Юнус 4
4
Юнусдиз РАББИЙИКАН хъял гъюб
1Му аьгьвалатну Юнус хъюлу урхьури дерккнайи. 2Ва дугъу, ккарагури, РАББИЙИЗ гъапну:
– Я РАББИ! Узу гьеле йиз уьлкейиъ имиди, гьамци шлуб аьгъяйзуз. Гьаддиз узу Таршишдиз гъажаргънийза. Уву кӀваъ ккунивал айи, рягьимлу, хъял дебккру, язухъ апӀру Аллагь вуйивал ва Увуз мициб мусибат даккнивал аьгъяйзуз. 3Ва гьамус, РАББИ, йиз жандиан рюгь адабгъ, гьаз гъапиш, мици гъузайиз, узуз йикӀуб ужу вуйиз.
4Ва гъапну РАББИЙИ:
– Хъа увуз гьаз хъял гъафунвуз?
5Юнус шагьриан удучӀвну, шагьриз фу шулуш, рябкъбан бадали, ригъ гьудубчӀвру терефнаъ чаз пажсиб дапӀну, дидин сирникк деъру. 6Хъа РАББИ Аллагьди саб набатат ктубчӀвуз гъитну, ва думу, Юнус хъялкканна дерднаккан азад апӀбан бадали, дугъан кӀулʼина сирин гъюруси, за гъабхьну. Му набататдиин Юнус гизаф шад гъахьну. 7Хъа Аллагьди гьаци дебккнуки, хъайигъан ахсрар ккиврайиган мялхъви набататдин ччивар ккидитӀну, ва думу гъеебццну. 8Ригъ гьудубчӀвиган, Аллагьди думу гьудубчӀву терефнаан гъати микӀ гьапӀну, ва ригъди Юнусдин кӀул абгуз хъюбгъну, думу гьаци инжиг гъахьнуки – чаз аьжал ккун гъапӀну ва гъапну:
– Мици гъузайиз, узуз йикӀуб ужу вуйиз!
9Ва Аллагьди Юнусдиз гъапну:
– Хъа увуз гьадму набатат гъеебццну кӀури, хъял гъафнийвуз?
Дугъу жаваб тувну:
– ЙикӀузкьан!
10Ва думуган РАББИЙИ гъапну:
– Уву, яв хил ктарди, уву гъайгъу дизригди, сад йишван кудубчӀвну, хъайишван гъудубгу набататдин язухъ апӀурава. 11Хъа Узхьан арччул хил гагулихьан жара апӀуз аьгъдру варжна къад агъзуртӀан артухъ инсанар ва гизаф мал-гъара айи зурба Ниневия шагьрин язухъ дарапӀри гъузуз шулин?
Atualmente Selecionado:
Юнус 4: ТабГК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2010, 2013, 2016, 2018, 2023