Матта 13

Тум убзрурикан тахалус

1Гьадму йигъан хулʼан удучӀву Иса Галилей гьюлихъна душну деъру. 2Дугълан гизаф халкь илтӀибшнийи, ва гьаддиз Думу люткейиъ эънийи, хъа халкь гьюлин гъирагъдихъ гъубзнийи. 3Исайи дурариз, аьгъювалар улупури тахалусариинди гизафдарикан гъапнийи. Дугъу кӀуру:

– Сар нежбер тум убзуз удучӀвуру. 4Убзурайиган, гьацӀар удрар рякъюхъ дахьру – дурар, жакьвар дуфну, удуру. 5Сакьюдар удрар гъван ккайи, руг цӀибтӀан алдру йишвʼина дахьру, ва дурар ухди ктучӀвуру, гьаз гъапиш ругдин гъат чӀиллиб вуйи. 6Ригъ гъапӀган, дурар чурхуру, ва, ччивар зяифди хьпаз лигну, ерццуру. 7ГьацӀар удрар зазарин тумрягъ гъяхьру, ва аьхю гъахьи зазари дурар ккаъру. 8Хъа садар удрар авадан ругдик кахьру, дурари бегьер хуру: фундари – варж, фундари – йирхьцӀур, хъа фундари – сумчӀур ражари артухъ. 9Шлин ибариз ебхьураш, гъит ебхьри.

Тахалусарин мяна

10Багахь духьну, ученикари Дугъхьан гьерхру:

– Уву халкьдиз тахалусариинди гьаз кӀурава?

11Дугъу дурариз жаваб вуди кӀуру:

– Гьаз гъапиш учвуз Аьршарин Паччагьлугъдин сирар аьгъю хьуб тувначвуз, хъа имбудариз тувнадар. 12Фицики шлиз аш, дугъаз хъана тувди ва артухъра хьибди, хъа шлиз адарш, айибра тадабгъиди. 13Гьаддиз дурариз тахалусариинди кӀураза, дурариз, лигурашра, рябкъюрадар, хъпехъурашра, ебхьурадар ва гъаври ахърадар. 14Ишая пайгъамбри магьа гьамци дупнайиб дурариин улубкьура:

«Учвуз ебхьуз гъеебхьунчвуз,

хъа гъавриъ ахъидарчву,

учвуз рябкъюз гъябкъюнчвуз,

хъа мучӀуди гъуздичва.

15Гьаз гъапиш му инсанарин юкӀвар хъунти духьна.

Дурарин ибариз читиндитӀан ебхьури имдар.

Дурариз, улар уьлчӀюкьнамиди, фукӀара рябкъидар.

Гьаци дубхьнаки, дурариз рябкъюзра

рябкъюри имдар.

Ебхьузра ебхьури амдар,

ва хъунти юкӀвар гъавриъ ахърадар,

ва, чпи сагъ апӀбан бадали,

Аллагьдихьинди илтӀикӀидар».

16Учву, улариз рябкъюрайидар ва ибариз ебхьурайидар, бахтаврар вучва! 17Фицики дюзди кӀуразачвуз: гизаф пайгъамбраризна марцци касариз учвуз рябкъюрайиб рябкъюз ккундийи, хъа гъябкъюндар, ва учвуз ебхьурайиб ебхьуз ккундийи, хъа гъеебхьундар.

Тахалусдин мяна

18Магьа тум убзрурикан вуйи тахалусдин мяна: 19Аьршарин Паччагьлугъдикан гаф гъеебхьиган, дидин гъаври даршулайи гьарсар касдихьна иблис гъюру ва дугъан кӀваъ дубзнайиб гьитӀибкӀуру: рякъʼина ахьу удрар магьа гьадму ву. 20Гъван ккайи йишвʼина ахьу удрари, Аллагьдин гаф деебхьну, дишла шадди кьабул апӀрур вуйиб улупура. 21Хъа дугъакк ччив ккадар, гьаддиз думу цӀиб вахтназтӀан дар. Аллагьдин гаф себеб вуди чахъ хъергруган, ясана саб хатӀа-бала гъядябхъруган, думу гьадму сяаьт гафнахьан гьудучӀвуру. 22Зазар-варжйиригъ дахьу удрари Аллагьдин гаф деебхьну, гьар йигъандин гъайгъушнари ва девлетназ вуйи нефсну ккагънайи кас улупура. Мицир касдиъ гафну бегьер тувдар. 23Авадан ругдик кахьу удрари, Аллагьдин гаф деебхьну, дидин гъавриъ ахъру кас улупура. Ари гьадму варж, йирхьцӀур, вая сумчӀур ражари артухъ бегьер туврайи удрариз ухшар ву.

