Матта 7

Жарадарин суд мапӀанай

1Жарадарин суд мапӀанай, ичвра апӀидар, 2фицики учву жарадарин фициб суд гъапӀиш, ичвра гьациб суд апӀиди. Жарадарин тахсрар учву фициб уьлчмейиинди ерцураш, ичв тахсрарра гьациб уьлчмейиинди ерциди.

3Увуз яв улиъ айи хамхар гьидрибгъди, яв гъардшин улиъ айи чӀюрх фици рябкъюравуз? 4Ваяки яв гъардшиз: «Яв улиъ айи чӀюрх адабгъуза» – фици пидива, хъа яв улиъ хамхар ади?

5Эй кьюб маш гъяйир! Сифте яв улиъ айи хамхар адабгъ, ва гьадмуган, яв гъардшин улʼан чӀюрх фици адабгъуруш, рябкъидивуз.

6ФукӀа гирамиб хуйириз миккипан, даршиш дурар, илдицну увʼин алархьиди. Яв гавагьирар силарин улихьинди магатӀахьан, даршиш силари дурар ликариккан апӀиди.

Ча йипай, тувдичвуз

7Ча йипай – тувдичвуз; абгай – бихъидичвуз; раккник кучай – абццдичвуз. 8Фицики гьарсар ча кӀурайириз тувди; абгурайириз бихъиди; кучрайириз абццди. 9Ичв арайиъ, уьл ча гъапиган, чан бализ гъван туврур айинхъа? 10Вая балугъ ча гъапиган, битӀ туврур айинхъа?

11Гьаци вуйиган, учву пис адмийир вушра, учвхьан ичв веледариз ужуб тувуз удукьруган, аьршариин али Адашдихьан хъанара ужуди Чахьан ча кӀурудариз багъишар тувуз хьибди.

12Инсанар учвухъди фици духьну учвуз ккундуш, учвура дурарихъди гьаци йихьай. Фицики Къанундин ва Пайгъамбрарин Китабарин мяна гьамдиъ а.

Ккуру урнар

13Завариз арццнайи ккуру урнарианди учӀвай. Фицики яркьу урнарна дабкӀнайи рякъ аьжалихьна гъахрудар ву, ва гизафдар гьадлинтина гъягъюра.

14Гьаз гъапиш ккудудубкӀру уьмриз гъахру урнар ккурудар ву, дина гъябгъюрайи жилгъара читинуб ву. Ва цӀидаризтӀан думу бихъурадар.

Гьар йимишдиз лигну аьгъю шулу

15Кьюб маш гъяйи пайгъамбрихьан ихтият йихьай. Учвухьна дурар марччлин гъидикь алди гъюра, айтӀан кӀуруш дурар вягьши жанаврар ву. 16Дурар чпи туврайи бегьерниинди аьгъю хьидичвуз. Зазарилан тӀумутӀ вая пялкьярилан инжир уч апӀуз шулин? 17Гьарсаб гъяни гьари гъяни йимиш, хъа чӀуру гьари чӀуру йимиш хуру. 18Гъяни гьархьан чӀуру йимишар, я чӀуру гьархьан гъяни йимишар тувуз шулдар. 19Гъяни бегьер дархру гьарсаб гьар алдабтӀну, цӀигъ гъипри шулу. 20Дурар йимишариз лигну аьгъю хьидичвуз.

Аллагьдин Паччагьлугъдиъ фуж учӀвди?

21Узуз «я Агъа, я Агъа» кӀурур, фуж вушра, Аьршарин Паччагьлугъдиъ учӀвидар, хъа зиин али Аьршарин Йиз Адашди гъапиб тамам апӀрур учӀвди.

22Узуз думу йигъан гизафдари пиди: «Я Агъа! Я Агъа! Яв ччвурнахъан учу аьяндарвалар улупури гъахьундайин? Яв ччвурниинди учу инсанарикан жинар ктаури гъахьундайин? Яв ччвурнахъди учу гизаф аьламатнан ляхнар гъапӀундаринхъа?»

23Ва думуган дурариз жаваб тувдиза: «Узуз учву саб вахтнара аьгъюдар дарзуз. Узхьан дург йихьай учву, писвал апӀурайидар!»

Кьюб шибритӀ

24Гьамци, Узухъ хъебехъну, Йиз гафар тамам апӀру гьарсар кас чан хулар гъвандин шибритӀиин диврайи фагьумлу касдиз ухшар ву. 25Мархьра гъубгъну, селлерра гъафну, микӀарра хъивну ва гьамрар вари гьадму хулариина диш гъахьну, амма хулар гъадаргъундар, фицики дурар гъвандиин дивнайидар ву.

26Хъа Йиз гьаму гафар ерхьури, дурар тамам дарапӀрайи гьарсар кас чан хулар гъумриин диву фагьумсуз касдиз ухшар ву. 27Мархь гъубгъну, селлер гъафну, микӀар хъивну, вари гьамрар гьадму хулариина диш гъахьну, ва хулар гъадаргъну, хъа дурарин даргъувалра зурба хъухърумар хъайиб гъабхьну.

28Исайи, вари гьаму гафар дупну, ккудубкӀган, мушвахь хьайикьан халкь Дугъан улупбариин мюгьтал гъахьну, 29фицики Исайи дурариз, къанунчйириси ваъ, хъа гьюкум хлиъ айириси аьгъювалар улупури гъахьну.

Atualmente Selecionado:

Матта 7: ТабГК

Destaque

Copiar