Lukas 18

Zaj Lus Pivtxwv Hais Txog Tus Pojntsuam Thiab Tus Txiavtxim

1Ces Yexus txawm hais ib zaj lus pivtxwv ua kev cobqhia rau Nws cov thwjtim mloog, kom lawv yuavtsum niajhnub thov Vajtswv thiab tsis txhob qaugzog. 2Yexus hais tias, “Nyob hauv ib lub nroog, muaj ib tug txiavtxim uas yeej tsis paub ntshai Vajtswv thiab tsis hwm leejtwg li. 3Nyob hauv lub nroog ntawd muaj ib tug pojntsuam uas niajhnub tuaj thov tus txiavtxim ntawd hais tias, ‘Thov koj pub kev ncajncees rau kuv kom kuv dim ntawm kuv tus yeebncuab!’ 4Tau ntev loo uas tus txiavtxim no yeej tsis kam hais li, tiamsis thaum kawg nws kuj xav tau hais tias, ‘Txawm yog kuv yeej tsis ntshai Vajtswv thiab tsis hwm leejtwg li los, 5tus pojntsuam no pheej tuaj txob kuv, yogli, kuv yuav tau muab kev ncajncees rau nws, kom nws thiajli tsis niajhnub tuaj txob ua rau kuv ntxhovsiab!’ ”

6Tus Tswv hais ntxiv tias, “Nej twb hnov tus txiavtxim uas siab tsis ncaj ntawd tej lus lawm. 7Vajtswv yuav tsis muab kev ncajncees rau Nws haivneeg uas niajhnub niajhmo thov Nws no lov? Nws txawm yuav muab ncua ntev thiab tsis pab lawv li no lov? 8Kuv qhia rau nej hais tias, Vajtswv yeej yuav muab kev ncajncees rau lawv sai-sai. Tiamsis thaum Neeg Leejtub los, Nws puas yuav nrhiav tau kev ntseeg nyob rau hauv lub ntiajteb no lawm?”

Zaj Lus Pivtxwv Hais Txog Tus Falixais Thiab Tus Sau Se

9Yexus tau hais zaj lus pivtxwv no rau ibtxhia neeg uas xav tias lawv yog neeg ncajncees thiab ciali saib tsis taus lwmleej lwmtus. 10“Muaj ob tug txivneej nce mus thov Vajtswv pem lub Tuamtsev, ib tug yog tus Falixais thiab ib tug yog tus sau se. 11Tus Falixais txawm sawvntsug thiab thov rau nws tuskheej hais tias, ‘Vajtswv, kuv ua Koj tsaug uas kuv zoo tsis thooj li lwmleej lwmtus, kuv tsis nyiag leejtwg tug, kuv coj ncaj, kuv tsis ua nkauj ua nraug lossis kuv tsis zooli tus sau se ntawd. 12Ib lub limtiam twg kuv ua kevcai yoo mov ob zaug, thiab tagnrho tej nyiaj uas kuv khwv tau los, kuv muab ib feem kaum rau koj.’

13“Tiamsis tus sau se sawv nrug deb mentsis, nws twb tsis tsa qhovmuag ntsia saum ntuj li, tiamsis nws ntaus nws lub hauvsiab thiab hais tias, ‘Vajtswv, kuv yog neeg txhaum, thov koj tabncuab kuv!’ ” 14Yexus hais tias, “Kuv qhia rau nej hais tias, thaum tus sau se rov mus tsev lawm, nws yog tus uas Vajtswv txaussiab rau, tsis yog tus Falixais. Rauqhov txhua tus uas tsa nws lub hwjchim, yuav raug muab txo kom qis, thiab tus uas txo nws lub hwjchim, yuav raug muab tsa kom siab.” #Math 23:12; Lukas 14:11

Yexus Foom Koobhmoov Rau Cov Menyuam Yaus

(Mathais 19:13-15; Malakaus 10:13-16)

15Muaj neeg coj lawv tej menyuam yaus tuaj cuag Yexus thiab thov kom Nws cev tes plhws cov menyuam. Thaum cov thwjtim pom li ntawd, lawv txawm cem cov neeg ntawd. 16Tiamsis Yexus hu cov menyuam yaus los cuag Nws thiab hais tias, “Cia cov menyuam yaus los cuag Kuv, tsis txhob tav lawv, rauqhov Vajtswv lub Tebchaws yog cov uas zooli cov menyuam yaus no tug. 17Kuv qhia rau nej hais tias, yog leejtwg tsis txais yuav Vajtswv lub Tebchaws zoo ib yam li cov menyuam yaus no, ces tus ntawd yuav nkag mus tsis tau rau hauv hlo li.”

Tus Txivneej Npluanuj

(Mathais 19:16-30; Malakaus 10:17-31)

18Cov Yudais ib tug thawjcoj nug Yexus hais tias, “Xibhwb tus uas zoo, kuv yuav ua licas es kuv thiaj tau txojsia ntev dhawv mus ibtxhis?”