АчӀал

24Исайи халкьдиз сабсана тахалус ктибтуру:

– Аьршарин Паччагьлугъ магьа гьамдиз барабар ву: сар касди чан хутӀлиъ марцци тум убзуру. 25Адмийир даахнайиган, дугъан хайир даккни кас дуфну, дубзнайи хутӀлиъ ачӀлин тум дабгъуру. 26Чар ктубчӀвуру. Дяхни кӀул апӀуз хъюгъган, адмийириз душвягъ ачӀалра ктубчӀвури рябкъюру. 27Ва хулан эйсийихьна дуфну, дугъан лукӀари кӀуру: «Учу яв хутӀлиъ гъубзуб марцци тум вуйич, аьхир. Душваъ ачӀал наънан арайиз гъафну?» 28Дугъу дурариз кӀуру: «Думу йиз хайир даккни касди гъапӀуб ву». Хъа лукӀари кӀуру: «Увуз ккундуш, душну ачӀал апӀуча?» 29Дугъу кӀуру: «Ваъ, ачӀал апӀруган, дяхинра уьчӀюбгъиди. 30Иган хъубкьайиз, дяхнихъди ачӀалра гъибтай. Иган хъубкьган, узу иган убгрудариз пидиза: сифте ачӀал дапӀну, цӀигъ ургбан бадали, дурар гъварч-гъварчди йитӀай, хъа дяхин йиз танхаризди уч апӀинай».

Дилкан тахалус

31Исайи дурариз хъана жара тахалус ктибтуру:

– Аьршарин Паччагьлугъ магьа гьамдиз ухшар ву: сар касди бистниъ бицӀи дил кивру. 32Дил, учв варитӀан бицӀиб вушра, хъубкьган, думу, бистниъ варитӀан аьхюб дубхьну, гьарси шулу, гьаци вуйиган дидигъна завун ничхрар гъюру ва дидин циркларигъ мукьар апӀуру.

Дуникан тахалус

33Исайи дурариз хъана жара тахалус ктибтуру:

– Аьршарин Паччагьлугъ, дишагьлийи, гъадабгъну, шубуб сеъ хюйик капӀну, хамир вари утуз гъибту дуниз ухшар ву.

34Гьамрар вари Исайи халкьдиз, тахалусар хури, ктитури гъахьну, ва, тахалус дархиди, фукӀара кӀури гъахьундар. 35Исайи тахалусариинди пуб пайгъамбрин мелзналан улдучӀву гьаму гафар кӀулиз удучӀвбаз вуйи:

«Узу улхруган, тахалусариинди улхидиза,

ва дюнʼя ккебгъхъанмина вуйи сирар

тахалусариинди кдитидиза».

АчӀликан вуйи тахалусдин мяна

36Хъасин уч духьнайи халкьдихьан гьудучӀвну, Иса хулаз гъюру. Дугъан ученикарра Дугъахъди гъюру, ва хулаъ чпитӀан амдру вахтна дурари Дугъкан тӀалаб апӀуру:

– Учу хутӀлиъ ктубчӀву ачӀликан вуйи тахалусдин гъаврикк ккаъ сарун. 37Ва Дугъу жаваб вуди гъапи:

