуб ккун апӀураза», – кӀуру гафарин мяна аннамиш апӀинай. Узу марцци касар ваъ, хъа гунагькрар дюз рякъʼина хуз Дуфнайир вуза.

14Хъасин, Исайихьна дуфну, Ягьʼяйин ученикари гьерхру:

– Учуна фарисйири кми-кмиди ушвар дисури шулча, хъа Яв ученикари гьаз ушвар дисурадар?

15Исайи дурариз кӀуру:

– Швушв хурайир чпихъди хъимбукьан гагьди, сумчрин хялар гьич пашман даршлуб аьгъданчвузхъа! Хъа дурарихьан швушв хурайир гужназ гъадагъру вахт гъибди, ари гьадмуган дурари ушвар дисиди.

16Гьич сарира йирси палатдик цӀийи цӀил ктривур, фицики, цӀийиди киву цӀил кубчӀвган, хъана аьхю урхъ адабхъди.

17Таза чяхирра йирси иржариъ убзри шулдар. Дици гъапӀиш, иржарикан урхъар ктахьиди: чяхирра удубзиди, иржарра пуч хьиди. Хъа таза чяхир цӀийи иржариъ убзру аьдат ву, думуган чяхирра, иржарра сагъди гъузди.

Риш чӀиви апӀуб ва кетӀерццнайир сагъ апӀуб

18Исайи гьамци кӀурайи вахтна, Дугъахьна магьа сар гьяким дуфну, Дугъаз икрам дапӀну, кӀуру:

– Гьамусяаьт йиз риш йикӀру гьялнаъ айиз. Уву дуфну, дугъʼин Яв хил иливиш, думу чӀивиди гъузди.

19Иса, гъудужвну, дугъахъди гъягъюру. Дурарихъди ученикарра гъягъюру.

20Му вахтна йицӀикьюд йисандин арайиъ ифи хъибтри шлу уьзур кайи сар дишагьлийи, кьялхъянди дуфну, Исайин ккурттдин канчӀлик хил кучру. 21Фицики дугъу чав-чакди гьамци фикир гъапӀнийи: «Эгер узу Дугъан палатдик анжагъ хил кубкӀиш, узу сагъ хьидиза».

22Иса кьяляхъ илтӀикӀуру ва, думу дяркъну, кӀуру:

– Яв юкӀв ижми апӀин, Йиз риш! Яв хъугъували уву сагъ гъапӀунву.

Ва дишагьли сабпну сагъ гъахьнийи.

23Хъасин Иса гьякимдин хулаз гъушу. Душваъ учӀвган, саламдин мукьмар йивурайидар ва ишларин гъугъ ипнайидар дяркъну, Исайи гъапи:

24– Гьамлин удучӀвай; риш дукӀнадар, хъа даахна.

Дурар Дугъʼин аьлхъюз хъюгъю.

25Халкь удучӀвган, Дугъу, риш айи хулаъ учӀвну, дугъан хил гъибису, ва риш гъудужву.

26Ва мидкан вари юрд вуйиси аваза гъарабгъу.

Кьюр кур кас сагъ апӀуб

27Иса гьадушвʼан гъягъюрайиган, «Ич язухъ апӀина, я Давудгъярин Бай!» – кӀури, Дугъан кьяляхъди кьюр кур кас гъюз хъюгъю. 28Хъа думу хулаъ учӀвган, кур вуйидар Дугъан багахьна гъафи. Исайи дурариз кӀуру: «Узхьан учву сагъ апӀуз шулу пну, хъугъранчва?» Дурари: «Ав, я Агъа!» – гъапи. 29Гьадмуган Исайи, дурарин уларик хил кучну, гъапи:

– Ичв хъугънайивализ гъилигси ибшричвуз.

30Ва дурариз рябкъюз хъюгъю. Хъа Исайи дурариз ижмишнаан гъадагъа дебккру:

– Лигай гьа, мидкан саризра аьгъю дарибшри.

31Хъа дурари, кӀуруш, чӀатинди удучӀвган, думу вари юрд вуйибси, Дугъан аваза рабгъуру.

Исайи чӀал дибиснайир сагъ апӀуб

32Уларихь акв гьибшдар удучӀвубси, магьа Дугъахьна жинар кучӀвнайивалиан чӀал дибиснайир хъади гъафи.

33Жинар ктаубси, чӀал дибиснайир улхуз хъюгъю. Ва: «Израилиъ мициб ляхин саб вахтнара гъабхьиб дар!» – кӀури, халкь мюгьтал гъахьи.

34Хъа фарисйири кӀуйи:

– Исайи жинар дурарин аьхюрихьан вуйи кьувватниинди ктаура.

Исайиз халкьдин язухъ хьуб

35Иса, жугьдарин мистариъ аьгъювалар улупури, Аллагьдин Паччагьлугъдикан Ужувлан хабар рабгъури ва гьар жюрейин уьзрарна иццрушнар кайидар сагъ апӀури, шагьрарна гъулар вуйиси лицури гъахьну. 36Халкьарин дестйир гъяркъган, Исайиз дурарин язухъ шулу, гьаз гъапиш дурар марччлихъан хътру марччарси, улдугну, кюмексузди айи. 37Гьадмуган Чан ученикариз кӀуру:

– Иган гизаф а, хъа убгрудар цӀиб. 38Гьаддиз игнин Агъайиз, Чан игниз убгрудар гьаъ, кӀури, ккарагай.

Atualmente Selecionado:

Матта 9: ТабГК

Destaque

Copiar