Mateo 13

Kjuíncheyóe̱xin Jesús ijnko chojni tꞌe̱nka̱ no̱nte̱e

(Mr. 4:1-9; Lc. 8:4-8)

1A̱ndá ti ña̱o a chꞌin Jesús kꞌuaxrjexín ti nchia la sákjuí kjuákꞌetja̱xi̱n chrínta nda̱ñao. 2#Lc. 5:1-3.*Ndá nchónhña chojni kóchjina ti itjen chꞌan, la kꞌui̱tꞌótjen chꞌan ijnko ntabarco kjuákꞌetja̱xi̱n chꞌan, la kaín ti chojni la chrínta ti ìnta̱ ó kꞌuejó sin. 3La itsjé nkehe kjuako chꞌan kjuíncheyóe̱xin chꞌan, ndáchro chꞌan:

―Ijnko chojni sákjuí tsꞌe̱nka̱ no̱nte̱e, 4a̱ndá na̱xa̱ itjen chꞌan nti̱a la iso ti noatje la xèjin chrínta nti̱a ndá ikui koxroxe la kjónie va ti noa. 5La iso ti noa mé kꞌuitjí chríkꞌá ixro̱, ndá tjoka kꞌuaña kixin ntiha la tsjéhya inche chónta, 6la ti ó kjui̱to̱n ña̱o la chjánxin la xámá kixin ni̱nkahya chónta nuèé. 7A̱ndá íso ti noatje la kꞌuitjí chríkꞌá ntachꞌi̱ la ntiha kꞌuaña ti ino, kjánchó kꞌuánkí kja̱xin ti ntachꞌi̱, la kꞌónahña ti noa kixin tsíkja̱te#13:7 Tsíkja̱te fué cubierto por los espinos ti ntachꞌi̱. 8A̱ndá íso ti noa la kꞌuitjí ti inche jína, la kꞌóna jína. Iso ti ino la kꞌóna ciento, íso la sesenta la ko treinta ñeno noa. 9Ti nkexro tihin la chrókuihin jína ―ichro chꞌin Jesús.

Nkekuènté ncheyóe̱xin Jesús

(Mr. 4:10-12; Lc. 8:9-10)

10Ndá ti sin kꞌuájiko chꞌin Jesús mé kóchjina kjuanchankí, ndáchro:

―¿Nkekuènté kixin ti ó nixjehé ti chojni la ncheyoéxian ijnko nkehe? ―ichro sin.

11A̱ndá chꞌin Jesús ndáchro:

―Jahara la Díos kjuajon kjuachaxin kixin tso̱nohara ti nkehe ninkexró noehña kuènté ti tꞌe̱to̱axín Díos itjen nkaya nka̱jní. A̱ndá jehe sin la náhí. 12#Mt. 25:29; Mr. 4:25; Lc. 8:18; 19:26.*Ti nkexro chónta, la a̱ntsí tsꞌáyéhe̱ kixin a̱ntsí tsochónta. A̱ndá ti nkexro chóntahya, la kjónté ti ntsíkoá chónta, la tsꞌaxrjehe. 13Méxra̱ ti ó nixja̱ha̱ sin la ntayóa̱xián kixin jehe sin la kjónté tjejótsjehe sin la tꞌikonhña sin, kjónté tjejótihin sin, la tienhña sin la ko tienxínhña sin. 14#Is. 6:9, 10.*Mé xi̱kaha xiteyá ti nkehe chrónka Isaías, ti nkexro kꞌuéchronka itén Díos ósé, ndáchro:

Kjónté tjejotihínra la tsiénxinhñara,

kjónté tjejotsjehéra, la tsꞌikonhñara.

15Kixin imá icha a̱sén ti chojni chjasin i.

Chónta sin ndatsjon sin, kjánchó tꞌikjéhe̱ sin,

chónta sin ikon sin, kjánchó tꞌikonhña sin,

Ti chrókꞌuikon sin

la ko chrókienxín sin

la chrókjan sin ti itjén janhan,

ndá janhan chrókjui̱ntakito̱ha̱ sin jína.

16 # Lc. 10:23, 24. *’Kjánchó jahara la Díos kjuíncheñao ti jahara kixin tjejotsjehéra la tꞌikonra la ko tihínra. 17Chaxín ndáxrja̱n kixin itsjé ti sin kꞌuéchronka itén Díos la ko ti sin jína mé tjinkaon sin chrókꞌuikon sin ti nkehe tꞌikonra, la kꞌuíkonhña sin, la ko tjinkaon sin chrókuihin sin ti nkehe tjejotihínra, kjánchó kienhña sin.