– Марцци тум убзурайир Инсаниятдин Бай ву. 38ХутӀил дюнʼя ву, марцци удрар Аллагьдин Паччагьлугъдиъ айи касар ву; хъа ачӀал иблисдин баяр ву. 39Дурар гъурзу душман иблис ву, иган убгувал гъиямат йигъ ву, хъа иган убгрудар малайикар ву. 40Гьаци вуйиган, фици ачӀал дапӀну, укӀ цӀигъ убгуруш, гьаци хьибди аьхирзамандин вахт улубкьиган: 41Инсаниятдин Бали Чан малайикар гьаъди, дурари Дугъан Паччагьлугъдиъ айи вари гунагькрарна къанунсуз ляхнар апӀурайидар гъядягъну, уч апӀиди 42ва дурар жегьеннемдин цӀигъна гатӀахьиди; душваъ зурба ишуб, суза-фигъан абхъди. 43Гьадму вахтна дугъри касари чпин Адашдин Паччагьлугъдиъ ригъдиси нур тувди. Ебхьуз ибар кайидариз гъит ебхьри.

Жиликк ккивнайи хазнайикан тахалус

44Аьршарин Паччагьлугъ магьа гьамдиз барабар ву: сар касди, хутӀлиъ жиликк хазна гъибихъган, думу чан айиси ккивру. Дугъу, кьадар адрукьан шад духьну, чаз айи-адруб вари масу тувну, гьадму хутӀил чазди гъадабгъуру.

Гавагьирикан тахалус

45Аьршарин Паччагьлугъ магьа гьамдизра ухшар ву: Сар алверчийи багьалу гавагьирар агури шулу. 46Саб ражари дугъаз уларин акв гъабхрубсиб успагьи гавагьир масу туври рябкъюру, ва дугъу, душну, чаз айи-адруб вари масу тувну, гьадму гавагьир гъадабгъуру.

Чуликан тахалус

47Аьршарин Паччагьлугъ магьа гьамдизра ухшар ву: балугъчйири гьюликк чул ккипру ва гьар жюрейин балугъар дисуру. 48Чул абцӀган, думу гъирагъдихъна ктабгъуру, ва, дидин гъвалахъ деъну, ужудар гъюдюхну, чӀурудар гатӀахьуру. 49Гьаци хьибди гъиямат йигъан: малайикар гъиди ва дурари дугъри касарихьан писдар жара апӀиди, 50ва дурар жегьеннемдин цӀигъна гатӀахьиди. Душваъ зурба ишуб, суза-фигъан абхъди.

51Исайи дурарихьан гьерху:

– Гьамдин варибдин гъавриъ ахъунчву?

Дугъаз дурари: «Ав», – гъапи.

52Исайи дурариз гъапи:

– Гьаддиз Аьршарин Паччагьлугъ аьгъю гъапӀу гьарсар къанунчи, чан сундхиан гьам цӀийиб, гьамсана йирсиб адабгъурайи хулан эйсийиз ухшар ву.

Чан багъри шагьриъ ва хулаъ пайгъамбриз гьюрмат ади шулдар

53Гьаму тахалусар кидитну ккудубкӀган, Иса дилин гъушу. 54Чан багъри шагьриз дуфну, дугъу жугьдарин мистаъ халкьдиз аьгъювалар улупуз хъюгъю. Вари мюгьтал духьнайи:

– Мугъан мукьан фагьум ва кьувват наънан вуйкӀан? – кӀуйи дурари. – 55Думу харатчийин Бай даринхъа? Дугъан дадайиз Марʼям кӀурдаринхъа, Дугъан чвйирра Якьуб, Юсуф, Симон ва Ягьуда даринхъа? 56Дугъан чйирра вари ухьухъди хъадаринхъа? Дугъан му вари кьудрат наънан вуйкӀан?

57Дурариз Дугъахъ хъугъуз ккун гъабхьундайи.

Исайи дурариз гъапи:

– Гьюрмат адру пайгъамбар хьуб мумкин дар, хъа чан багъри шагьриъ ва хулаъ пайгъамбриз гьюрмат ади шулдар. 58Исайи душваъ, дурарин хъугъвал адрувализ дилигну, улупуз ккайи гизаф аьламатар улупундайи.

Atualmente Selecionado:

Матта 13: ТабГК

Destaque

Copiar