19Yexus teb nws hais tias, “Vim licas koj hu Kuv hais tias yog tus uas zoo? Tsis muaj leejtwg zoo, tsuas yog Vajtswv tibleeg xwb. 20Koj yeej paub tej kevcai uas hais tias, ‘Tsis txhob deev luag pojniam luag txiv; tsis txhob tua neeg; tsis txhob ua tubsab; tsis txhob ua timkhawv tsis tseeb, thiab yuavtsum hwm koj niam koj txiv.’ ” #Khiav 20:14; 2Kev 5:18; Khiav 20:13; 2Kev 5:17; Khiav 20:15; 2Kev 5:19; Khiav 20:16; 2Kev 5:20; Khiav

21Tus txivneej ntawd teb tias, “Txhua nqe ko, kuv twb coj thaum kuv tseem yau los lawm.”

22Thaum Yexus hnov nws hais li ntawd, Yexus hais rau nws tias, “Tshuav ib qho uas koj tseem tuncua. Ciali muab txhua yam uas koj muaj muag huv tibsi, thiab muab cov nyiaj ntawd mus pub rau cov neeg pluag, koj thiaj yuav npluanuj nyob saum ntuj ceebtsheej; tomqab ntawd koj ciali los nrog Kuv mus.” 23Thaum tus txivneej hnov li ntawd, nws nyuajsiab kawg li vim nws npluanuj heev.

24Thaum Yexus pom nws nyuajsiab heev, Yexus thiaj hais tias, “Qhov uas cov neeg npluanuj yuav nkag tau mus rau Vajtswv lub Tebchaws mas nyuaj kawg li! 25Ib tug ntxhuav nkag lub qhov koob tseem yoojyim dua li ib tug neeg npluanuj nkag mus rau hauv Vajtswv lub Tebchaws.”

26Cov neeg uas hnov Yexus hais li ntawd, lawv nug hais tias, “Yogli ntawd, leejtwg thiaj yuav dim tau?”

27Yexus teb tias, “Yam uas neeg ua tsis tau, Vajtswv ua tau.”

28Ces Petus txawm hais rau Yexus tias, “Saib maj, peb twb tso peb tej vajtse tseg thiab nrog Koj mus lawm.”

29Yexus hais rau lawv tias, “Kuv qhia tseeb rau nej hais tias, tus uas tso vaj tso tsev, tso pojniam, tso kwv tso tij, tso niam tso txiv, thiab tso tej menyuam tseg, vim Vajtswv lub Tebchaws, 30tiam no nws yuav tau txais ntau npaug, thiab lwm tiam nws yuav tau txojsia ntev dhawv mus ibtxhis.”

Zaum Thib Peb Uas Yexus Hais Txog Nws Kev Tuag

(Mathais 20:17-19; Malakaus 10:32-34)

31Yexus coj kaum-ob tug thwjtim mus rau ib qho thiab Nws hais rau lawv tias, “Ua tibzoo mloog nawb! Peb yuav mus rau saum lub nroog Yeluxalees, mas txhua yam yuav tiav rawsli tej uas cov xibhwb cev Vajtswv lus tau sau tseg hais txog Neeg Leejtub. 32Yuav muaj neeg ntes Nws coj mus rau Lwm Haivneeg. Lawv yuav ua saib tsis taus Nws, txobthuam Nws thiab nto qaubncaug rau Nws. 33Lawv yuav muab Nws nplawm thiab muab Nws tua, tiamsis hnub thib peb Nws yuav ciajsia sawv rov los.”

34Cov thwjtim tsis totaub txog tej no kiag li; lub ntsiablus no tau muab npog cia tsis pub rau lawv paub, lawv thiaj tsis paub xyov Yexus hais txog dabtsi.

Yexus Kho Tus Digmuag Uas Thovkhawv

(Mathais 20:29-34; Malakaus 10:46-52)

35Thaum Yexus mus yuav txog lub nroog Yelikaus, muaj ib tug txivneej digmuag zaum ntawm ntug kev thovkhawv. 36Thaum tus digmuag hnov neeg coob-coob tham zomzaws taug kev tuaj, nws nug hais tias, “Nej ua dabtsi?”

37Lawv qhia rau nws hais tias, “Yexus uas yog neeg Naxalev tabtom taug kev tuaj.”

38Tus digmuag ntawd txawm hu nrov-nrov hais tias, “Yexus, Daviv tus Tub, thov Koj tabncuab kuv lau!”

39Cov neeg uas nyob tom hauvntej cem thiab hais kom nws nyob twjywm. Tiamsis nws yimhuab qw nrov hais tias, “Daviv tus Tub, thov Koj tabncuab kuv thiab lau!”

40Yexus txawm nres thiab kom lawv coj tus digmuag los cuag Nws. Thaum tus digmuag los ze lawm, Yexus nug nws hais tias, 41“Koj xav kom Kuv ua dabtsi rau koj?”

Tus digmuag teb tias, “Tus Tswv, kuv xav rov pomkev.”

42Yexus hais rau nws tias, “Koj ciali pomkev! Koj txoj kev ntseeg twb kho koj zoo lawm.”

43Tamsim ntawd nws txawm pomkev, nws ciali nrog Yexus mus thiab ua Vajtswv tsaug. Thaum cov neeg coob-coob pom li ntawd, lawv sawvdaws nyias taus nyias qhuas Vajtswv.

Atualmente Selecionado:

Lukas 18: MWW2022

Destaque

Copiar