Jesús chrónkaxín nkehe tꞌaxrjexín ti itje kꞌuitsínka

(Mr. 4:13-20; Lc. 8:11-15)

18’Tihínra nkehe tꞌaxrjexín ti nkexro sákjuikꞌe̱nka̱ no̱nte̱e. 19Ti nkexro tihin ti itan kuènté ti kjuachaxin tꞌe̱to̱axín Díos itjen nkaya nka̱jní ndá tienxínhña, la itsi ti jínahña la sinchekꞌitjáña ti itan jína kuíhin sin, mé tíha la éxi ti noatje kꞌuitsínka nti̱a. 20A̱ndá ti noatje kꞌuitsínka chríkꞌá ixro̱ mé tꞌaxrjexín ti nkexro tihin itén Díos la tjoka tóxrínhi̱n sin la imá chéhe̱ sin, 21kjánchó ni̱nkahya chónta nuèé, ndá ti ó itsi ijnko kjuaxikaon o̱ kjuaxróxinhña kixin titekaon sin itén Díos, ndá tuénxín tsíto̱he sin, í tsinkáchónkihya sin Díos. 22A̱ndá ti itje kꞌuitsínkakꞌá ntachꞌi̱ mé tꞌaxrjexín ti nkexro tihin ti itan jína, kjánchó na̱xa̱ imá tóxakohen sin tsochónta sin kaín nkehe siín chjasintajni la ko tjinkaon sin tsochónta sin itsjé chichaon. Kaín tíha mé tꞌinkákonhe̱n ti nkehe kuíhin sin, landá tjinkíhya sin ti nkehe tjenka̱yáxin sin, ndá xi̱kaha xitjahya sichꞌehe sin Díos ixra̱. 23A̱ndá ti noatje kꞌuinka ti inche jína mé tꞌaxrjexín ti nkexro tihin ti itén Díos la ko tienxín la jína chꞌehe ixra̱ Díos. La ti chojni i, la éxi ti noatje, ijnko la kꞌóna ciento la ko íso la kꞌóna sesenta la ko treinta ñeno noa ―mé xi̱kaha ichro chꞌin Jesús.

Ti ika jehya jína kꞌuaña chríkꞌá ti ino trigo

24Ndá chꞌin Jesús kjuíncheyóe̱xin ínaá íjnko nkehe, ndáchro:

―Ti kjuachaxin tꞌe̱to̱axín Díos itjen nkaya nka̱jní mé yóhe̱ ijnko nkexro kꞌue̱nka̱ noatrigo ti no̱nte̱e. 25Kjánchó ti ó kꞌuejójua sin la ikui ti nkexro nínkakohen ti jehe sin la kꞌue̱nka̱kjan ti ika jehya jína chríkꞌá ti trigo landá sákjuí. 26A̱ndá ti ó kꞌuánkí ti ino trigo la kjuankíxin sítiá#13:26 sítiá crece y forma espiga, la ntiha kja̱xin kꞌuánkí ti ika jehya jína. 27Ndá ti sin chꞌexín xra̱ mé sákjuichenka sin ti chꞌin no̱nte̱e, ndáchro sin: “¿Á jehya noatje jína kuènka ti no̱nta̱a ní? A̱ndá ti xi̱kaha la, ¿nketí kjui̱xi̱n ti ka jehya jína, tsíkꞌañá?”, ichro sin. 28Ndá kjuáte̱he ìnché ti nonte, ndáchro: “Kjá ijnko ti chojni nínkakona kjuíchꞌe tíhi”, ichro chꞌan. Ndá ti sin chꞌexín xra̱ kjuanchankí ndáchro: “¿Á tjinkaoan kixin tsakítsjenkíni ti ika jehya jína ní?” 29Ndá ti chojni no̱nte̱e la ndáchro: “Náhí. Ti tsakítsjekíra ti ika jehya jína la kjá tsꞌaxrjenkíkué kja̱xin ti ino trigo. 30Ícha jína ti̱to̱héra tsꞌánkíkué ti ino trigo hasta ti ó tsotjájiani. Ndá tsétua̱ha̱n iso ti sin chꞌexín xra̱ kixin tsakítsjenkí sin sa̱o ti ika jehya jína la sinchenteto sin nkojnko manojo kixin tsoche, a̱ndá chrꞌéxi̱n tsoxrenájín ti noatrigo ndá tsꞌinkachjina jína.”

Ti tje̱e mostaza

(Mr. 4:30-32; Lc. 13:18-19)

31Ndá chꞌin Jesús kjuíncheyóe̱xin íjnko nkehe, ndáchro:

―Ti kjuachaxin tꞌe̱to̱axín Díos mé yóhe̱ éxi ijnko itje mostaza kꞌue̱nka̱xin ijnko chojni no̱nte̱e. 32A̱ndá ti itje la kjónté imá intsí la ti ó kꞌuaña ti inta mostaza la kꞌóna ijnko inta a̱ntsí ijié ke kaín ti íso nta la ti koxroxe la chꞌéna va ka̱ké va chríkꞌá ti inta.

Ti nkehe tꞌánkíxin nio̱tja̱

(Lc. 13:20-21)

33Kja̱xin kjuíncheyóe̱xin chꞌan ndáchro chꞌan:

―Ti kjuachaxin tꞌe̱to̱axín Díos mé yóhe̱ éxi ti nkehe tꞌánkíxin nio̱tja̱. Kjuinkíkjaxín ijnko chojnichjin iní medida harina ndá kꞌuánkí ti ichꞌo.

Xiteyá ti nkehe chrónka itén Díos

(Mr. 4:33-34)

34Kaín tíhi níxja chꞌin Jesús kjuíncheyóe̱xin nkehe, a̱ndá ti ncheyóe̱xinhña chꞌan nkehe la ninkehó chrónkahya chꞌan. 35#Sal. 78:2.*Mé xi̱kaha xiteyá ti nkehe tsíchronka ti nkexro kꞌuéchronka itén Díos ósé ndáchro:

Tsoníxja iso nkehe la si̱ntayóa̱xián

la tso̱xrja̱nkaxian ti nkehe ómó itjen ninkexró noehña ndesi kjuíchꞌéna Díos ti chjasintajni.

Ti nkehe tꞌaxrjexín ti ika jehya jína la ko ti notrigo

36Ndá ti ó kjuixin nixje̱he̱ chꞌin Jesús kaín ti chojni kꞌuejó ntiha, ndá kꞌuíxehen chꞌan nchia. La kóchjina ti sin kꞌuájiko chꞌan, la ndáchro sin:

―Chro̱nkaxian nkehe tꞌaxrjexín ti ika jehya jína kꞌuánkíkué ti ino trigo ti nonte ―ichro sin.

37Ndá kjuáte̱he chꞌin Jesús ndáchro:

―Ti nkexro kꞌue̱nka̱ ti noa jína, mé ti Xje̱en Díos kꞌóna Chojni. 38Ti nonte mé ti chjasintajni. A̱ndá ti noa jína mé ti chojni chónta ti kjuachaxin kuènté Díos. A̱ndá ti ika jehya jína mé yóhe̱ ti chojni tꞌe̱tue̱hen ti Jínahña. 39Ti nkexro nínkakona kꞌue̱nka̱ ti ika jehya jína, mé ti Jínahña. A̱ndá ti ó tsotjá sin ti noa mé ti tsjeje̱ chjasintajni la ti sin tsotjá mé ti sin ángel. 40Mé xi̱kaha éxi ti ika jehya jína xrenájín kixin tsoche mé xi̱kaha tso̱hen ti ó tsjeje̱ chjasintajni. 41A̱ndá ti Xje̱en Díos kꞌóna Chojni mé tsochrꞌán ti ángel kuènté kixin tsakítsjexín ti tjetꞌe̱to̱a̱xín Díos kaín ti chojni tjachróe íso chojni tsjasin ijie̱ la ko ti chojni ichꞌe nkehe jínahña. 42La tsochrꞌán sátsji ti itja̱ siín xrohi la ntiha tsotsjánka sin la ko sinietaón sin ñeno sin. 43Ndá kaín ti nkexro nchexiteyá ti nkehe tjinkaon Díos, mé tsꞌejó sin éxi ti ña̱o, tsꞌinkaséñaxín sin ti tꞌe̱to̱axín Itꞌéni Díos. Ti nkexro tihin la chrókuihin jína ―ichro chꞌin Jesús.

Ti nkehe tjete tjemá

44Kja̱xin ndáchro chꞌan:

―Ti kjuachaxin tꞌe̱to̱axín Díos mé yóhe̱ éxi ijnko nkehe tjete tjemá ijnko nonte. Ndá ijnko chojni kꞌuitja ti nkehe tjete la kjua̱kꞌe̱ma̱ ínaá. Ndá imá chéhe̱ sákjuí la kjuínchekji kaín ti nkehe chónta ndá ikjan la kꞌue̱na ti nonte a.

Ti ixro̱ perla tjete

45Kja̱xin ndáchro chꞌan:

―Ti kjuachaxin tꞌe̱to̱axín Díos mé kja̱xin yóhe̱ éxi ijnko nkexro xritjeyá ijnko xro̱ perla tjete sínkí. 46Ndá ti ó kꞌuitja ijnko ti ixro̱ imá tjete la sákjuí la kjuínchekji kaín ti nkehe chónta ndá kꞌue̱na ti xro̱ perla a.

Ti nchísén tséya sin koche

47La kja̱xin ndáchro chꞌin Jesús:

―Ti kjuachaxin tꞌe̱to̱axín Díos mé yóhe̱ éxi ijnko nchísén tꞌenkí sin ìnta̱ la itsé nchónhña koche. 48Ndá ti ó kaón va ti nchísén la takítsjenkí sin la tjakꞌe sin chrínta ti ìnta̱, la ntiha tꞌejótja̱xi̱n sin tꞌíchéhe sin ti koche jína la tꞌe̱nka̱ sin ntaxra. A̱ndá ti koche jehya jína la itꞌé sin. 49Mé xi̱kaha tso̱hen ti ña̱o tsjixixín. Itsi ti sin ángel la tsakítsjekjan sin ti chojni jína la ko ti chojni kjuíchꞌe nkehe jínahña. 50La tsochrꞌán sin ti chojni kjuíchꞌe nkehe jínahña ti itja̱ siín xrohi la ntiha tsotsjánka sin la ko sinietaón sin ñeno sin.

Ti nkehe ni̱xin la ko ti nkehe ndaxin

51Ndá chꞌin Jesús kjuanchankíhi ti sin kꞌuájiko, ndáchro:

―¿Tiénxinra kaín ti nkehe kjuàkua ní? ―ichro chꞌan.

Ndá kjuáte̱he sin, ndáchro sin:

―Jeén, Ìnchéni ―ichro sin.

52Ndá ti kjuixixín la ndáchro chꞌan:

―Ijnko maestro nohe kuènté ti ley la tienxín ti kjuachaxin tꞌe̱to̱axín Díos mé yóhe̱ éxi ijnko ìnché nchia chónta nkehe tjete tjechjina, la nohe tsakítsje ti nkehe ni̱xin la ko ti nkehe ndaxin ―ichro chꞌin Jesús.

Jesús kjuákꞌe Nazaret

(Mr. 6:1-6; Lc. 4:16-30)

53Ndá ti ó kjuixin nixja chꞌin Jesús, kjuíncheyóe̱xin itsjé nkehe, la sákjuixin ntiha. 54Sákjuí chꞌan ti chjasén chꞌan, Nazaret. Ndá ntiha kjuankíxin kjuako chꞌan kjuákꞌe chꞌan ti nchia xrakue̱xin ti sin judío. Ndá itsjé sin kuíhin sin ti nkehe tjako chꞌan la ndáchro sin:

―¿Xá nketí tsíxrako̱he̱ ti nkexro i, kixin imá nohe la ko nkexrín kixin tjasin chꞌan itsjé kjuaxroan ijié? 55¿Xá jehya tíhi ti xje̱en ti carpintero, la ti ìñé chꞌan la xá jehya María itꞌin ní? La ko, ¿xá jehya ti kícho chꞌan Santiago, José, Simón la ko Judas ní? 56Kja̱xin ti sin chjin, kícho chꞌan la ntihi tjejókoni sin. Ndá, ¿nkexrín kixin nohe chꞌan kaín ti nkehe í?

57 # Jn. 4:44. *Ndá xi̱kaha itsjé ti sin kꞌuejó ntiha la tjinkakonhña sin chrókuitekaon sin ti jehe chꞌan. Ndá ndáchro chꞌan:

―Ijnko nkexro chronka itén Díos la nkuíxín tjikosáyehe sin, kjánchó ti sin chjasén chꞌan la ko ti chojni ndo̱e chꞌan la tjikosayéhya sin ti nkexro a ―ichro chꞌin Jesús.

58Ndá xi̱kaha tsjéhya kjuaxroan kjua̱ko̱xi̱n chꞌan ntiha kixin kuítekakonhña sin ti jehe chꞌan.

Atualmente Selecionado:

Mateo 13: poeNTplus

Destaque

Copiar